ចេញដំណឹងអំពី Apple Glass រំពឹងថាមានតម្លៃចាប់ពី ៤៩៩ដុល្លារ

2020-05-20 02:13:27
ចំនួនមតិ 0 | ចំនួនចែករំលែក 0

ចន្លោះមិនឃើញ

Jon Prosser អ្នកចែកចាយដំណឹងលេចធ្លាយរបស់ Apple ដ៏ល្បីឈ្មោះម្នាក់ បានបញ្ចេញវីដេអូថ្មីមួយពិភាក្សាអំពីវ៉ែនតា AR វៃឆ្លាតរបស់ Apple ដែលបានលេចឮដំណឹងជាច្រើនឆ្នាំមកហើយ។

Jon បានធ្វើការប៉ាន់ស្មានថាការដំណើរនៃទិន្នន័យទាំងអស់នឹងកើតមានលើ iPhone ដែលតភ្ជាប់ជាមួយវ៉ែនតានេះដោយមិនប្រើខ្សែ (Wireless) ដែលនេះស្រដៀងនឹងការទំនាក់ទំនងគ្នារវាង Apple Watch និង iPhone ដែរ។

Apple បានហៅវ៉ែនតានេះថា Apple Glass ដែលរំពឹងថាមានតម្លៃលក់រាយ ៤៩៩ដុល្លារនៅសហរដ្ឋអាមេរិក ដោយកាលបរិច្ឆេទនៃការប្រកាសចេញដើមឡើយគ្រោងធ្វើនៅត្រីមាសទី ៤ ឆ្នាំ ២០២០ ឬត្រីមាសទី ១ ឆ្នាំ ២០២១ ប៉ុន្តែការផ្ទុះនៃជំងឺកូវីដ១៩ ប្រហែលជាប៉ះពាល់ដល់កាលបរិច្ឆេទប្រកាសចេញ។

Jon បានអះអាងថាបានឃើញនូវផលិតផលគំរូនៃ Apple Glass ដែលវាមានតួខ្លួនធ្វើពីប្លាស្ទិក។ នៅផ្នែកខាងស្ដាំនៃវ៉ែនតាគឺមានបង្កប់នូវ Sensor LiDAR ដែលមានប្រើលើ iPad Pro ស៊េរីថ្មី ហើយលើផលិតផលគំរូគេមិនឃើញមានបំពាក់កាមេរ៉ានោះទេ។

ចំពោះ User Interface របស់វាត្រូវបានគេឲ្យឈ្មោះថា Starboard។ ព័ត៌មាននឹងមានបង្ហាញនៅលើកញ្ចក់វ៉ែនតាទាំងពីរ ហើយ UI អាចបញ្ជាបានដោយចុចលើកញ្ចក់វ៉ែនតា ឬបញ្ហាដោយកាយវិការបានផងដែរ។

ចចាមអារ៉ាមអំពី Apple Glass នេះគឺលេចឮជាច្រើនឆ្នាំមកហើយ ដោយជាមួយគ្នានោះក៏មានលេចឮដំណឹងអំពីការបង្កើតឧបករណ៍ពាក់ក្បាល (Headset) ប្រើបច្ចេកវិទ្យា AR និង VR ផងដែរ។ អ្នកវិភាគជាច្រើនបានព្យាករណ៍អំពីការប្រកាសចេញ Apple Glass ឆាប់បំផុតគឺនៅឆ្នាំ ២០២០ ហើយមានមួយចំនួនព្យាករណ៍ថាប្រកាសចេញនៅឆ្នាំ ២០២១ និង ២០២២៕

ប្រភព៖ AppleInsider ប្រែសម្រួល៖ សុខហេង