មកស្គាល់ដាយណូស័រ ៧ប្រភេទលេចមុខក្នុងរឿង "Jurassic World: Fallen Kingdom”

2018-06-04 07:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួន ប្រាកដជាធ្លាប់បានទស្សនាខ្សែភាពយន្តរឿង "Jurassic World” ភាគមុនរួចមកហើយ ដែលបានបង្ហាញពីប្រភេទសត្វដាយណូស័រមួយចំនួនដែលគ្រប់គ្នាមិនសូវបានស្គាល់។ ជាមួយនឹងខ្សែភាពយន្ត "Jurassic World” ភាគថ្មីនេះដែរ នឹងនាំមកនៅប្រភេទសត្វដាយណូស័រកាន់តែច្រើនជាងភាគមុនទៅទៀត។

ខាងក្រោមនេះ ជាសត្វដាយណូស័រចំនួន ៧ ប្រភេទដែលនឹងមានវត្តមានក្នុងខ្សែភាពយន្ត"Jurassic World: Fallen Kingdom”៖

១. ដាយណូស័រប្រភេទ Carnotaurus

Carnotaurus ជាប្រភេទដាយណូស័រដែលកាចសាហាវជាងគេបំផុតក្នុងប្រវត្តិសាស្ត្រ។ វាជាប្រភេទមួយដែលជាសត្រូវដ៏ខ្លាំងក្លារបស់ដាយណូស័រប្រភេទ T-Rex។ រូបរាងរបស់ដាយណូស័រប្រភេទនេះ មានលក្ខណៈស្រដៀងគ្នាទៅនឹងប្រភេទ T-Rex គ្រាន់តែខុសគ្នាត្រង់ Carnotaurus មានដុះស្នែង២នៅលើក្បាល។ ចំណែកទំហំវិញ ក៏មានលក្ខណៈរាងតូចជាងដាយណូស័រប្រភេទ T-Rex ដែរ។

២. ដាយណូស័រប្រភេទ Tyrannosaurus (T-Rex)

ដាយណូស័រប្រភេទនេះ ជាប់ឈ្មោះជាស្ដេចនៃពពួកដាយណូស័រទាំងពួង។ T-Rex ជាប្រភេទដាយណូស័រដែលស៊ីសាច់ជាអាហារ និងមានកម្ពស់ជាង ១២ ម៉ែត្រ។ ដាយណូស័រដ៏កាចសាហាវនេះ បង្ហាញរូបរាងច្រើនជាងគេក្នុងវីដេអូឃ្លិបរឿង "Jurassic World: Fallen Kingdom”។

៣. ដាយណូស័រប្រភេទ Baryonyx (ដាយណូស័រច្រមុះវែង)

ដាយណូស័រប្រភេទនេះ ក៏នឹងមានរូបរាងក្នុងខ្សែភាពយន្តថ្មីមួយនេះផងដែរ។ Baryonyx បានទំហំតូចជាង Carnotaurus ប៉ុន្តែមានថ្គាមវែងដូចជាសត្វក្រពើ។ ធ្មេញរបស់ពួកវាមានលក្ខណៈពិសេស គឺរាងកោង និងមុតប្រៀបដូចកាំបិត។ បើតាមអ្នកវិទ្យាសាស្ត្របានស្រាវជ្រាវថា ដាយណូស័រប្រភេទនេះស៊ីត្រី និងដាយណូស័រតូចៗជាអាហារ។

៤. ដាយណូស័រប្រភេទ Sinoceratops

ដាយណូស័រប្រភេទនេះ ជាប្រភេទសត្វចតុប្បាទធំជាងគេបង្អស់ដែលរកឃើញក្នុងពិភពលោកនេះ ដែលស៊ីស្មៅ និងរុក្ខជាតិជាអាហារ។ ច្រមុះរបស់វា នៅក្រោមស្នែង ហើយសត្វប្រភេទនេះក៏មានដុំពកៗនៅលើក្បាលផងដែរ។

៥. ដាយណូស័រប្រភេទ Allosaurus

ដាយណូស័រប្រភេទ T-Rex និង Carnosaurus មានកម្លាំងខ្លាំង ចូលចិត្តទៅណាមកណាតែឯង ឬមានគ្នាតិចតួចប៉ុណ្ណោះ ប៉ុន្តែដាយណូស័រប្រភេទ Allosaurusវិញតែងតែធ្វើដំណើរជាហ្វូង។ ជាមួយនឹងសមត្ថភាពរត់លឿន និងមានធ្មេញមុតស្រួច ពួកវាអាចការពារខ្លួនពីសត្រូវដែលមានទំមាឌធំជាងខ្លួនបានដោយការវាយប្រហារ និងខាំសត្រូវនៅពេលជួបគ្រោះថ្នាក់។

៦. ដាយណូស័រប្រភេទ Indoraptor (I-Rex)

Indoraptor ក៏ចាត់ចូលជាប្រភេទដែលគ្រោះថ្នាក់បំផុតលើភពផែនដីនេះដែរ។ ដាយណូស័រប្រភេទនេះ មានភាពវ័យឆ្លាតអាចបន្លំខ្លួនជាមួយបរិស្ថាននៅជុំវិញខ្លួនវាបាន។ លក្ខណៈពិសេសមួយទៀតគឺ ពួកវាមានសមត្ថភាពចេះបញ្ឆោតគូសត្រូវ ឧទាហរណ៍ដូចជា ចេះបន្លំស្នាមដានជើង ដើម្បីបញ្ឆោតក្រុមអ្នកវិទ្យាសាស្ត្រជាដើម។

៧. ដាយណូស័រប្រភេទMosasaurus

ដាយណូស័រប្រភេទនេះ អាចហៅម៉្យាងទៀតបានថា ជាដាយណូស័រ T-Rex ក្រោមបាតសមុទ្រ។ នៅក្រោមបាតសមុទ្រ ពួកវាមានកម្លាំងខ្លាំងក្លាណាស់។ ដូចដែលបានបង្ហាញរូបរាងម្ដងរួចមកហើយ នៅក្នុងភាគមុននៃខ្សែភាពយន្តមួយនេះ ប្រិយមិត្តប្រាកដជាបានឃើញរូបរាងសត្វដាយណូស័រប្រភេទនេះដែលបានបង្ហាញខ្លួននៅក្នុងអាងទឹកនៃសួនរបស់គេ ប៉ុន្តែក្នុងភាគថ្មីនេះ Mosasaurus ដូចជាត្រូវបានរត់គេចចូលទៅក្នុងសមុទ្រ។

គួរបញ្ជាក់ដែរថា ខ្សែភាពយន្តរឿង "Jurassic World: Fallen Kingdom” នឹងចាក់បញ្ចាំងជាផ្លូវការនៅថ្ងៃទី ០៧ ខែមិថុនានេះ។ បើចង់ឃើញប្រភេទដាយណូស័រទាំងអស់នេះ កុំភ្លេចទៅរង់ចាំទស្សនាទាំងអស់គ្នា៕

ប្រភព៖ Kenh14 ប្រែសម្រួល៖ អន សុភក្ត្រា