អ្នក​ផ្ទុក​មេរោគអេដស៍កើនជាង ៣% នៅហ្វីលីពីន តែប្រធានាធិបតីបែរឲ្យធ្វើរឿងហួសចិត្តមួយទៅវិញ

  • 2018-02-21 06:12:06
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ការ​សិក្សា​មួយ​បាន​រកឃើញ​ថា​អ្នក​ផ្ទុកមេរោគអេដស៍​ក្នុង​ប្រទេស​ហ្វីលីពីន បាន​កើន​ឡើង​៣,១៤% ក្នុង​រយៈ​ពេល​​១០​ឆ្នាំ​នេះ។

បើ​តាម​នាយកដ្ឋាន​សុខាភិបាល​ហ្វីលីពីន​ មាន​អ្នក​ផ្ទុក​មេរោគ​អេដស៍​ជាង ១១ ០០០ករណី​ ត្រូវ​បាន​រកឃើញក្នុង​ឆ្នាំ ២០១៧ ដែល​អត្រា​នេះ​កើន​ឡើង​ជិត ២០% បើ​ធៀប​នឹង​ឆ្នាំ ២០១៦ ដែល​មាន​ត្រឹម​ជាង ៩​ ០០០ ករណី។ កាល​ពី​ឆ្នាំ ២០១២ នាយកដ្ឋាន​ខាង​លើ ក៏​បាន​ធ្វើ​កំណែទម្រង់​ច្បាប់​សុខភាព​បន្ត​ពូជ និង​ចាប់​ផ្តើម​លើក​ទឹក​ចិត្ត​ឲ្យ​មាន​ផែន​ការ​គ្រួសារ និង​ការ​រួម​ភេទ​ដោយ​សុវត្ថិភាព​ ដើម្បី​កាត់​បន្ថយ​អត្រា​មាន​ផ្ទៃ​ពោះ​ខ្ពស់​របស់​យុវវ័យ។

ផ្ទុយទៅវិញ កាល​ពី​ពេល​ថ្មី​ៗ​នេះ លោក​ប្រធានាធិបតី Rodrigo Duterte បែរ​ជា​ណែ​នាំ​បុរស​ទាំង​អស់​ក្នុង​ប្រទេស ឲ្យ​ឈប់​ប្រើ​ប្រាស់​ស្រោម​អនាម័យ​ទៅ​វិញ។ ដោយ​លោក​លើក​ឡើង​ថា "វា​មិន​ធ្វើ​ឲ្យ​យើង​មាន​ក្ដី​សុខ​​នោះ​ទេ។”

ការ​លើក​ឡើង​របស់​ប្រធានាធិបតី​ខាង​លើ បាន​ធ្វើ​ឲ្យ​មាន​ការ​រិះ​គន់​យ៉ាង​ច្រើន។ លើស​ពី​នេះ​ទៀត អង្គការ​ឃ្លាំ​មើល​សិទ្ធ​មនុស្ស​ក្នុង​ប្រទេស បានថ្កោល​ទោស​ចំពោះ​ការ​លើក​ឡើង​ខាង​លើ និង​ចោទ​ប្រកាន់​លោក ប្រធានាធិបតី​ថា​បង្ហាញ​ពី "ការ​មិន​យក​ចិត្ត​ទុក​ដាក់​ចំពោះ​សុខភាព​ប្រជាជន​ហ្វីលីពីន។"

អង្គការ​ដដែល​បាន​បញ្ជាក់​ក្នុង​សេចក្ដី​ថ្លែងការណ៍​មួយ​ថា "លោក Duterte គួរ​តែ​ចាត់​វិធាន​ការ​ប្រកប​ដោយ​ប្រសិទ្ធ​ភាព​មួយ​ដើម្បី​ការពារ​សុខភាព​របស់​ប្រជាជន​ហ្វីលីពីន តាម​រយៈ​ការ​គាំទ្រ​ការ​ផ្លាស់​ប្ដូរ​គោល​នយោបាយ​ជា​បន្ទាន់ ដើម្បី​បង្កើន​លទ្ធភាព និង​ការ​ប្រើ​ប្រាស់​ស្រោម​អនាម័យ​ក្នុង​ប្រទេស ហ្វីលីពីន"៕

ចុចអាន ៖

ប្រភព៖ Independent   ប្រែ​សម្រួល៖ រ័ត្ន

បិទ