បទចម្រៀង​រ៉េបដ៏​ពេញ​និយម ដែល​គ្រប់គ្នាធ្លាប់បានឮ ច្រៀងលេងតាមយ៉ាងសប្បាយរីករាយ បទ "វាយម៉ាលុយ" ជាចម្រៀងនិពន្ធដោយយុវតី ឈ្មោះ តី វ័យ២២ឆ្នាំ ដែលជាអ្នករាំចង្វាក់ Hip Hop របស់តារាចម្រៀងល្បីឈ្មោះ មាស សុខសោភា ហើយនាងក៏មានក្រុមរាំផងដែរ។

រឿងនឹកស្មានមិនដល់មួយ ដែលកើតឡើងក្នុងថ្ងៃនោះ គឺដោយសារតែបាច់លុយដុល្លារមួយដុំ ដូចផ្លិត ដែលអ្នកគាំទ្រជូនទៅ ដល់តារាចម្រៀង មាស សុខសោភា។

ពេលនោះដែរ កញ្ញា តី ប្រាប់ថា ដោយនាងចូលចិត្តលេងសប្បាយៗ ដែលជាចរិតពិតរបស់តារារូបនេះផង គ្រាន់តែឃើញដុំលុយនោះភ្លាម នាងក៏យកមកកាន់លេង ហើយផ្តើមច្រៀងលំនាំបទ រ៉េប យកឈ្មោះខ្លួនឯងមកច្រៀងលេង។

តី ក៏កាន់គ្រវីបាច់លុយនោះលេងបណ្ដើរ និងច្រៀងបណ្តើរ ដោយមានមិត្ត​ភ័ក្តថតវីដេអូនោះ ហើយយកទៅបង្ហោះក្នុងកម្មវិធីទូរសព្ទមួយ។ មិនយូរប៉ុន្មានក៏មានអ្នក​រៀនត្រាប់តាម ច្រៀង​លេង​សប្បាយ ហើយ​ក៏​មានអ្នក​ស្នើមក​ស្រីស្អាត សម្តីមុតម្នាក់នេះជាច្រើន​ឱ្យផលិតចម្រៀងរ៉េប វាយម៉ាលុយ នេះបានសម្រេច។

កញ្ញា តី ឆ្លើយតបនឹងបទសម្ភាសជាមួយ Sabay ថា៖ ​"នេះ​ជា​រឿងអភូតហេតុ​ពិត​មែន ខ្ញុំមិនដែលនឹកស្មានថាអាចមានការគាំទ្រ ហើយក្លាយជា​តារា​ចម្រៀង​នោះទេ"។ ក្រោយក្លាយ​ជាអ្នក​ចម្រៀង​ដោយមានមហោជនគាំទ្រ តារាចម្រៀងដែលផ្តើមចេញពីអ្នករាំរូបនេះថា គ្រប់គ្នាក៏អាចមានឱកាសល្អបែបនេះដែរ គ្រាន់ថា អ្នកនឹងជ្រើសរើសយកវិធីបែបណា និងត្រូវធ្វើបែបណាបន្ត។

ក្រោយក្លាយជាតារាចម្រៀង​ពិតមែន ប៉ុន្តែបច្ចុប្បន្ន តីមិន​បោះបង់អាជីពជាអ្នករាំនោះទេ នាងនៅតែហ្វឹកហាក់ផ្នែកនេះបន្តទៀត។ ពិសេសដើម្បីកំដរអារម្មណ៍អ្នកគាំទ្រ ពេលខាងមុននេះ កញ្ញា នឹងបញ្ចេញបទចម្រៀងថ្មីៗ ជាច្រើនបទទៀតដែលកំពុងរៀប​ចំផលិត​។ "បទថ្មីក្រោយៗទៀត ក៏ធានាថា នឹងកាន់តែសប្បាយរីករាយ ខ្ញុំធានា..." តី អះអាងច្បាស់ៗ៕

អត្ថបទ៖ Sunny