មកស្គាល់វាគ្មិនខ្លឹមៗ បង្ហាញមុខក្នុងមហាសន្និបាតលំដាប់ពិភពលោក Social Media Week នៅភ្នំពេញថ្ងៃទី ១

2019-11-15 08:54:59
ចំនួនមតិ 0 | ចំនួនចែករំលែក 0

ចន្លោះមិនឃើញ

Social Media Week គឺជាមហាសន្និបាតលំដាប់ពិភពលោកដែលប្រមូលផ្ដុំដោយវាគ្មិនជាអ្នកជំនាញបច្ចេកវិទ្យា និងបុគ្គលជោគជ័យល្បីៗប្រមាណជាង ១ ម៉ឺននាក់មកពីជុំវិញពិភពលោក ដើម្បីចែករំលែកចំណេះដឹង ប្រសិទ្ធិភាពនៃការប្រើប្រាស់បណ្តាញសង្គម ទីផ្សារឌីជីថល និងអត្ថប្រយោជន៍នៃការភ្ជាប់ទំនាក់ទំនងទៅកាន់ពិភពលោក។

មហាសន្និបាតលំដាប់ពិភពលោកនេះបានមកដល់កម្ពុជាជាលើកដំបូង ដែលជាការរៀបចំឡើងដោយក្រុមហ៊ុន VR Event Planner Co., Ltd ជាក្រុមហ៊ុនរៀបចំគម្រោង និងកម្មវិធីឈានមុខនៅកម្ពុជា ដែលកម្មវិធីនឹងប្រព្រឹត្តទៅរយៈពេល ២ ថ្ងៃ ពោលនៅថ្ងៃទី ១៦ ខែវិច្ឆិកា នៅមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC) និងថ្ងៃទី ១៧ ខែវិច្ឆិកា នៅផ្សារទំនើប អ៊ីអន សែនសុខ។

សម្រាប់ថ្ងៃទី ១ នឹងមានការចូលរួមពីវាគ្មិនជាបុគ្គលបច្ចេកវិទ្យា និងបុគ្គលជោគជ័យដែលមានដូចជា ៖

លោក ស៊ុន ស៊ីហម៉ានិត អនុបណ្ឌិតគ្រប់គ្រងអាជីវកម្មអន្តរជាតិ ជានាយកប្រតិបត្តិក្រុមហ៊ុន TSD - Technology Solution Development។

លោក ប៊ុន ផាក នាយកប្រតិបត្តិនៃ Camazoon និងស្ថាបនិកវិបសាយលក់ទំនិញ Phzar.com។

លោក ឈន់ សកល នាយកផ្នែកទីផ្សាររបស់ TrueMoney Cambodia។
កញ្ញា រិទ្ធី លំអរពេជ្រ ជាអ្នកមានជំនាញច្រើនក្នុងវិស័យភាពយន្ត ដូចជាអ្នកផលិតខ្សែភាពយន្ត អ្នកច្នៃប្រឌិតបែបវប្បធម៌ អ្នកបង្កើតកម្មវិធីមហោស្រព អ្នកផ្សព្វផ្សាយ និងអ្នកដឹកនាំរឿងជាដើម។

មហាសន្និបាត Social Media Week Phnom Penh នឹងរៀបចំឡើងក្រោមប្រធានបទ «ប្រព័ន្ធបណ្តាញសង្គម៖ គំនិត ឬ ឱកាស» (Social Media: Opinion or Opportunities) ពិភាក្សាអំពីនិន្នាការនៃការប្រើប្រាស់ប្រព័ន្ធបណ្តាញសង្គម និងគន្លឹះទាញយកអត្ថប្រយោជន៍ពីបណ្ដាញសង្គមឲ្យលើសពីការប្រើប្រាស់ក្នុងការទំនាក់ទំនងធម្មតា៕

អត្ថបទ៖ សុខហេង