ទេសចរអាមេរិក ២នាក់ ថតស្រាតនៅមុខប្រាសាទថៃ ប្រឈមជាប់ទោសធ្ងន់ក
- 2017-11-30 03:39:28
- ចំនួនមតិ 0 | ចំនួនចែករំលែក 0
ទេសចរអាមេរិក ២នាក់ ថតស្រាតនៅមុខប្រាសាទថៃ ប្រឈមជាប់ទោសធ្ងន់ក
ចន្លោះមិនឃើញ
កាលពីថ្ងៃពុធ ម្សិលមិញនេះ ប៉ូលិសបានរៀបចំការចោទប្រកាន់ពីបទឧក្រិដ្ឋកម្មកុំព្យូទ័រ និងការប្រមាថសាសនាយ៉ាងធ្ងន់ធ្ងរ ដែលអាចឈានដល់ការដាក់ពន្ធនាគារ បុរសជនជាតិអាមេរិក ២នាក់ ឈ្មោះ Joseph អាយុ៣៨ឆ្នាំ និង Travis អាយុ៣៦ឆ្នាំ ដែលត្រូវបានឃាត់ខ្លួន នៅព្រលានយន្តហោះ Don Mueang នៅយប់ថ្ងៃអង្គារ បន្ទាប់ពីពួកគេបានបង្ហោះរូបថតស្រាតបង្ហាញគូទ នៅមុខប្រាសាទ Wat Arun ក្នុងទីក្រុងបាងកក ប្រទេសថៃ។
លោក Pol Col Jarupat Thongkomol ប្រធានស្នងការប៉ូលិសក្រុងបាងកក បាននិយាយកាលពីថ្ងៃពុធថា អ្នកទាំងពីរបានសារភាពចំពោះទង្វើនេះហើយ និងត្រូវបានពិន័យជាប្រាក់ចំនួន ៥ ០០០បាត ពីបទអាក្រាតកាយជាសាធារណៈ។ ការផាកពិន័យនេះ គឺជាការអនុញ្ញាតធ្ងន់បំផុតសម្រាប់បទល្មើស។
ជាមួយគ្នានេះដែរ ប្រធានស្ថានីយក៏បាននិយាយផងដែរថា ប៉ូលិសកំពុងតែរៀបចំការចោទប្រកាន់បន្ថែមទៀត ទៅលើបុរសជនជាតិអាមេរិកទាំង២នាក់នោះ ពីព្រោះពួកគេបានបង្ហោះរូបថតស្រាត នៅលើអ៊ីនធឺណិត ហើយបានថតរូបអាក្រាតកាយ នៅឯកន្លែងសាសនា។
លោក Pol Col Jarupat បានអះអាងបញ្ជាក់ថា ពួកគេនឹងត្រូវចោទប្រកាន់ ពីបទរំលោភច្បាប់ឧក្រិដ្ឋកម្មកុំព្យូទ័រ សម្រាប់ការបង្ហោះរូបភាពអាសអាភាសលើអ៊ីនធឺណិត និងរំលោភមាត្រាទី២០៦ នៃច្បាប់ព្រហ្មទណ្ឌ ទាក់ទងនឹងអាកប្បកិរិយានៅកន្លែងសាសនា ដែលប្រមាថដល់សាសនា។
គួរបញ្ជាក់ថា បទល្មើសដែលស្ថិតក្រោមច្បាប់ឧក្រិដ្ឋកម្មកុំព្យូទ័រ ត្រូវជាប់ពន្ធនាគាររហូតដល់ ៥ឆ្នាំ និងពិន័យជាប្រាក់រហូតដល់ ១០០ ០០០បាត។ អំពើខុសឆ្គងដែលស្ថិតនៅក្រោមច្បាប់ព្រហ្មទណ្ឌ ទាក់ទងនឹងការប្រមាថសាសនា អាចបណ្ដាលឲ្យមានទោសជាប់ពន្ធនាគារ ចាប់ពី ១ឆ្នាំ ដល់ ៧ឆ្នាំ និង/ឬ ពិន័យជាប្រាក់ពី ២០ ០០០ ទៅ ៤០ ០០០បាត៕
ចុចអាន៖