វិស្វករម៉ិកស៊ីកូថា ជញ្ជាំងព្រំដែនរបស់ ត្រាំ អាចចំណាយពេលដល់ ១៦ឆ្នាំដើម្បីសាងសង់

2017-12-06 07:43:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមវិស្វករជនជាតិម៉ិកស៊ីកូឈ្មោះ Estudio ៣.១៤ ដែលមានមូលដ្ឋានតាំងនៅទីក្រុង Guadalajara ប្រទេស ម៉ិកស៊ីកូ បានចាត់ទុកថាជញ្ជាំងព្រំដែនរបស់ Trump អាចចំណាយពេលរហូតដល់ ១៦ ឆ្នាំដើម្បីសាងសង់។

អ្នករចនាម្នាក់ឈ្មោះលោក Norberto Miranda និយាយថាជញ្ជាំងព្រំដែននេះនឹងមិនទំនងជាជំរុញទំនាក់ទំនងវិជ្ជមានរវាងប្រទេសទាំង ២ នោះទេ ហើយដីនៅតំបន់ភ្នំនោះនឹងធ្វើឲ្យការសាងសង់ជួបប្រទះការលំបាកផងដែរ។

តាមគំនូសបង្ហាញជញ្ជាំងពណ៌ផ្កាឈូកក្នុងកុំព្យូទ័ររបស់ក្រុមវិស្វករឲ្យដឹងថា ជញ្ជាំងនេះលាតសន្ធឹងប្រវែងជាង ៣ ១៤៤គីឡូម៉ែត្រ (១ ៩៥៤ម៉ាយល៍) និងត្រូវបានគេហៅឈ្មោះថា "ជញ្ជាំងគុក” ។

លើសពីនេះទៀត តាមការវិភាគរបស់សារព័ត៌មាន CNBC និង គេហទំព័រ Politico ឲ្យដឹងថា ការសាងសង់អាចនឹងចំណាយទឹកប្រាក់សរុបពី ១៥ពាន់លាន ដល់ ២៥ពាន់លានដុល្លារ ហើយថ្លៃជួលកម្មករជាង ២១ ០០០ នាក់ អាចចំណាយប្រមាណជា ២,១ ពាន់លានដុល្លារបន្ថែមទៀតក្នុងមួយឆ្នាំៗ។

ប្រធានាធិបតីម៉ិកស៊ីកូ លោក Enrique Peña Nietoបានលើកឡើងថាប្រទេសរបស់លោកនឹងមិនបង់ថ្លៃសម្រាប់ការសាងសង់នោះទេ។ ទោះជាយ៉ាងណាក៏ដោយលោកប្រធានាធិបតី Trumpនិយាយថា ប្រទេសម៉ិកស៊ីកូនឹងត្រូវបង់ថ្លៃពន្ធដារ ឬថ្លៃពាណិជ្ជកម្មសម្រាប់ការឆ្លងកាត់តាមជញ្ជាំងនេះ៕