ជំនឿផ្សេងៗទាំង ៧ ពីបុណ្យសែនព្រះខែរបស់ចិន ដែលជនជាតិអាស៊ីមួយចំនួនក៏ធ្វើតាម

2018-09-14 02:40:42
ចំនួនមតិ 0 | ចំនួនចែករំលែក 0

ចន្លោះមិនឃើញ

បុណ្យសែនព្រះខែគឺជាទំនៀមទម្លាប់មួយរបស់ប្រទេសចិន និងប្រទេសមួយចំនួនទៀតនៅអាស៊ី។ បុណ្យនេះក៏អាចហៅម្យ៉ាងទៀតថាបុណ្យពាក់កណ្ដាលរដូវស្លឹកឈើជ្រុះ ដែលជាព្រឹត្តិការណ៍ធំទី ២ សម្រាប់ប្រជាជនចិនបន្ទាប់ពីពិធីបុណ្យចូលឆ្នាំថ្មី។ ទាំងនេះគឺជាជំនឿផ្សេងៗទាក់ទងនឹងពិធីបុណ្យនេះដែលចិនតែងតែគោរពតាមជានិច្ច៖

១.បុណ្យនេះចំពេលដែលព្រះចន្ទភ្លឺបំផុត៖ ជនជាតិចិនមានជំនឿថា នៅថ្ងៃទី១៥ ខែ៨ រាប់តាមប្រតិទិនចន្ទគតិ គឺជាពេលដែលព្រះចន្ទរះភ្លឺធំបំផុត និងស្រស់ស្អាតបំផុតប្រចាំឆ្នាំ។ ហេតុនេះហើយពួកគេត្រូវជួបជុំគ្នាមើលទិដ្ឋភាពដ៏ស្អាតនេះ នឹងធ្វើការបួងសួងសុំក្ដីសុខ។

២.ជាពេលត្រូវមកជួបជុំគ្រួសារ៖ ប្រជាជនចិនត្រូវត្រឡប់ទៅលេងនៅស្រុកកំណើតវិញ មិនថាពួកគេនៅឆ្ងាយយ៉ាងណានោះទេ។

៣.រសជាតិផ្អែមនៃនំសែនព្រះខែ៖ វាតំណាងឲ្យភាពផ្អែមល្ហែមក្នុងគ្រួសារ និងភាពសប្បាយរីករាយ។

៤.ប្រជាជនឲ្យតម្លៃខ្លាំងលើនំសែនព្រះខែ៖ តម្លៃរបស់នំសែនព្រះខែអាចលើសពី ១០០០យ័ន (ប្រហែល ១៥០.១៣ ដុល្លារ)ទៅទៀត ហើយមានពេលខ្លះតម្លៃដល់ទៅពាន់ដុល្លារឯណោះ។ នេះដោយសារជនជាតិចិនមិនត្រឹមតែចង់បានរសជាតិឆ្ងាញ់ប៉ុណ្ណោះទេ តែក៏ចង់បានការតុបតែងយ៉ាងស្រស់ស្អាតផងដែរ។ នំសែនព្រះខែថ្លៃៗទាំងនោះអាចផ្សំពីគ្រឿងពិសេសៗដូចជា ព្រុយត្រីឆ្លាម ខ្យងសមុទ្រ យិនសិន ឬទឹកមាត់ត្រចៀកកាំជាដើម ហើយថែមទាំងមានការតុបតែងប្រអប់ធ្វើពីមាស ឬប្រាក់ទៀតផង។ ពួកគេក៏ចូលចិត្តទិញនំជាអំណោយជូនមិត្តភក្ដិ ឬសមាជិកគ្រួសារដែរ។

៥.នំសែនព្រះខែមានរាងមូល៖ វាជាតំណាងនៃការជួបជុំរបស់គ្រួសារ ឬជាតំណាងនៃព្រះខែដែលពេញវង់នៅលើមេឃ។

៦.នំកាន់តែធំកាន់តែល្អ៖ ជនជាតិចិនខ្លះមានជំនឿថា នំសែនព្រះខែកាត់តែធំគឺង៉ូវហេងចូលកាន់តែច្រើន។ ហេតុនេះគេទិញ ឬធ្វើនំកាន់តែធំពីមួយឆ្នាំទៅមួយឆ្នាំដែលមានពេលខ្លះវាធំជាគ្រែគេងរបស់អ្នកទៅទៀត។ វាបង្ហាញពីការសម្បូរសប្បាយពីមួយឆ្នាំទៅមួយឆ្នាំ។

៧.ព្រះចន្ទកាន់តែស្រស់ស្អាតពេលមើលនៅលើភ្នំ ឬទៅតំបន់បឹង៖ នៅប្រទេសចិន ប្រជាជនចូលចិត្តរកកន្លែងណាដែលអាចមើលឃើញព្រះចន្ទកាត់តែច្បាស់ដូចជាលើដំបូល ឬលើកំពូលភ្នំជាដើម។កន្លែងទាំងនេះត្រូវបានចាត់ទុកថាជាកន្លែងដ៏ពិសេសដើម្បីរីករាយពិធីសែនព្រះខែ។ អ្នកខ្លះទៀតក៏ទៅលំហែនៅតំបន់បឹងជាមួយមិត្តភក្ដិផងដែរ។

គេតែងប្រារព្ធឡើងនៅថ្ងៃទី១៥ ខែទី ៨ រាប់តាមប្រតិទិនចន្ទគតិ គឺចំពេលដែលព្រះចន្ទពេញបូរមី និងស្អាតបំផុត។ បើគិតតាមប្រតិទិនសុរិយគតិវិញ នៅឆ្នាំ ២០១៨ នេះ បុណ្យសែនព្រះខែត្រូវនឹងថ្ងៃទី ២៤ ខែកញ្ញា។ មានព្រេងនិទានជាច្រើនទាក់ទងនឹងពិធីនេះ តែរឿងមួយដែលពេញនិយមជាងគេគឺដំណើររឿងរបស់ប្ដីប្រពន្ធ ហូយី និង ឆាងអឺ។ បើចង់ដឹង ទស្សនាវីដេអូខាងក្រោម ដែលមានដំណើររឿងដូចតទៅ៖

អត្ថបទ៖ សុខណា

ពាក្យទាក់ទង