ក្រុមហ៊ុនចិនចំណាយជាង ៥ លានដុល្លារ បើកម៉ាត ២៤ ម៉ោង ជុំវិញភ្នំពេញ

2019-07-24 09:24:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសជិតខាងដូចជាសឹង្ហបុរី ម៉ាឡេស៊ីនិងថៃសុទ្ធតែមានមីនីម៉ាតដែលអាចឲ្យអតិថិជនចូលទៅរកសម្ភារប្រើប្រាស់ ម្ហូបអាហារបានទាន់ចិត្តទាន់ពេលវេលាបាន ២៤ ម៉ោងដោយតម្លៃសរម្យ។ ឯកម្ពុជាវិញ ទីផ្សារមីនីម៉ាតក៏កំពុងតែរីកដុះដាលគួរឲ្យកត់សម្គាល់មិនចាញ់ប្រទេសជិតខាងប៉ុន្មានដែរ ។

ជាក់ស្ដែង ក្នុងពេលត្រឹមតែមួយឆ្នាំចុងក្រោយនេះ Prince Supermarket ពង្រីកខ្លួនបានដល់ទៅ ៧ សាខារួចទៅហើយក្រោមចំនួនទឹកប្រាក់ប្រមាណជា ៥ លានដុល្លារសហរដ្ឋអាមេរិក។ ពិសេសជាងមីនីម៉ាតដទៃ Prince Supermarket សាខាទី ៧ នេះមានទំនិញលក់រាយប្រមាណ ៣ ០០០ មុខ ប្រមូលផ្ដុំទាំងទំនិញក្នុងស្រុកនិងនាំចូលពីបរទេស មិនតែប៉ុណ្ណោះថែមទាំងមានទទួលការបញ្ជាទិញតាមបណ្ដាញសង្គម និងសេវាកម្មដឹកជញ្ជូនដោយឥតគិតថ្លៃករណីអតិថិជនចំណាយចាប់ពី ១៥ ដុល្លារឡើងទៅទៀតផង។

“យើងគ្រោងនឹងពង្រីកឲ្យបាន ១០ សាខាក្នុងមួយឆ្នាំដើម្បីបម្រើសេចក្ដីត្រូវការរបស់អតិថិជនស្របតាមឱកាសទីផ្សារនាពេលបច្ចុប្បន្ន។” នេះបើតាមការលើកឡើងរបស់លោក ឈិន ចិពីង ថ្នាក់ដឹកនាំ Prince Supermarket ក្នុងឱកាសបើកសម្ពោធសាខាទី ៧ របស់ខ្លួននៅផ្លូវ ១៩៩ កែងផ្លូវ ៣៤៨ សង្កាត់ទួលស្វាយព្រៃ ខណ្ឌចម្ការមន ក្បែរវិទ្យាល័យទួលស្វាយព្រៃពីព្រឹកថ្ងៃ ២៤ កក្កដា ២០១៩នេះ។

បើតាមការបង្ហើបពីគម្រោងវិនិយោគរបស់ថ្នាក់ដឹកនាំ Prince Supermarket ថានឹងបន្តគម្រោងធំៗផ្សេងទៀតដូចជា Prince Fresh ក្នុងទំហំផ្ទៃដី ១ ៣០០ ម៉ែត្រការ៉េឡើងទៅ និងPrince Market ក្នុងទំហំចាប់ពី ២ ០០០ម៉ែត្រការ៉េឡើងទៅក្នុងពេលឆាប់ៗខាងមុខនេះទៀតផង៕