វត្តពុទ្ធគិរីកម្ពុជា តម្រៀបពុទ្ធបដិមា ស្ទើរមួយចំហៀងភ្នំ កក្រើកភ្ញៀវទេសចរទៅទស្សនា (មានវីដេអូ)

2018-04-23 05:07:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ការតម្រៀបពុទ្ធបដិមាលើជម្រាលភ្នំ គឺតាមការគ្រោងទុក ៨៤ ០០០ អង្គ បានក្លាយទៅជាទីចាប់អារម្មណ៍ភ្ញៀវទេសចរ ជាពិសេសពុទ្ធបរិស័ទ ទៅធ្វើបុណ្យឥតដាច់ នៅវត្តពុទ្ធគិរីកម្ពុជា។ វត្តនេះស្ថិតនៅភូមិត្រពាំងស្ការ ឃុំត្រពាំងក្រញូង ខេត្តតាកែវ ដោយធ្វើដំណើរតាមផ្លូវជាតិលេខ ៣ មកដល់ផ្លូវបំបែក អង្គតាសោម បត់ស្ដាំប្រមាណជា ៤០ គីឡូទៀត នឹងទៅដល់វត្តនេះមិនខាន។

សព្វថ្ងៃនេះ វត្តពុទ្ធគិរីកម្ពុជា បានកសាងព្រះពុទ្ធរូបប្រមាណជា ២ម៉ឺនអង្គរួចហើយ ដោយមិនទាន់រាប់បញ្ចូលពុទ្ធបរិស័ទជិតឆ្ងាយជាវព្រះពុទ្ធរូបអង្គតូច-ធំ ជាហូរហែទៀត នៅឡើយ។

អ្នកនាង កាកា រស់នៅភ្នំពេញ ដែលបានទៅទស្សនា និងធ្វើបុណ្យនៅវត្តគិរីកម្ពុជានេះ បានប្រាប់ Sabay ថា ដើមឡើយឃើញមានការបង្ហោះរូបភាព និង វីដេអូជាច្រើនលើបណ្ដាញសង្គមហ្វេសបុក ម៉្លោះហើយក៏បានទៅទស្សនាផ្ទាល់ ឃើញថា ពិតជាមានព្រះពុទ្ធរូបច្រើនអង្គតម្រៀបនៅលើជម្រាលភ្នំ ដែលមើលទៅស្រស់ស្អាត និងទាក់ទាញភ្ញៀវទេសចរ។

«ខ្ញុំមានសទ្ធាជ្រះថ្លា ដោយបានជាវព្រះពុទ្ធរូបអង្គតូចតម្លៃ ២០ដុល្លារ ដើម្បីភ្ជាប់និស្ស័យនៅទីនេះផង ក្នុងវិស័យព្រះពុទ្ធសាសនាផង»។ អ្នកនាងកាកា បន្ថែម។

នេះជារូបព្រះពុទ្ធសមាធិអង្គតូច ដែលពុទ្ធបរិស័ទអាចជាវយកមកតម្កល់ក្នុងតម្លៃ ២០ដុល្លារ

សម្រាប់ពុទ្ធបដិមាអង្គធំ ឈរ គឺតម្លៃ ៨០ដុល្លារ

នេះជាសេចក្ដីជូនដំណឹងរបស់ វត្តពុទ្ធគិរីកម្ពុជា ដែលផ្ទាំងព័ត៌មាននេះ នៅពីមុខរូបព្រះពុទ្ធតម្រៀបជាជួរតាមជម្រាលភ្នំ រូបព្រះពុទ្ធអង្គធំ បែរព្រះភ័ក្ដ្រ ទៅខាងកើត

ក្នុងន័យកសាងព្រះពុទ្ធបដិមាចំនួន ៨៤ ០០០ អង្គនេះ គឺប្រតិស្ថានឡើងដើម្បីឧទ្ទិសចំពោះព្រះធម៌ដែលព្រះដ៏មានព្រះភាគជាម្ចាស់បានទ្រង់ត្រាស់សម្ដែងទុកក្នុងគម្ពីរព្រះត្រៃបិដកចំនួន ៨៤ ០០០ ព្រះធម្មក្ខន្ធ ដែលមានបិដកសរុប ១១០ ក្បាល បែងចែកជាបីផ្សេងគ្នា មានព្រះវិន័យ ព្រះសូត្រ និងព្រះអភិធម្ម សម្រាប់បូជាតំណាងឲ្យព្រះពុទ្ធរូបមួយព្រះអង្គសម្រាប់តំណាងឲ្យមួយព្រះធម្មក្ខន្ធផងដែរ៕

សូមទស្សនាវីដេអូ