បន្លែបែបស្រុកស្រែជាង២០០មុខនឹងត្រូវតាំងបង្ហាញក្នុងពិព័រណ៌ «បន្លែស្រុកស្រែ»
- 2019-12-06 02:08:15
- ចំនួនមតិ 0 | ចំនួនចែករំលែក 0
បន្លែបែបស្រុកស្រែជាង២០០មុខនឹងត្រូវតាំងបង្ហាញក្នុងពិព័រណ៌ «បន្លែស្រុកស្រែ»
ចន្លោះមិនឃើញ
បន្លែបែបស្រុកស្រែ និងធម្មជាតិជាច្រើនមុខដែលទំនងជាយុវជនជំនាន់ក្រោយមិនធ្លាប់បានឃើញ មិនធ្លាប់បានទទួលទាន ឬបានទទួលទានហើយតែមិនដឹងថាមានឈ្មោះអ្វីផងក៏ថាបាន។ ពីព័រណ៌បន្លែស្រុកស្រែ នឹងដាក់បង្ហាញបន្លែបែបស្រុកស្រែនេះជាង២០០មុខនៅសប្ដាហ៍ក្រោយ ដើម្បីជាការគាស់រំលើង និងបង្ហាញដល់សាធារណជនឲ្យដឹងនិងស្គាល់កាន់តែច្បាស់ពីបន្លែទាំងនេះ។
កញ្ញា មាស ដាណា ប្រធានផ្នែកផ្សព្វផ្សាយភោជនីដ្ឋានមាតុភូមិ ថ្លែងប្រាប់ Sabay ថាក្នុងការតាំងពិព័រណ៌នេះសាធារណជនអាចចូលរួមទស្សនាដោយមិនគិតថ្លៃ ហើយក្នុងឱកាសនោះក៏មានការចូលរួមពីតារាកំប្លែងអាយ៉ៃ លោក ព្រហ្ម ម៉ាញ និងរាតាល្បីៗក្នុងទសវត្សរ៍ឆ្នាំ១៩៨០ និង១៩៩០ ចូលរួមផងដែរ។ កញ្ញាបន្តថាបន្លែងធម្មជាតិ បែបស្រុកស្រែជាង២០០មុខនឹងត្រូវដាក់តាំងបង្ហាញក្នុងព្រឹត្តិការណ៍នេះ។
កញ្ញាឲ្យដឹងទៀតថា៖ «គោលបំណងគឺចង់ឲ្យអ្នកជំនាន់ថ្មីបានស្គាល់ពីប្រភេទបន្លែទាំងនេះ ដែលសឹងតែលែងមានវត្តមានទៅហើយ មានន័យថាយើងគាស់កកាយបន្លែខ្មែរយើង កុំឲ្យបាត់បង់ បង្ហាញពីអត្ថប្រយោជន៍»។
ភោជនីដ្ឋានមាតុភូមិ នឹងរៀបចំពិព័រណ៌បន្លែស្រុកស្រែ នៅព្រឹកថ្ងៃទី១២ ខែធ្នូ ឆ្នាំ២០១៩ នៅបាក់ខែ ផ្លូវជាតិលេខ៦អា ត្រង់ចំណុចស្ពានទី១០។ គោលបំណងនៃការរៀបចំពិព័រណ៌នេះគឺដើម្បីគាស់កកាយ ប្រមូលផ្តុំនូវបន្លែខ្មែរធម្មជាតិ បន្លែស្រុកស្រែ បន្លែជនបទ បន្លែកម្រតាមរដូវ គ្រប់ប្រភេទ ព្រមជាមួយសែស្រឡាយគ្រឿងផ្សំមុខម្ហូបប្រពៃណីខ្មែររាប់រយមុខ ដើម្បីបង្ហាញមហាជន ឲ្យបានដឹង ចងចាំ និងកត់ត្រាឡើងវិញ ព្រមទាំងការយល់ដឹងពីអត្ថប្រយោជន៍សំខាន់ៗដែលបុព្វបុរសដូនតាខ្មែរលំនាំទុកឲ្យ៕