ភ្នំភ្លើងបាលីរៀបចំផ្ទុះ បាញ់ផ្សែងខ្មៅកម្ពស់ ជាង៣ពាន់ម៉ែត្រ ខណៈមនុស្សរាប់ម៉ឺននាក់ ត្រូវជម្លៀសខ្លួន

2017-11-27 02:49:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ការភ័យខ្លាចនៃការផ្ទុះដ៏ធំបំផុត នៃភ្នំភ្លើង Agung នៅលើកោះបាលី បានកើនឡើងកាន់តែខ្លាំង ហើយតំបន់ជម្លៀសនៅជុំវិញភ្នំភ្លើង ក៏ត្រូវបានពង្រីកផងដែរ។

អាជ្ញាធរឥណ្ឌូនេស៊ី បានលើកឡើងពីការប្រុងប្រយ័ត្ននៅកោះនេះ ដល់កម្រិតខ្ពស់បំផុត។ ជាមួយគ្នានេះដែរ អាកាសយានដ្ឋាននៅលើកោះបាលី ក៏ត្រូវបានបិទទ្វារផងដែរ។ ផ្សែងខ្មៅអួអាប់ ត្រូវបានភាយឡើងកម្ពស់រហូតដល់ទៅ ៣ ៤០០ម៉ែត្រ ពីលើកំពូលភ្នំ Agung។

ក្រុមប្រឹក្សាភិបាលជាតិសម្រាប់ការគ្រប់គ្រងគ្រោះមហន្តរាយ National Board for Disaster Management បាននិយាយថា សំឡេងផ្ទុះត្រូវបានគេឮ នៅចម្ងាយ ១២គីឡូម៉ែត្រពីកំពូលភ្នំ។ ការប្រុងប្រយ័ត្នត្រូវបានគេលើកឡើងដល់កម្រិតទី៤ ពីម៉ោង ៦ ព្រឹក (ម៉ោងក្នុងតំបន់) កាលពីថ្ងៃអាទិត្យ ដោយសារតែ លទ្ធភាព និងគ្រោះថ្នាក់នៃគ្រោះមហន្តរាយ ដែលជិតនឹងកើតមាននេះ។

ទោះបីជាយ៉ាងណា អាជ្ញាធរបានចែករបាំងមុខដល់អ្នកស្រុក ហើយបញ្ជាឲ្យមនុស្សនៅក្នុងតំបន់ ចម្ងាយ ១០គីឡូម៉ែត្រ ដើម្បីជម្លៀសខ្លួនចេញពីតំបន់នោះ។ រមណីយដ្ឋានសំខាន់ៗនៃទីក្រុង ដូចជា Kuta និង Seminyak មានចម្ងាយប្រហែល ៧០គីឡូម៉ែត្រពីភ្នំភ្លើង។

គួរឲ្យដឹងផងដែរថា មនុស្សប្រមាណ ២៥ ០០០នាក់កំពុងស្ថិតនៅជម្រកបណ្ដោះអាសន្ននៅឡើយ បន្ទាប់ពីមនុស្សជាង ១៤០ ០០០នាក់បានភៀសខ្លួន កាលពីដើមឆ្នាំនេះ។ យោងតាមការប៉ាន់ស្មានជាផ្លូវការមួយ បានឲ្យដឹងថា ចំណូលរបស់កោះបាលី នឹងបាត់បង់យ៉ាងហោចណាស់ ១១០លានដុល្លារ ក្នុងវិស័យទេសចរណ៍ និងផលិតភាព ក្នុងអំឡុងការជម្លៀសដ៏ធំនេះ៕

សូមទស្សនាវីដេអូខាងក្រោម៖