មកស្វែងយល់ពាក្យគន្លឹះខ្លះៗ មុនទៅប្រកួត Hack (Cambodia Cyber Contest)

2018-06-13 05:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតប្រជែងថ្នាក់ជាតិផ្នែកសន្តិសុខបច្ចេកវិទ្យាគមនាគមន៍ និងព័ត៌មាន ឬហៅការប្រកួត "Cambodia Cyber Contest” នឹងចាប់ផ្តើមនៅថ្ងៃទី ២៦ ខែមិថុនាឆ្នាំ ២០១៨ ខាងមុខនេះ ដោយចម្រាញ់យកតែបេក្ខជនជយលាភី ២រូបប៉ុណ្ណោះ នឹងត្រូវបញ្ជូនទៅប្រកួតបន្តថ្នាក់តំបន់នៅប្រទេសសិង្ហបុរី។ តោះ! ឥឡូវមកស្វែងយល់ពីពាក្យគន្លឹះនិងបទពិសោធន៍មួយចំនួនពីអ្នកជំនាញ។

រូបតំណាង

លោក គីម អាន ប្រធានការិយាល័យ CamCERT បានចែករំលែកបទពិសោធន៍ខ្លះៗលើវិស័យសន្តិសុខព័ត៌មានបច្ចេកវិទ្យានេះ សម្រាប់អ្នកដែលមិនទាន់ស្គាល់កម្មវិធី Cyber Contestនិងអ្នកដែលមិនទាន់ស្គាល់ថា អ្វីទៅជា Capture The Flag(CTF ) និងដើម្បីលើកទឹកចិត្តអ្នកចូលរួមការប្រកួត តើការចូលប្រកួតនេះផ្ដល់អត្ថប្រយោជន៍យ៉ាងណាខ្លះ?

CTFs គឺជាព្រឹត្តិការណ៍ប្រកួតប្រជែងដែលត្រូវបានរៀបចំជាញឹកញាប់នៅតាមសន្និសីទសន្តិសុខបច្ចេកវិទ្យាគមនាគមន៍ និងព័ត៌មាន (Cybersecurity Conferences) ដោយបច្ចុប្បន្នព្រឹត្តិការណ៍បែបនេះត្រូវបានគេរៀបចំកាន់តែច្រើនឡើងៗ ដែលអ្នកអាចធ្វើការចុះឈ្មោះ ប្រកួតអនឡាញតាមបណ្តាវេបសាយមួយចំនួនដូចជា ctftime, picoctf, bsidectf ជាដើម។

CTFs អាចត្រូវបានគេបែងចែកជាពីរប្រភេទគឺ Jeopardy Style និង Attack and Defend Style ពេលនេះលោកលើកយកតែប្រភេទ Jeopardy Style ដែលវាងាយស្រួលជាង នៅពេលអ្នកចាប់ផ្តើមស្វែងយល់ដំបូងអំពី CTF។ ការប្រកួតប្រភេទនេះមានសំណួរ (Challenges) ជាច្រើនចាប់ពីកម្រិតស្រាលរហូតដល់ពិបាក ដែលតម្រូវឱ្យអ្នកចូលរួមប្រកួតត្រូវមានចំណេះដឹងច្រើនមុខដើម្បីអាចដោះស្រាយសំណួរបាន។ ចុចទីនេះ មើលលក្ខខណ្ឌបេក្ខជនដែលអាចចុះឈ្មោះបាន

អ្នកប្រកួត CTF ត្រូវដោះស្រាយនូវសំណួរដើម្បីទទួលបាននូវចម្លើយ ឬហៅថា “Flag” ដើម្បីទទួលបានពិន្ទុ។ ការចូលរួមប្រកួត CTF អាចចុះឈ្មោះលេងម្នាក់ឯង ឬលេងជាក្រុមដើម្បីដោះស្រាយសំណួរងាយស្រួលមួយចំនួនដោយខ្លួនឯង ឬសហការណ៍គ្នាជាក្រុមដើម្បីដោះស្រាយសំណួរដែលមានកម្រិតពិបាក (ពិន្ទុច្រើន)។ ការប្រកួត CTF ជាទូទៅត្រូវបានកំណត់ពេលវេលា ហើយពិន្ទុត្រូវបានសរុបពេលចប់ការប្រកួត។ អ្នកប្រកួត ឬក្រុមដែលឈ្នះ គឺជាអ្នកដែលបានដោះស្រាយនូវសំណួរដែលមានពិន្ទុច្រើន ដើម្បីការពារពិន្ទុរបស់គេឲ្យស្ថិតនៅលេខមួយក្នុងតារាងលទ្ធផល។

