១០ចំណុចបង្ហាញថាអ្នកកំពុងគិតច្រើនជ្រុល អាចឈានទៅមានជំងឺផ្លូវចិត្ត និងដំណោះស្រាយ

2020-10-04 01:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ហាផ្លូវចិត្តជាជំងឺមួយដែលមនុស្សម្នាក់ៗងាយនឹងកើតមាន មិនថានៅក្នុងវ័យណានោះទេ ជាពិសេស គឺយុវជនក្នុងវ័យជំទង់ ដែលអ័រម៉ូនកំពុងប្រែប្រួលខ្លាំង ។ បញ្ហាដែលអាចធ្វើឲ្យអ្នកឈានទៅដល់មានបញ្ហាផ្លូវចិត្តនោះ អាចមកពី សម្ពាធគ្រួសារ ការសិក្សា ការងារ សង្គម និង ស្នេហា។

ការគិតច្រើនអំពីបញ្ហាទាំងនោះអាចធ្វើឲ្យអ្នកមានសភាពដូចជាមនុស្សឈឺ ញុំាអីមិនឆ្ងាញ់ ស្គមស្គាំង គេងមិនលក់ ខួរក្បាលពោរពេញទៅដោយស្រមោលខ្មៅ ហើយអាចធ្លាក់ខ្លួនក្លាយជាមនុស្សមានជំងឺផ្លូវចិត្ត ឬ បាក់ទឹកចិត្ត មួយរំពេច។

ដើម្បីព្យាយាមទាញខ្លួនឯងចេញពីពិភពដ៏ងងឹតសូន្យបែបនេះ អ្នកត្រូវដឹងអំពីសញ្ញាដែលបង្ហាញថាអ្នកកំពុងតែគិតច្រើនជ្រុល ដែលមានដូចជា៖

១. អ្នកច្រើនតែបារម្ភពីរឿងអ្វីដែលអ្នកមិនអាចគ្រប់គ្រងបាន៖ អ្នកមិនអាចដាក់ចុះនូវរឿងមួយចំនួន ទោះបីរឿងនោះមិនអាចដោះស្រាយបាន ឬមិនមែនកើតឡើងដោយសារតែអ្នក ក៏អ្នកមិនព្រមឈប់គិតដែរ។ ហើយទាយបញ្ហាទាំងអស់មកមកដាក់សម្ពាធលើខ្លួនឯង។

២. អ្នកតែងតែប្រៀបធៀបខ្លួនឯង ជាមួយអ្នកដទៃ៖ បច្ចុប្បន្ន មនុស្សចូលចិត្តដ្រាម៉ា ឬ អួតបង្ហាញរឿងស្នេហា ជីវិតភាពជោគជ័យខ្លួនតាមបណ្ដាញសង្គម។ ហើយពេលអ្នកមើលឃើញរឿងទាំងនោះ អ្នកតែងយកវាមកប្រៀបធៀបនឹងជីវិតខ្លួនឯង ហើយដាក់សម្ពាធខ្លួនថាហេតុអ្វីមិនបានដូចគេជាដើម។

៣. អ្នកតែងតែរំលឹកពីកំហុសខ្លួនឯង៖ អ្នកមិនអាចលើកលែង សូម្បីតែកំហុសខ្លួនឯងធ្វើខុស ទោះបីជារឿងនោះបានកន្លងហួសយូរយ៉ាងណាក៏ដោយ។

៤. អ្នកមិនអាចភ្លេចពីរឿងដែលអ្នកធ្លាប់ខ្មាសគេ៖ វាជារឿងអាម៉ាស់ដែលអ្នកធ្លាប់ខ្មាសគកណ្តាលចំណោម តែវាបានកើតឡើង និងហួសអស់ទៅហើយតាមពេលវេលា ប៉ុន្តែខួរក្បាលអ្នកមិនព្រមឈប់គិតពីរឿងនោះទាល់តែសោះ។

៥. អ្នកតែងតែសួរខ្លួនឯងថាបើសិនជា៖ បើសិនរឿងនេះវាកើតឡើងពេលនោះ បើសិនពេលនោះអ្នកធ្វើបែបនេះ អណ្ដែតពេញខួរក្បាលរបស់អ្នក ហើយគ្មានច្រកចេញឡើយ។

៦. អ្នកមានបញ្ហាគេងមិនលក់៖ ទោះបីជាម៉ាស៊ីនក៏ត្រូវការពេលសម្រាកដែរ តែខួរក្បាលអ្នកមិនព្រមឈប់គិតឡើយ ទើបធ្វើឲ្យអ្នកគេងមិនលក់។

៧. អ្នកតែងចង់នៅម្នាក់ឯងក្នុងបន្ទប់ងងឹត៖ ពេលពិបាកចិត្តខ្លាំងអ្នកមិនចង់ឲ្យគេឃើញអ្នកឡើយដើម្បីកុំឲ្យគេសួរនាំច្រើន ថាអ្នកមានបញ្ហាអ្វី ឬ លួងអ្នកជាដើម។ ដូច្នេះអ្នកច្បាស់ជាសម្ងំក្នុងបន្ទប់មិនចេញក្រៅ ហើយបិទភ្លើងដើម្បីឲ្យអ្នកផ្ទះយល់ថាអ្នកមិននៅក្នុងបន្ទប់។

