FC Barcelona បាន​យក​ឈ្នះ​ Inter Milan ២​ទល់​នឹង​០​ក្នុង​ការ​ប្រកួត​ Champions League ពូល​B សប្ដាហ៍​ទី​៣​។

២​គ្រាប់​របស់​ក្រុម​យក្ស​កាតាឡាន់​ស៊ុត​បញ្ចូល​ទី​ដោយ​ Rafinha នាទី​៣២​ និង​​​ Jordi Alba នាទី​៨៣។​ យ៉ាង​ណា​ការ​ប្រកួត​យប់​មិញ​មាន​ការ​ចាប់​អារម្មណ៍​លើ​បច្ចេកទេស​បិទ​បាល់​មួយ​របស់​ខ្សែ​បម្រើ​ Inter Milan។

នៅ​ពេល​ Barcelona បាន​បាល់​ពិន័យ​ Free Kick ខ្សែ​ប្រយុទ្ធ​ Luis Suarez បាន​ប្រើ​បច្ចេកទេស​ទាត់​ក្រោម​រនាំង​សឹង​តែ​ជោគជ័យ​ទៅ​ហើយ​ប៉ុន្តែ​ត្រូវ​ Marcelo Brozovic ដឹង​ពី​ស្នៀត​នេះ​រួច​ហើយ​ផ្ដួល​ខ្លួន​ទៅ​រារាំង​បាល់​បាន​សម្រេច​ធ្វើ​ឲ្យ​បាល់​ខ្ទាត​ចេញ​ទៅ​ក្រៅ​ទីលាន។

ឆ្លង​កាត់​ជ័យជម្នះ​យប់​មិញ​​ Barcelona ពេល​នេះ​មាន​៩​ពិន្ទុ​ពី​៣​ប្រកួត​កន្លង​ទៅ​ស្ថិត​នៅ​កំពូល​តារាង​ស្របពេល​ Inter Milan ឈរ​លេខ​២​មាន​៦​ពិន្ទុ​ដដែល។ Spurs ដែល​ស្មើ​ PSV នោះ​នៅ​បាត​តារាង​មាន​១​ពិន្ទុ​ដូចគ្នា៕

ប្រភព៖ sportbible   ប្រែ​សម្រួល៖ វីរ័ត្ន