រូបតំណាង

CTF ជាញឹកញាប់ត្រូវបានគេបង្កើតសំណួរដោយផ្អែកលើឧប្បត្តិហេតុ ឬភាពងាយរងគ្រោះកំពុងតែកើតមានពិតប្រាកដ ដែលផ្ដល់ឱ្យអ្នកនូវឱកាសមួយជាបទពិសោធន៍ អំពីរបៀបដែលអ្នកគួរអនុវត្តន៍ និងរៀបចំខ្លួនការពារប្រព័ន្ធរបស់អ្នកពីប្រភេទនៃការវាយប្រហារទាំងនេះ ដូច្នេះការប្រកួត CTF មិនមែនត្រឹមតែសប្បាយប៉ុណ្ណោះទេ តែអ្នកក៏អាចទទួលបានការចំណេះដឹង បទពិសោធន៍និងជំនាញផងដែរ។ ការរៀបចំខ្លួនដើម្បីប្រកួត CTF ប្រសិនបើអ្នកមិនធ្លាប់មានបទពិសោធន៍ ឬមិនធ្លាប់ឆ្លងកាត់ការប្រកួត CTF ពីមុនមកនោះទេ សូមកុំទាន់បារម្ភ និងមានគំនិតបោះបង់ចោលការប្រកួត CTF អី ពីព្រោះគន្លឹះនៅក្នុងការវាយប្រហារ (Hacking) គឺត្រូវការភាពអត់ធ្មត់។

ទោះជាពេលខ្លះ វាពិតជាពិបាកដែលអ្នកមិនបានយល់អំពីការប្រកួតនេះ ប៉ុន្តែមានវិធីសាស្ត្រដែលអ្នកអាចសិក្សា និងរៀនលេងបានគឺអ្នកត្រូវបន្តព្យាយាម និងអនុវត្តផ្ទាល់ដោយខ្លួនឯងដើម្បីទទួលបាននូវចំណេះដឹងថ្មី (សូមតាមដាន តើអ្នកអាចរៀនអនុវត្តបានដោយរបៀបណា?)

ថាមិនត្រូវបន្តិចទៀតអ្នកអាចរកបានពិន្ទុខ្ពស់បំផុតក្នុងការជាប់លេខ១ ក៏ថាបាន។ ការរៀនលេង CTF អ្នកគួរចាប់ផ្ដើមស្វែងរកក្រុម ឬអ្នកដែលមានចំណេះដឹង និងបទពិសោធន៍ ដើម្បីបង្ហាញពីទឹកចិត្តរបស់អ្នកក្នុងការចូលរួមប្រកួត និងសុំចែករំលែកបទពិសោធន៍របស់គេ។ ជា បទពិសោធន៍ផ្ទាល់របស់លោកដែលជាសមាជិកនៃសហគមន៍ InfoSec តែងតែមានឆន្ទៈក្នុងការចែករំលែកចំណេះដឹងរបស់ពួកគេជាមួយនរណាម្នាក់ដែលចាប់អារម្មណ៍ក្នុងការព្យាយាមរៀនសូត្រ និងរីកចម្រើននៅក្នុងវិស័យនេះ។

ទន្ទឹមនឹងនេះ មុននឹងអ្នកចង់ឱ្យគេជួយអ្នកគួរតែជួយខ្លួនឯងជាមុនសិន ដូចជាចំណេះដឹងមូលដ្ឋាន និងស្រាវជ្រាវប្រធានបទ រួមទាំងការព្យាយាមអនុវត្តន៍ដោយផ្ទាល់ ព្រោះថាអ្នកដែលមានជំនាញ និងបទពិសោធន៍ ដែលបានដើរលើវិថី CTF នេះ គឺពួកគេបានចំណាយពេលវេលាផ្ទាល់ខ្លួនជាច្រើន ក្នុងការស្រាវជ្រាវ ហ្វឹកហាត់និងអនុវត្តន៍ផ្ទាល់ដើម្បីដោះស្រាយនូវសំណួរក្នុងព្រឹត្តិការណ៍ CTF។

លោកបានណែនាំថានៅពេលដែលអ្នកត្រៀមខ្លួនចូលទៅកាន់ព្រឹត្តិការណ៍ CTF កុំភ្លេចយកកុំព្យូទ័រយួរដៃ ឬកុំព្យូទ័រផ្សេងទៀតដែលមានប្រព័ន្ធប្រតិបត្តិការ (OS) ជាមួយកម្មវិធីជាច្រើន ដែលអាចជួយអ្នកក្នុងការប្រកួត។ ចុចទីនេះ មើលលក្ខខណ្ឌកុំព្យូទ័រដែលបេក្ខជនត្រូវយកមកប្រកួត

