រដូវកាន់បិណ្ឌនេះ ភិក្ខុ១អង្គជូនសង្ឃដីកា ចំៗ រឿងធ្វើបុណ្យដោយបញ្ញា និងតាមសទ្ធា

2018-09-29 09:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របនឹងរដូវនៃពិធីកាន់បិណ្ឌ ដែលជាបុណ្យសាសនាដ៏ធំរបស់ប្រជាជនខ្មែរ ព្រះភិក្ខុ១ព្រះអង្គ បានជូនសង្ឃដីកា បកស្រាយជូនពុទ្ធបរិស័ទ ទាក់ទងនឹងការធ្វើបុណ្យដោយជ្រះថ្លា និងត្រឹមត្រូវតាមក្បួន តាមគម្ពីរព្រះពុទ្ធសាសនា។ នោះគឺការធ្វើបុណ្យដោយបញ្ញា តាមសទ្ធា មិនមែនចេះតែធ្វើតាមគ្នា ខុសក្បួន។

ព្រះអង្គក៏បានបន្តសង្ឃដីកាថា ការដែលយល់ខុស ក្រៅពីមិនបានបុណ្យ ក៏អាចកើតជាបញ្ហា ដូចជាការខ្ចីលុយគេមកធ្វើបុណ្យឲ្យធំដុំ ធ្វើឲ្យសៅហ្មងក្នុងចិត្ត និងឈានទៅជាប់បំណុល វ័ណ្ឌ ក ក៏មាន។

ព្រះភិក្ខុ ភិន វុទ្ធី ចៅអធិការ គង់នៅវត្តប្រាសាទនាងខ្មៅ ខេត្តតាកែវ បាននិមន្តចូលរួមក្នុងកម្មវិធីផ្សាយផ្ទាល់ពិសេស ទាក់ទងនឹងពិធីបុណ្យភ្ជុំបិណ្ឌ របស់ Sabay បានមានសង្ឃដីកាថា មិនថាពេលកាន់បិណ្ឌ ឬធ្វើបុណ្យអ្វីនោះទេ សូមកុំយល់ច្រឡំថា ការបំពេញបុណ្យទាល់តែមានលុយច្រើន ធ្វើបុណ្យឲ្យធំដុំ ទោះអត់លុយក៏ប្រឹងខ្ចីគេ ធ្វើឲ្យអធិកអធម នោះទេ។

រូបថត Screenshot ព្រះភិក្ខុ ភិន វុទ្ធី

ចំណុចនេះ ព្រះអង្គចង់សង្កត់ន័យថា ការធ្វើបុណ្យសំខាន់លើចិត្តដែលជ្រះថ្លា និងធ្វើតាមសទ្ធា ស្របនឹងជីវភាព លទ្ធភាពនៃពុទ្ធបរិស័ទ។

ព្រះភិក្ខុ បានបកស្រាយបន្ថែមថា ព្រះពុទ្ធអង្គទ្រង់មិនបានចែងថា ចង្ហាន់ ឬគ្រឿងប្រគេនព្រះសង្ឃទាល់តែជារបស់ប្រណិត មានតម្លៃថ្លៃៗ ទើបបានបុណ្យច្រើននោះទេ។ ការយល់បែបនេះជាការខុសឆ្គងធំមួយ ហើយថែមទាំងអាចនាំបញ្ហា ដល់ជីវភាពរស់នៅ ឬឈានទៅជាប់បំណុលគេ។ បែបនេះ គឺជាការធ្វើបុណ្យដោយមិនមានបញ្ញា ឬអាចហៅថា ចេះតែធ្វើតាមគេ។ បើជាអ្នកមាន គឺមិនអីទេ តែបើពុទ្ធបរិស័ទ មានជីវភាពខ្វះខាត គឺជាបញ្ហាហើយ។

ជាឧទាហរណ៍ ព្រះភិក្ខុ ភិន វុទ្ធី បានបន្តសង្ឃដីកាចំៗថា បើពុទ្ធបរិស័ទ ដែលគ្មានលទ្ធភាពទាល់តែសោះ ប៉ុន្តែចង់ធ្វើបុណ្យ អាចគ្រាន់តែចូលទៅកាន់ទីវត្តអារាមណា១ ដោយចិត្តជ្រះថ្លា រួចហើយជួយរៀបចំនានាដូចជា បោសសម្អាតបរិវេណ ជួយលាងចាន ឬរៀបចង្ហាន់ នោះហើយជាបុណ្យពិត ដែលកើតពីចិត្តដ៏ប្រពៃ។

រូបថត Screenshot ព្រះភិក្ខុ ភិន វុទ្ធី

មួយវិញទៀត បើអ្នកមានជីវភាពល្មមៗ ក៏អាចគ្រាន់តែរៀបចំទៅតាមសទ្ធា ដោយជាប្រណីវត្ថុ មានន័យថាបើជាម្ហូប គឺមិនសំដៅដល់ប្រភេទដែលថ្លៃៗ នោះទេ តែសំខាន់មានអនាម័យ មិនថាជាប្រហុកចិញ្រាំ ឬម្ហូបផ្សេងទៀត ដែលញាតិញោមអាចមានសទ្ធា និងលទ្ធភាពមិនមានកំណត់ឡើយ ។

អត្ថបទ៖ ពៅ រក្សា