គ្រាន់តែរឿងទូរសព្ទក្បាលឆកសោះ អ្នកគាំទ្រជជែកគ្នាបែកផ្សែង

2018-04-05 03:44:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពេលស្មាតហ្វូនមានអេក្រង់ឆកចេញលក់ព្រោងព្រាត ហើយក្រុមហ៊ុនជាច្រើនក៏គ្រោងផលិតបន្តបន្ទាប់ ធ្វើឲ្យអ្នកគាំទ្រជជែកគ្នាបែកផ្សែងទាំងនៅលើបណ្តាញសង្គម និងអ្នកគាំទ្រនៅខាងក្រៅ។

រូបភាពតំណាង

* [ទូរសព្ទក្បាលឆក កាន់តែពេញនិយម រាប់ត្រួសៗមិនក្រោម ១០ ម៉ូដែលទេ](http://news.sabay.com.kh/article/1033574#utm_campaign=onpage)

លោក លីមហេង បុគ្គលិកធ្វើការនៅហាងទូរសព្ទ សៀង លីន ប្រាប់ថា ដំបូងប្លែកដែរ។ តែយូរៗទៅធម្មតា ដោយសារម៉ាកផ្សេងក៏មានអេក្រង់ឆកដែរ។

លោកបន្តថា វាមិនជាអីចម្លែកទេដែលក្រុមហ៊ុនផលិតទូរសព្ទផ្សេងទៀតបញ្ចេញស្មាតហ្វូនជំនាន់ក្រោយមានអេក្រង់ឆកដោយសារទំនោរទីផ្សារ។

លោកថា អ្នកទិញក៏ដែលលឺមាននិយាយអ្វីពីស្មាតហ្វូនចេញស៊េរីក្រោយដែលមានអេក្រង់ឆកនេះ ក្រៅពីក្រុមហ៊ុនផ្សេងៗដៀមដាមគ្នាពីរឿងការលួចចម្លងអេក្រង់ឆកនេះ។

លោក សេង ជាជាងជួសជុល និងលក់ទូរសព្ទមួយទឹកនៅផ្សារទួលសង្កែបានប្រាប់ថា ទូរសព្ទដែលចេញក្រោយគេហើយមានរូបរាងស្រដៀងគេច្បាស់ណាស់ជាមានអ្នកថាចម្លងគេហើយ តែសំខាន់មានអ្នកគាំទ្រឬអត់ ព្រោះរបស់របរប្រើប្រាស់តែងតែមានរូបរាងចម្លងគ្នាខ្លះៗហើយ កុំឲ្យតែដូចគ្នាទាំងអស់។

លោកថា ទូរសព្ទចេញក្រោយ ដែលចេញមកខុសគេ ឬទំនើបជាងគេបន្តិចទើបធ្វើឲ្យអ្នកប្រើប្រាស់ចង់បាន មិនគិតថាចម្លងពីគេទាំងស្រុង។ ប៉ុន្តែលោកថា អាចមានអ្នកគាំទ្រម្ខាងៗចម្អកដាក់គ្នា ដោយសារការលួចចម្លងបច្ចេកវិទ្យាគ្នា។

ងាកមកលោក ដារ៉ា បុគ្គលិកបម្រើការក្នុងក្រុមហ៊ុនឯកជនមួយកំពុងកាន់ស្មាតហ្វូនចុចនៅពេលសួរពីរឿងស្មាតហ្វូនដែលមានអេក្រង់ឆកប្រាប់ថា វាជារឿងធម្មតាហើយ ព្រោះពេល iPhone X ចេញមកលេចធ្លោរាងអេក្រង់ឆកនេះ មានទីផ្សារ ទើបបានជាក្រុមហ៊ុនផលិតផ្សេងចេះតែយកគំរូតាម។

លោកបន្តថាទោះបីជាស្មាតហ្វូនទាំងនេះ ចម្លងតាមក៏ដោយតែក៏ត្រូវមានអ្វីដែលប្លែក ដូចជាបច្ចេកវិទ្យា គុណភាព តម្លៃ ទើបធ្វើឲ្យអ្នកគាំទ្រមិនងាកទៅប្ដូរប្រើប្រេនផ្សេង។

ចំណែក បុរសម្នាក់ជាអ្នកលក់ទូរសព្ទនៅហាងធំមួយកន្លែងសុំមិនបញ្ចេញឈ្មោះបានប្រាប់ថា កន្លងមកធ្លាប់បានលឺច្រើនណាស់រឿងទូរសព្ទក្បាលឆកដែលក្រុមហ៊ុនជាច្រើនត្រៀមផលិតចេញ និងមានខ្លះបានប្រកាសចេញហូរហែ។

ចំពោះរឿងនេះលោកយល់ថា ដូចជាមិនសូវពេញចិត្តដែរព្រោះពេលយកទូរសព្ទចេញក្រោយហើយមានរូបរាងចម្លងគេ ច្បាស់ជាមាន ហ្វេនផ្សេងចំអកមិនខាន។

លោកបន្ថែមថាក្រុមហ៊ុនផលិតទូរសព្ទក្រោយៗគួរតែរកអ្វីដែលថ្មីទើបល្អជាង មិនធ្វើឲ្យហ្វេនម្ខាងៗអន់ចិត្ត៕

ចុះប្រិយមិត្តវិញយល់យ៉ាងណាដែរ ចំពោះស្មាតហ្វូនអេក្រង់ឆកទាំងនេះ?

ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......

អានបន្ត៖

អត្ថបទ៖ ម៉េងងី