Torres និយាយថា រឿង២យ៉ាង Rafa Benitez ធ្វើឲ្យគាត់ក្លាយជាកំពូលខ្សែប្រយុទ្ធ

2019-06-22 00:02:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខែសីហា ឆ្នាំ២០០៧ Fernando Torres រកគ្រាប់បាល់ដំបូងរបស់ខ្លួននៅ Liverpool។ ឆ្លងកាត់ប្រមាណ ១០០ ប្រកួតស៊ុតបានជាង ៦០គ្រាប់ នៅហង្សក្រហម។ ខ្សែប្រយុទ្ធអេស្ប៉ាញមានពេលវេលាមាសរបស់ខ្លួននៅ Liverpool និង មានកំណត់ត្រាល្អជាងកីឡាករ Robbie Fowler, Michael Owen, Ian Rush, Kenny Dalglish ឬ Roger Hunt។

Torres ដែលទើបប្រកាសចូលនិវត្តន៍បាននិយាយថា Rafa Benitez គឺជាអ្នកដែលជម្រុញខ្លួនឲ្យក្លាយទៅជាកំពូលខ្សែប្រយុទ្ធល្អបំផុតម្នាក់របស់ពិភពលោក៖

១ ពេល Torres ស៊ុតចូលច្រើន Benitez ថាអតីតខ្សែប្រយុទ្ធ Liverpool លេងមិនល្អ៖

Torres បាននិយាយថា "នៅពេលដែលខ្ញុំបានជួប Rafa ខ្ញុំចាប់ផ្តើមយល់ពីតួនាទីគ្រូបង្វឹកមានសារសំខាន់ប៉ុណ្ណា"។

Torres ពន្យល់ថា Benitez មិនត្រឹមតែជាគ្រូបង្វឹកដែលដាក់ជម្រើស១១នាក់ដោយគិតពីប្រព័ន្ធ និង របៀបហ្វឹកហាត់ផ្សេងៗគ្នាអាស្រ័យគូបដិបក្ខប៉ុណ្ណោះទេ ប៉ុន្តែគ្រូបង្វឹករូបនេះតែងរៀបចំរួចជាស្រេចថាតើ កីឡាករណាជាអ្នករុញច្រានគូប្រកួត ហើយអ្នកណាជាអ្នកថែរក្សាទីលានរបស់ខ្លួន។

"នៅពេលដែលខ្ញុំស៊ុតបញ្ចូលទី២ ឬ ៣គ្រាប់ គាត់ប្រាប់ខ្ញុំថាខ្ញុំលេងមិនល្អសោះប្រកួតនោះ ព្រោះខ្ញុំមិនបានជួយអ្នកនៅក្រោម"។ Torres បាននិយាយ។

២ ក្នុងនាមជាខ្សែប្រយុទ្ធត្រូវចេះវិនិច្ឆ័យខ្សែការពារ ជាជាងឲ្យខ្សែការពារវិនិច្ឆ័យមកលើខ្លួន៖

Torres បាននិយាយថា "Rafa និយាយប្រាប់ខ្ញុំជាច្រើនអំពីចលនានៃរាងកាយរបស់ខ្ញុំ។ នៅពេលអ្នកញោចខ្លួនទៅឆ្វេង ឬ ស្តាំ អ្នកចំណេញពេល១វិនាទី អីចឹងប្រសិនបើអ្នកបានបាល់ភ្លាម អ្នកនឹងអាចរំកិលខ្លួនរបស់អ្នកចេញឆ្ងាយ [ពីខ្សែការពារ]"។

“វិធីដែលអ្នកឈរទល់មុខជាមួយខ្សែការពារ គឺត្រូវផ្តោតអំពីទីតាំងរបស់ពួកគេ និង ព្យាយាមស្មានចលនារបស់ពួកគេ។ ហើយចំណុចសំខាន់មួយទៀតដែលខ្ញុំបានរៀនពី Rafa គឺការលេងនៅជិតប្រអប់គ្រោះថ្នាក់ របៀបដែលយើងលេងពីក្រោយខ្នងខ្សែការពារក្នុងនាមជាខ្សែប្រយុទ្ធទោល។ ខ្ញុំមិនចាំបាច់មើលបាល់នោះទេ តែខ្ញុំអាចលេងដោយបត់បែនទៅតាមទីតាំងដែលខ្សែការពារឈរ ជាជាងព្យាយាមគ្រប់គ្រងបាល់ ឬ លេងសម្រុកពីក្រោម"។

ចំណុចនេះស្រដៀងទៅនឹងការលើកឡើងរបស់ Virgil van Dijk ដែលទម្លាយថាមូលហេតុដែលធ្វើឲ្យខ្លួនអាចបញ្ឈប់ខ្សែប្រយុទ្ធបាននោះ គឺតែងតែធ្វើឱ្យខ្សែប្រយុទ្ធត្រូវធ្វើការសម្រេចចិត្ត ហើយនោះជាពេលដែលគេព្យាយាមដណ្ដើមបាល់ចេញពីពួកគេ៕

អាន៖ Van Dijk ទម្លាយពីមូលហេតុដែលស្ទើរតែគ្មានកីឡាករណាអាចឆ្លងផុតពីរូបគេ

អាន៖ Salah បំបែកកំណត់ត្រា របស់ Torres នៅ Liverpool

ប្រភព៖ Four Four Two ប្រែសម្រួល៖ សុខ លាងហ៊ត