#ប្រភេទសំណួរដែលមានក្នុង CTF ប្រភេទ Jeopardy Style៖

Programming សំណួរប្រភេទនេះជាទូទៅត្រូវការចំណេះដឹងផ្នែកភាសា Programming សម្រាប់ដោះស្រាយសំណួរ ដើម្បីផ្ដល់ឱ្យអ្នកនូវចម្លើយដែលពេលខ្លះវារួមបញ្ចូលទាំង Programming និងចំណេះដឹង Reverse Engineering ក្នុងការដោះស្រាយ។
Crypto សំណួរប្រភេទនេះគឺវាពាក់ព័ន្ធទៅនឹងការធ្វើកូដនីយកម្ម (encryption) ដែលពេលខ្លះសំណួរមាននូវឯកសារមួយដែលបានធ្វើកូដនីយកម្ម ហើយអ្នកត្រូវដោះស្រាយកូដនីយកម្មនោះដើម្បីអាចមើលអក្សរដែលជាចម្លើយក្នុងឯកសារនោះ មិនត្រឹមតែប៉ុណ្ណឹងទេជួនកាលជារឿយៗសំណួរអាចត្រូវបានគេបញ្ចូលប្រភេទនៃមេរោគចាប់ជំរិត (Ransomware) ដែលកំពុងតែកើតឡើងថ្មី។
Web សំណួរប្រភេទនេះគឺជួនកាលអ្នកត្រូវស្វែងរក និងវាយប្រហារលើភាពងាយរងគ្រោះក្នុងបច្ចេកវិទ្យា web ។ ឧទាហរណ៍៖ អ្នកអាចបញ្ចូល SQL ដើម្បីអាននូវចម្លើយ ឬហៅថា “secret_flag” ពីតារាងក្នុង database ឬក៏វិធីសាស្ត្រ directory traversal ដើម្បីរកចម្លើយ (“flag.txt”) ក្នុងវេបសាយនៅមានវិធីជាច្រើនទៀតដូចជា cross site scripting និង JavaScript ជាដើម។
Digital Forensics សំណួរប្រភេទនេះ គឺវាមានភាពទូលំទូលាយ ដូចជាការបូកបញ្ចូលគ្នារវាង Forensics និង Crypto, Network Forensic, Hardware/Software Forensic… ដូចនេះ Forensics មានន័យថាជាការធ្វើកោសល្យវិច័យ ដើម្បីរកភស្តុតាង។ ឧទាហរណ៍៖ សំណួរអាចផ្តល់ឲ្យអ្នកនូវឯកសារ .txt មួយដើម្បីឲ្យអ្នករកភស្តុតាង (ចម្លើយ) ឬសំណួរផ្ដល់ឲ្យអ្នកនូវឯកសារ (.pacp) ទិន្នន័យចរាចរណ៍របស់បណ្តាញដើម្បីវិភាគរកនូវឈ្មោះគណនី ពាក្យសំងាត់ ឬឯកសារសំខាន់ដែលបានបាត់បង់។
Binary Reversing សំណួរប្រភេទនេះគឺពាក់ព័ន្ធទៅនឹងការធ្វើ reverse-engineering ទៅលើកម្មវិធី ប៉ុន្តែមិនមែនជាកូដដើម (source code) នោះទេ អ្នកត្រូវធ្វើការបំបែកនូវកម្មវិធីនោះ ហើយមើលទៅលើ assembly ដើម្បីស្វែងយល់ថាវាដំណើរការយ៉ាងដូចម្តេច ដែលកម្មវិធីទាំងនោះអាចជាកម្មវិធីដំណើរការនៅលើ Windows ឬ Linux, កម្មវិធី Java និងកម្មវិធីផ្សេង ៗទៀត។
Binary Reversing អាចបែងចែកជាពីរគឺ ទី១ pawning: គឺជាការបំបែកនូវចំនុចខ្សោយនៃកម្មវិធីដើម្បីទទួលបានចម្លើយ និងទី២ Crackme: គឺជាស្វែងរកនូវចម្លើយនូវក្នុងកម្មវិធី ដែលជារឿយៗកម្មវិធីនោះត្រូវមាននូវពាក្យសំងាត់ដើម្បីអាចចូលទៅបាន ដូចនេះអ្នកត្រូវការចំណេះដឹង reverse-engineering ដើម្បីស្វែងរកចម្លើយដែលអាចមាននៅក្នុងប្លុក memory ជាដើម

CTF គឺជាឱកាសដ៏ល្អមួយដើម្បីរៀន ជួបជុំ និងចងមិត្តភាពរវាងអ្នកដែលស្រលាញ់ចូលចិត្តផ្នែកសន្តិសុខ បច្ចេកវិទ្យាគមនាគមន៍ និងព័ត៌មាន មិនត្រឹមតែប៉ុណ្ណោះអ្នកប្រសិនបើអ្នកឈ្នះ អ្នកនឹងមានឱកាសច្រើនក្នុងការ ដែលក្រុមហ៊ុនធំៗសម្លឹងឃើញពីជំនាញរបស់អ្នកហើយចង់បណ្ដុះបណ្ដាលអ្នកបន្ថែមក្នុងវិថីផ្នែកសន្តិសុខ។ លោកសង្ឃឹមថាតាមរយៈអត្ថបទមួយនេះអ្នកអាចយល់កាន់តែច្បាស់ថាអ្វីទៅជា CTF និងអត្ថប្រយោជន៍របស់វា ដូច្នេះប្រសិនបើអ្នកមិនធ្លាប់ចូលរួមព្រឹត្តិការណ៍ CTF លោកលើកទឹកចិត្តអ្នកឱ្យចូលរួម និងធ្វើការចុះឈ្មោះឱ្យបានឆាប់ដើម្បីទទួលបានចំណេះដឹងថ្មីៗ៕

អានអត្ថបទបន្ត៖

អត្ថបទ៖ រក្សា