ឧកញ៉ា កែវ មុំ៖ លើវិថីជំនួញភាពជោគជ័យ និងបរាជ័យខុសគ្នាតែមួយជំហានប៉ុណ្ណោះ ដាច់ខាតកុំប្រហែសឲ្យសោះ

2019-05-28 03:32:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈរជើងរឹងមាំក្នុងវិស័យផលិតនំក្នុងស្រុកមិនមែនជារឿងងាយស្រួលឡើយ ពិសេសសម្រាប់ទីផ្សារកម្ពុជាដែលតូច ហើយពោរពេញដោយការប្រកួតប្រជែងពីផលិតផលនាំចូល។ ប៉ុន្តែសម្រាប់ក្រុមហ៊ុនផលិតនំស្រួយ លី លី របស់លោកស្រី កែវ មុំ មិនត្រឹមជាសហគ្រាសផលិតដើម្បីផ្គត់ផ្គង់ ក្នុងស្រុកប៉ុណ្ណោះទេ ថែមទាំងនាំចេញទៅ ក្រៅប្រទេសផងដែរ។

មុនទទួលបានជោគជ័យក្នុងជំនួញដូចបច្ចុប្បន្ន លោកស្រីបានហែរឆ្លងការលំបាកមិនតិចឡើយ ដូចជា បញ្ហាហិរញ្ញវត្ថុ ខ្វះទុន ការគ្រប់គ្រងបុគ្គលិកកម្មករ ការប្រើប្រាស់ម៉ាស៊ីន និងការធ្វើឲ្យទីផ្សារដើរ។

កើតនៅឆ្នាំ ១៩៧៥ ក្នុងត្រកូលអាជីវករនៅខេត្តតាកែវ លោកស្រី កែវ មុំ ដុះគំនិតរកស៊ីតាំងពីតូចៗមកម្ល៉េះ។ តែដោយសារជីវភាពមានការលំបាក អ្នកស្រីត្រូវបង្ខំចិត្តឈប់រៀនត្រឹមមធ្យមសិក្សា និងបានផ្ដើមអាជីពដំបូងជាអាជីវករលក់ដូរបន្តិចបន្តួចនៅផ្សារ ហើយក្រោយមកធ្វើការងារជាបុគ្គលិកផ្នែកលក់នៅក្រុមហ៊ុនភេសជ្ជៈសិង្ហបុរីមួយ។ ធ្វើជាបុគ្គលិកផ្នែកលក់នេះហើយជាឱកាសមួយ អាចឱ្យលោកស្រីបានសម្លឹងឃើញសក្ដានុពល តម្រូវការទីផ្សារកម្ពុជា។

ដោយមានការតាំងចិត្តចង់ចាប់ផ្ដើមអាជីវកម្មផ្ទាល់ខ្លួនស្រាប់ និងឱកាសហុចឲ្យផងនោះ ក្នុងឆ្នាំ ២០០២ លោកស្រីបានប្រឹងប្រែងប្រមូលទុនប្រមាណជាង ១០ម៉ឺនដុល្លារពីការលក់ផ្ទះ និងខ្ចីបងប្អូន មកវិនិយោគចាប់ផ្តើមសហគ្រាសផលិតនំស្រួយ លី លី ដែលកាលនោះមានបុគ្គលិកតែជាង ២០នាក់ប៉ុណ្ណោះ។

បច្ចុប្បន្នសហគ្រាសផលិតនំស្រួយលីលី បានផ្ដល់ការងារដល់បុគ្គលិកខ្មែរចំនួន ២៥០នាក់ ត្រូវបានមហាជនជាច្រើនស្គាល់ និងកំពុងនាំចេញទៅក្រៅប្រទេសជាច្រើន ដូចជា អាមេរិក កាណាដា អូស្ត្រាលី ថៃ ម៉ាឡេស៊ី និងកូរ៉េ។

បោះជំហានមកដល់ចំណុចនេះ លោកស្រី កែវ មុំ ពិតជាមានមោទនភាព តែលោកស្រីក៏នៅតែមិនប្រលែងដៃឡើយ ដោយលោកស្រីបានសង្កត់ធ្ងន់ថា ដរាបណាយើងនៅមានជីវិត ភាពជោគជ័យ និងបរាជ័យខុសគ្នាតែមួយជំហានប៉ុណ្ណោះ។ បើយើងធ្វេសប្រហែស អាចជួបនឹងភាពបរាជ័យភ្លាម។ អ្វីដែលយើងទទួលបាន លេចចេញពីការខិតខំប្រឹងប្រែងតាំងពីអត់មានអីទាន់តែសោះ យើងអាចធ្វើបានប៉ុណ្ណឹង ចុះឥឡូវយើងមានប៉ុណ្ណឹងហើយ យើងអាចធ្វើបានច្រើនទៀត ដូច្នេះយើងត្រូវប្រឹងបន្តទៀត។

លោកស្រីនឹងខិតខំប្រឹងប្រែង ដោយប្រុងប្រយ័ត្នជានិច្ច។ ដូចពាក្យចាស់ពោលថា ទោះបី ជិះសោះស្ទាត់ជំនាញយ៉ាងណា បើធ្វេសប្រហែសតែបន្តិចអាចនឹងមានគ្រោះថ្នាក់គ្រប់ពេល៕

ប្រភព៖ Sabay News ប្រែសម្រួល៖ លីដា