៨ ជំនឿ អំពីការមានផ្ទៃពោះ ដែលអ្នកតែងជឿ តែជារឿងមិនពិត

2018-04-20 12:54:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមគេហទំព័រដ៏ល្បី Brightsideខាងក្រោមជាជំនឿទាំង ៨ ដែលលោកអ្នកតែងជឿអំពីការមានផ្ទៃពោះ៖

១.ត្រគាកធំស្រួលកើតកូន៖ ភាគច្រើន ពេលដែលនិយាយដល់ត្រគាកធំ គេច្រើនសំដៅទៅលើផ្នែកខាងលើនៃឆ្អឹងត្រគាក ហើយប្រការនេះជួយឲ្យកើតកូនស្រួល។ ទោះជាយ៉ាងណា តាមពិតទៅគឺ រូបរាង និងទំហំនៃផ្នែកកណ្ដាលឆ្អឹងអាងត្រគាកទៅវិញទេ ដែលជាកត្តាសម្រេចកូនកើតមកស្រួលឬអត់។ ស្ត្រីមានត្រគាកតូចខ្លះអាចមានផ្នែកកណ្ដាលឆ្អឹងអាងត្រគាកធំដែរ។

២.ទំហំ និងរូបរាងនៃពោះ អាចកំណត់ដឹងថាកូនក្នុងពោះជាស្រី ឬប្រុស៖ វាមិនមែនជារឿងសាមញ្ញអ៊ីចឹងទេ។ មាន ២ កត្តាដែលកំណត់ទំហំ និងរូបរាងនៃពោះ។ នោះគឺ ទំហំនៃទារក និងទីតាំងរបស់ទារកក្នុងស្បូន។

៣.វាជារឿងអាក្រក់ដល់ទារក បើសិនជាស្ត្រីជាម្ដាយគេងផ្កាប់មុខពេលមានគភ៌៖ តាមពិតទៅទារកស្ថិតនៅជ្រៅក្នុងសាច់ដុំស្បូន។ ដូច្នេះបើស្ត្រីដែលមានគភ៌ចង់គេងផ្កាប់មុខ ក៏មិនអីដែរ ឲ្យតែគេងទៅស្រួល។

៤.ស្ត្រីមានផ្ទៃពោះមិនអាចរត់៖ បើសិនជាស្ត្រីមានផ្ទៃពោះ មិនមានបញ្ហាស្មុគស្មាញដូចជាឡើងសម្ពាធឈាម មិនធ្លាប់រត់ពីមុនមក ឬបញ្ហាផ្សេងទៀត ការរត់ជាសកម្មភាពល្អមួយសម្រាប់សុខភាពពួកគេ។

៥.អាការៈចាញ់កូនកើតឡើងតែពេលព្រឹក ៖ អាការៈចាញ់កូនអាចកើតគ្រប់ពេល។ បើតាមការសិក្សាមួយ មានតែស្ត្រី ២%ប៉ុណ្ណោះដែលមានអាការៈបែបនេះ កើតឡើងនៅតែពេលព្រឹក។

៦.វាមិនអីទេ សម្រាប់ស្ត្រីមានផ្ទៃពោះក្នុងការផឹកគ្រឿងស្រវឹងម្ដងម្កាល៖ ពេលដែលម្ដាយផឹកគ្រឿងស្រវឹង កូនក្នុងផ្ទៃក៏ផឹកដែរ។ ការផឹកគ្រឿងស្រវឹងក្នុងអំឡុងពេលមានកូន បង្កហានិភ័យច្រើនណាស់ដល់កូនក្នុងផ្ទៃ (ទាំងផ្លូវកាយ និងផ្លូវសតិរបស់ទារក)។

៧.ការកើតវះ ស្រួលជាងកើតធម្មជាតិ៖ ស្ត្រីជាច្រើន បានជ្រើសរើសការកើតកូនតាមរយៈការវះកាត់ ដោយពួកគេគិតថា ធ្វើបែបនេះមានភាពងាយស្រួល និងសុវត្ថិភាពជាងកើតធម្មជាតិ។ ទោះជាយ៉ាងណា បើតាម Bright Side កើតកូនតាមរយៈកាត់ការវះកាត់ ស្រួលជាងកើតធម្មជាតិពេលកំពុងសម្រាលមែន តែផ្ដល់ផលស្មុគស្មាញច្រើននាថ្ងៃអនាគត។ បើតាមការណែនាំរបស់គ្រូពេទ្យជាច្រើន ទាល់តែជីវិតម្ដាយ និងទារកស្ថិតក្នុងភាពប្រឈមណាស់ ទើបការវះកាត់ក្លាយជាជម្រើស។

៨.កូនក្នុងផ្ទៃមិនដឹងថាមានរឿងអីនៅខាងក្រៅ៖ គ្រូពេទ្យជាច្រើននាពេលបច្ចុប្បន្នបានរកឃើញថា តាមពិតទារកក្នុងផ្ទៃអាចឮសំឡេងម្ដាយខ្លួន ដែលសំឡេងនេះហើយដែលធ្វើឲ្យរូបគេមានសភាពស្ងប់នៅក្នុងផ្ទៃ។ បន្ថែមពីលើនេះ ទារកអាចមើលឃើញពន្លឺដែលកើតឡើងនៅខាងក្រៅពោះ ហើយងាកមុខចេញពេលដែលពន្លឺភ្លឺពេក។ មិនតែប៉ុណ្ណោះ កូនក្នុងផ្ទៃថែមទាំងអាចភ្លក់អាហារដែលម្ដាយបរិភោគទៀតផង តាមរយៈការលិទ្ធផ្ទៃសុក។ ពួកគេថែមទាំងអាចសុបិនទៀតផង៕