៥ ស្នៀតរបស់អ្នកលក់កាបូប ខោអាវ តាមហ្វេសប៊ុក ឡើងត្រជាក់ល្អូក តែចំណេញកប់ក្ដោង

2018-08-30 10:00:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងចំណោមទំនិញជាច្រើនមុខមានលក់លើបណ្ដាញសង្គមហ្វេសប៊ុក សំលៀកបំពាក់ និងកាបូប ហាក់មានការចាប់អារម្មណ៍ខ្លាំង គ្រប់ពេលមានអ្នក Live លក់ម្ដងៗមានមនុស្សមិនតិចអ្នកទេស្ម័គ្រចិត្តទម្លាក់លេខ បញ្ជាទិញព្រូសៗគ្មានគិតច្រើនឡើយ។ តែអ្នកទាំងអស់គ្នាមិនដែលដឹងទេថា តើអ្នកលក់មានល្បិចស្នៀតអ្វីខ្លះ ដើម្បីលក់ឲ្យដាច់ ហើយថែមទាំងចំណេញក្ដោងទៀតផង។ តទៅនេះជាការលើកឡើងរបស់អ្នកពូកែសង្កេតពីក្បួនតម្រារបស់អ្នកលក់តាមអនឡាន តែងអនុវត្តរាល់ថ្ងៃ តែនៅតែមានអ្នកជឿស៊ុប។

រូបតំណាង

**១. តែងនិយាយថារួសរាន់ឡើងជិតដល់ថ្ងៃផុត Promotion ហើយ តែដោយសារមានការគាំទ្រទើបបន្តPromotion ទៀត**

តាមការលើកឡើងរបស់កញ្ញា សុនា ដែលយល់ច្បាស់ពីជម្រៅចិត្តរបស់អ្នកលក់តែម្ដង និយាយថា តាមពិត Promotion របស់អ្នកលក់តាមអនឡាញ គ្មានក្បួនខ្នាត កំណត់ថ្ងៃច្បាស់លាស់ដូចក្រុមហ៊ុននោះទេ គឺកំណត់ខ្លួនឯង បង្កើត Promotion ខ្លួនឯង។ ជួនកាលក៏គ្មានការគាំទ្រអីណាស់ណាដែរ តែដើម្បីឲ្យគេចាប់អារម្មណ៍ក៏ចេះតែថាទៅ ដើម្បីឲ្យមានអ្នកចូលមើល។ ម្យ៉ាងវិញទៀតតម្លៃដែលដាក់លក់ និងការបញ្ចុះតម្លៃ ក៏គ្មានអ្វីមកវាស់វែងច្បាស់លាស់ដែរ ស្ទាបសាច់ក្រណាត់ហើយ កំណត់យកៗ តម្លៃស្ថិតលើមាត់អ្នកលក់។

ចំណុចនេះគ្មានអីពិបាកឡើយសម្រាប់អ្នកលក់ គ្រាន់តែនិយាយថា៖ «តម្លៃវាពេញដល់ទៅ៥០ដុល្លារ តែថ្ងៃនេះ មាន Promotion ចេះតែលក់ឲ្យតែអស់ៗពីឃ្លាំងទៅ ឥឡូវមានអ្នកណាស្រលាញ់ទម្លាក់លេខមកខ្ញុំលក់ឲ្យតែ៣០ដុល្លារទេ គ្មានចំណេញសោះនិយាយមែន។»

២. ទិញអស់ចាប់ពី៥០ដុល្លារឡើងទៅទទួលបានកាតសមាជិកបញ្ចុះតម្លៃ៥ដុល្លារ ពេលទិញលើកក្រោយ

ដោយឡែកយុវតីវ័យធីតា មានជាប់សែស្រឡាយអ្នកលក់តាមអនឡាញដែរនេះ លើកឡើងថា វិធីសាស្ត្រនេះ គឺអាចញុះញង់អ្នកទិញឲ្យទិញកាន់តែច្រើន តែតាមពិតទៅក្នុងទំនិញមួយ អ្នកលក់ចំណេញជាងពាក់កណ្ដាលបាត់ទៅហើយ។ អ្នកទិញចង់បានកាតបញ្ចុះតម្លៃចេះតែខំទិញតាម តែតាមពិតតម្លៃបញ្ចុះ៥ដុល្លារនោះ គឺបូកបញ្ចូលជាមួយតម្លៃដែលត្រូវលក់ចេញរួចជាស្រេចទៅហើយ។

៣. ទិញអស់ចាប់ពីប៉ុននេះប៉ុននោះនឹង Free ការដឹកជញ្ជូន

នេះជាល្បិចដ៏សាមញ្ញបំផុត ដើម្បីឲ្យអ្នកទិញ ហ៊ានជះលុយទិញទំនិញកាន់តែច្រើន ព្រោះចង់ចំណេញការដឹកជញ្ជូន។ ដូច្នេះទិញកាន់តែច្រើន អ្នកលក់ចំណេញកាន់តែច្រើន រីឯពាក្យថា Free ការដឹកជញ្ជូនមិនបានប៉ុនក្រចកនៃប្រាក់ចំណេញដែលលក់បាននោះផង។ ចំណែកឯថ្លៃដឹកជញ្ជូននោះ ក៏ជាប្រាក់ចំណេញមួយតង់ទៀតដែរ ព្រោះជាក់ស្ដែងទៅទោះបីមិនយកថ្លៃដឹកជញ្ជូន ក៏ចំណេញក្នុងតម្លៃទំនិញនោះបាត់ទៅហើយ។

រូបតំណាង

៤. ទិញមួយថែមមួយខ្ជិលឲ្យសល់ក្នុងស្តុកចេះតែលក់ៗឲ្យតែអស់ៗទៅ

អ្នកលក់ខ្លះរៀបរាប់មកដូចកម្សត់ខ្លាំង ចេះតែលក់ៗ ផលិតផលជិតអស់ពីស្តុក តែតាមពិតផលិតផលនៅឡើងណែនស្តុក។ តាមការលើកឡើងពីធីតា ប្រាប់ថា កាលមិនទាន់ free តម្លៃមួយ ១៥ដុល្លារ តែពេលថែមមួយទៀត តម្លៃដែលធ្លាប់តែ១៥ដុល្លារនោះ គឺទៅជា៣០ដុល្លារ។ ដូច្នេះមានន័យថាទិញម្ដង២ មិនមែនទិញ១បាន២ឡើយ។

៥. ផលិតផលយកពីប្រទេសនេះប្រទេសនោះ តែតាមពិតជជុះក្បាលគីបក៏មាន

ចំណែកលីកា វិញដែលធ្លាប់ជួបបទពិសោធន៍ផ្ទាល់តែម្ដងនិយាយថា ធ្លាប់ទិញតាមអនឡាញ គេថាផលិតផល Top Grade នាំចូលពីបារាំង អាល្លឺម៉ង់ តែពេលយកមកដល់ផ្ទះស្រាប់តែត្រូវបានអ្នកលក់ខោអាវក្នុងហាងម្នាក់ថា Top Grade ក្បាលគីបនៅអូឡាំពិកទម្លាក់ចេញពីបាវថ្មីៗទៅវិញ៕

ចុះចំណែកប្រិយមិត្តវិញ យល់ឃើញយ៉ាងណាដែរ អាចចូលរួមទាំងអស់គ្នាណា!!

អត្ថបទ៖ វឌ្ឍនៈ