ត្បិតវ័យជ្រេ តែតួអង្គ Gandalf ចង់សម្ដែងជាតួនេះម្ដងទៀតពេលផលិតជារឿងភាគ

2017-12-18 09:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង Ian Mckellen ដែលជាតារាដើរតួជាតួអង្គ Gandalf ក្នុងសែស្រឡាយរឿង "Lord of the Ring” បានប្រកាសក្ដែងៗថាខ្លួនចង់សម្ដែងជាតួអង្គនេះម្ដងទៀតនៅពេលក្រុមហ៊ុនយក្ស Amazon យកមកផលិតជាប្រភេទរឿងភាគវិញម្ដង។

តារារូបនេះបាននិយាយដូច្នេះថា៖ "Gandalf មានអាយុដល់ទៅជាង ៧ពាន់ឆ្នាំឯណោះ អីចឹងខ្ញុំមិនចាស់ពេកទេ"។ នេះបើតាមការបញ្ជាក់មួយ ថាខ្លួននៅតែចង់សម្ដែងជាតួអង្គនេះ ពេលបានសាកសូរនៅក្នុងកម្មវិធីមួយ។

កាលពីខែវិច្ឆិកាកន្លងទៅនេះ ស្ទូឌីយ៉ូផលិតភាពយន្តរបស់ Amazon បានសម្រេចចិត្តបង្កើតគម្រោងផលិត "Lord of the Ring" ទៅជារឿងភាគមួយថ្មី ដែលនឹងជាផលិតផលដើម្បីដាក់ឲ្យមើលនៅក្នុងសេវាកម្មកម្សាន្ត "Amazon Prime”។

ក្នុងឱកាសមួយដែលតារាជើងចាស់រូបនេះ ចូលរួមកម្មវិធី "Graham Norton's BBC Radio 2” កាលពីថ្ងៃសៅរ៍ លោកត្រូវបានគេសាកសួរថា តើលោកមានអារម្មណ៍យ៉ាងណាដែរ ប្រសិនជាតម្រូវឲ្យពាក់មួកមេធ្មប់ ហើយសម្ដែងជាតួនេះម្ដងទៀត។ លោកបានឆ្លើយតបភ្លាមៗថា៖ "ថាយ៉ាងម៉េច, សម្ដែងជា Gandalf ម្ដងទៀត?”

លោកបានបន្ថែមទៀតថា៖ "លោកមិនទាន់បានឆ្លើយថាព្រមសម្ដែងជាតួនេះម្ដងទៀតនៅឡើយទេ ព្រោះលោកមិនត្រូវបានគេសាកសួរ។ ប៉ុន្ដែតើអ្នកគិតថានឹងមានតារាណាផ្សេងទៀតសាកសមដើម្បីសម្ដែងតួអង្គនេះ? Gandalf មានអាយុដល់ទៅជាង ៧ពាន់ឆ្នាំឯណោះ ដូច្នេះខ្ញុំមិនចាស់ពេកទេ។"

ចំពោះសាច់រឿងដែលផលិតថ្មីនេះអាចជារឿងភាគដែលមានច្រើនរដូវកាល និងផ្ដោតសំខាន់ទៅលើហេតុការណ៍ដែលបានកើតឡើងមុនពេលរឿងទី១របស់សែស្រឡាយ "Lord of the Ring” ពោលគឺកើតឡើងមុន "Fellowship of the Ring” ទៅទៀត៕

បើសិនជាមិនសូវចាំថាលោកសម្ដែងជាតួអង្គនេះបានល្អប៉ុណ្ណាមកទស្សនាវីដេអូឈុតឆាកមួយខាងក្រោម៖