មាន៥ចំណុចនេះ ពេលរៀននៅសាកលវិទ្យាល័យ គឺលេចធ្លោខ្លាំងបំផុត

2018-02-19 10:15:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ជីវិតជានិស្សិតនៅសាកលវិទ្យាល័យ អាចនិយាយបានថា ជាពេលវេលាដ៏ល្អបំផុតក្នុងការកសាងខ្លួនឯងឆ្ពោះទៅរកអនាគតដ៏ត្រចះត្រចង់នាពេលខាងមុខ។ ទន្ទឹមនឹងនោះដែរ ការកសាងកេរ្តិ៍ឈ្មោះ និងភាពលេចធ្លោអំឡុងពេលរៀន ក៏សំខាន់ណាស់ដែរសម្រាប់និស្សិតគ្រប់រូប។ ខាងក្រោមនេះជាចំណុចសំខាន់ៗ ៥យ៉ាងគួរតែមានពេលរៀននៅសាកលវិទ្យាល័យ៖

១. ការស្លៀកពាក់សក្ដិសមជាអ្នករៀនសូត្រពិតៗ

ឈានជើងចូលដល់បរិវេណសាលា រឿងសំខាន់បំផុត គឺការចេះរៀបចំខ្លួនឲ្យសក្ដិសមជាអ្នកសិក្សា និងថ្លៃថ្នូរ។ ចំណុចនេះ អាចមាននិស្សិតខ្លះធ្វេសប្រហែស ជាពិសេសសាកលវិទ្យាល័យណាដែលមិនមានកំណត់ឯកសណ្ឋាន គឺស្លៀកពាក់ឲ្យតែបានៗ តែវាជាភាពលេចធ្លោមួយបើការរៀបចំខ្លួនរបស់យើងតែងពិសេសជាងនិស្សិតដទៃ។

២. មានភាពក្លាហានក្នុងការទាក់ទងជាមួយមនុស្សជុំវិញខ្លួន

ការមិនចេះមាត់ករកអ្នកណា ចូលចិត្តសម្ងំម្នាក់ឯងតែក្នុងថ្នាក់ គឺមិនល្អឡើយសម្រាប់ជីវិតជានិស្សិត។ ការប្រាស្រ័យទាក់ទង គឺសំខាន់ណាស់ ដើម្បីបង្កើតចំណងមិត្តភាព និងទទួលបានព័ត៌មានល្អៗ ពិសេសអ្នកដែលមានក្រេឌីតខ្ពស់ក្នុងថ្នាក់។ ដូច្នេះហើយ មិនចាំបាច់ត្រូវខ្លាចអ្នកណាឡើយ ត្រូវគិតថា យើងបង់លុយសាលាដូចតែគ្នាទេ។

៣. ទោះបីមិនមែនជាសិស្សឆ្នើមតែកុំឲ្យចាញ់គេឆ្ងាយពេក

ភាពលេចធ្លោរបស់និស្សិតរៀននៅសាកលវិទ្យាល័យ មិនប្រាកដថា លុះត្រាតែជានិស្សិតឆ្នើមនោះទេ ប៉ុន្តែការមករៀនជាប់លាប់ មានភាពក្លាហានក្នុងថ្នាក់ ក៏ធ្វើឲ្យយើងក្លាយជាមនុស្សដែលគេចាប់អារម្មណ៍ដែរ។ ចំណែកការរៀនសូត្រ ក៏ត្រូវខិតខំប្រឹងប្រែងឲ្យអស់ពីលទ្ធភាព ទោះមិនឈានដល់និស្សិតឆ្នើម តែយ៉ាងណាកុំឲ្យនៅបាតតារាងពេក។

៤. ការចូលរួមកម្មវិធីប្រឡងប្រជែងនានា

មានសមត្ថភាព តែខ្វះភាពក្លាហានក្នុងការបញ្ចេញជាសាធារណៈ ក៏ហាក់មិនសូវលេចធ្លោដែរ។ ដូច្នេះហើយប្រសិនបើ ក្នុងសាកលវិទ្យាល័យ មានរៀបចំការប្រឡងប្រជែងនានា គួរតែសាកល្បង ទោះជោគជ័យ ឬបរាជ័យ តែយ៉ាងហោចណាស់ក៏មានគេស្គាល់ ចង់រាប់អានដែរ។

៥. ការចុះតាមសហគមន៍ និងចូលរួមកម្មវិធីសង្គមឲ្យបានច្រើន

មនុស្សម្នាក់ៗមិនអាច ខ្លាំងគ្រប់យ៉ាងនោះទេ ការចូលរួមក្នុងសហគមន៍ និងកម្មវិធីសង្គមនានា គឺធ្វើឲ្យយើងស្វែងយល់ពីខ្លួនឯងបានច្រើន សិក្សាពីសង្គមកាន់តែស៊ីជម្រៅ។ ជាពិសេសមានទំនាក់ទំនងជាមួយបុគ្គលល្អៗជាច្រើន ដើម្បីផ្លាស់ប្ដូរផ្នត់គំនិត ចំណេះដឹង បទពិសោធន៍ឲ្យគ្នាទៅវិញទៅមក។ល៕