ទោសជាប់ពន្ធនាគារយូរបំផុតទាំង៣ ក្នុងប្រវត្តិសាស្ត្រ

2017-12-03 05:02:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសនីមួយៗបានកំណត់ស្ថានទម្ងន់ទោសខុសៗគ្នា ទៅតាមប្រពៃណី ទំនៀមទម្លាប់ ហើយមានប្រទេសខ្លះក៏អាចមានដល់ទោសប្រហារជីវិត។ ចំណែកទោសជាប់ពន្ធនាគារក៏មានរយៈពេលខុសគ្នា ហើយប្រទេសខ្លះបានបូកបន្ថែមទោសរហូតកើនដល់ រាប់ម៉ឺនឆ្នាំឯណោះ។

ខាងក្រោមនេះ ជាការកាត់ទោសឲ្យជាប់ពន្ធនាគារយូរបំផុតទាំង៣ ក្នុងប្រវត្តិសាស្ត្រ៖

១. ជនជាតិថៃ Chamoy Thipyaso

ជនល្មើស Chamoy Thipyaso ត្រូវបានតុលាការថៃ កាត់ទោសឲ្យជាប់ពន្ធនាគារ កាលពីឆ្នាំ១៩៨៩។ អ្នកទោសរូបនេះ បានប្រើល្បិចបោកប្រាស់តាមបែបគម្រោងជំនួញ Pyramid Scheme ដែលប្រមូលលុយពីមនុស្ស ១៦០០០នាក់ ក្នុងរង្វង់ទឹកប្រាក់ជាង ២០០លានដុល្លារ ហើយបូកសរុបទោសស្មើនឹង ១៤១ ០៧៨ឆ្នាំ។

ទោះបែបនេះក្ដី ច្បាប់ថៃនាពេលនោះ បានកំណត់ថាបទល្មើសបោកប្រាស់លុយកាក់ អាចមានទោសច្រើនបំផុតត្រឹម២០ឆ្នាំប៉ុណ្ណោះ។ អ្នកទោស Chamoy Thipyaso បានជាប់ពន្ធនាគារត្រឹម ៨ឆ្នាំ ក៏ត្រូវបានដោះលែងវិញ ដោយមិនមានបញ្ជាក់មូលហេតុច្បាស់លាស់។

២. ជនជាតិអេស្ប៉ាញ ៣នាក់

ជនជាតិអេស្ប៉ាញ ៣នាក់គឺ Otman el-Gnaoui, Jamal Zougam និង Emilio Suarez Trashorras បានប្រព្រឹត្តបទល្មើសបំផ្ទុះគ្រាប់បែកលើរថភ្លើងនៅទីក្រុង Madrid ក្នុងឆ្នាំ២០០៤ ដែលបានសម្លាប់មនុស្ស ១៩១នាក់ និងរបួសប្រហែល ២០០០នាក់។ ជនល្មើសទាំង៣ ទទួលទោសផ្សេងគ្នាទៅតាមកម្រិតបទល្មើស៖

Otman el-Gnaoui ត្រូវកាត់ទោសឲ្យជាប់ពន្ធនាគារ ៤២៩២៤ឆ្នាំ
Jamal Zougam ត្រូវកាត់ទោសឲ្យជាប់ពន្ធនាគារ ៤២៩២២ឆ្នាំ
Emilio Suarez Trashorras ត្រូវកាត់ទោសឲ្យជាប់ពន្ធនាគារ ៣៤៧១៥ឆ្នាំ

៣. ជនជាតិអាមេរិក Charles Scott Robinson

អ្នកទោសរូបនេះ បានប្រព្រឹត្តបទល្មើសរំលោភកុមារ ៦រូប ហើយត្រូវបានកាត់ទោសឲ្យជាប់ពន្ធនាគារយូរបំផុតក្នុងប្រវត្តិសាស្ត្រសហរដ្ឋអាមេរិក។ នៅឆ្នាំ១៩៩៤នោះ គណៈវិនិច្ឆ័យផ្ដល់អនុសាសន៍ថាគួរផ្ដល់ទោសដាក់ពន្ធនាគារ ៥០០០ឆ្នាំ សម្រាប់ការរំលោភកុមារម្នាក់ ហើយក៏ទទួលបានការយល់ព្រមពីតុលាការ។ សរុបទោសជាប់ពន្ធនាគារដែលរំលោភកុមារទាំង៦នាក់ គឺ ៣០ ០០០ឆ្នាំ៕

ចុចអានអត្ថបទ៖

ប្រភព៖ Express ប្រែសម្រួល៖ គង់ វិសាល