៨. គិតអំពីសម្ដីអ្នកដទៃ៖ ទោះបីជារឿងដែលអ្នកដទៃបាននិយាយ មិនបានប៉ះពាល់ ឬនិយាយពីអ្នក ក៏អ្នកនៅតែគិតអំពីសម្តីទាំងនោះ។

៩. គិតអំពីសម្ដី ឬទង្វើអ្នកដទៃទោះបីជាអ្នកមិនចូលចិត្តក៏ដោយ៖ អ្នកប្រមូលគ្រប់រឿងមកគិត ទោះបីជាពេលខ្លះសម្ដី ឬកាយវិការនោះ មិនសំដៅលើអ្នកក៏ដោយ។

១០. គិតអំពីរឿងអតីត និងអនាគត៖ អ្នកនៅតែគិតអំពីអ្វីដែលបានកើតឡើង ហើយបារម្ភអំពីអ្វីដែលមិនទាន់កើតឡើង រហូតដល់ភ្លេចយកចិត្តទុកដាក់រឿងដែលកំពុងកើតឡើងនៅពេលបច្ចុប្បន្ន។

អ្នកណាក៏មានសម្ពាធ អ្នកណាក៏មានបញ្ហាដែរ គ្រាន់តែពួកគេចេះរកវិធីទប់ទល់ និងមិនធ្វើឲ្យខ្លួនឯងធ្លាក់ក្នុងការគិតដ៏ងងឹតស្លុងប៉ុណ្ណោះ។ អ្នកមិនអាចប្រាប់ខ្លួនឯង ឲ្យបញ្ឈប់ការគិតច្រើនបានភ្លាមៗទេ តែអ្នកត្រូវព្យាយាមបន្ធូរការគិតរបស់អ្នកបន្តិចម្តងៗ តាមរយៈ ៖

១. ការហាត់ប្រាណ៖ អ្នកអាចបន្លប់ការគិតរបស់អ្នកមកធ្វើសកម្មភាពហាត់ប្រាណ ឬលេងកីឡា ព្រោះការហាត់ប្រាណ ដូចជាធ្វើយូហ្គា ហែលទឹក ធាក់កង់ ឬ វាយសី អាចបន្ថយសម្ពាធ បានមួយកម្រិតធំ។ ពេលអ្នកលេងកីឡា អ្នកតែងដាក់គោលដៅខ្លួនឯង ដូចជា ត្រូវលេងឲ្យបានមួយម៉ោង ឬ ត្រូវខំទាត់បាល់ឲ្យចូលទី ពេលអ្នកសម្រេចគោលដៅតូចៗនេះ អ្នកនឹងទទួលអារម្មណ៍ថារីករាយម្យ៉ាង។

២. និយាយរឿងក្នុងចិត្ត៖ អ្នកអាចរកមនុស្សដែលអ្នកទុកចិត្ត និយាយរឿងទុក្ខកង្វល់ និងរឿងក្នុងចិត្ត បញ្ចេញចោលនូវភាពស្មុគស្មាញទាំងឡាយ។

៣. ធ្វើឲ្យខ្លួនឯងរវល់នឹងការងារដែលមានប្រយោជន៍៖ មិនថាធ្វើការងារផ្ទះ ឬការងារអ្វីឡើយ ឲ្យតែអ្នកអាចបញ្ចេញកម្លាំង បញ្ចេញញើស អាចធ្វើឲ្យអ្នកធូរស្រាលមួយកម្រិត ហើយគេងលក់ស្រួលដែរ។

៤. ទៅដើរលេងលំហែអារម្មណ៍ ៖ មិនថាដើរលេងជាលក្ខណៈ មិត្តភក្ដិ ឬគ្រួសារ ឲ្យតែអ្នកគិតថាពួកគេ ធ្វើឲ្យអ្នកសប្បាយចិត្ត និងបន្ថយភាពតានតឹង អ្នកគួរឆ្លៀតពេលទៅបញ្ចេញចោលខ្លះ។

៥. រៀនហ្វឹកហាត់ការគ្រប់គ្រងកំហឹង ៖ អ្នកអាចធ្វើសមាធិ ដោយការធ្វើចិត្តឲ្យស្ងប់តែមួយកុំឲ្យបែកអារម្មណ៍ ឬ ក៏អាចគ្រាន់តែហ្វឹកហាត់គ្រប់គ្រងអារម្មណ៍ និងកំហឹងក្នុងខ្លួន។

៦. គិតដល់រឿងវិជ្ជមានឲ្យច្រើន ៖ រំពៃគិតដល់រឿងវិជ្ជមានជាច្រើនដែលបានកើតឡើងក្នុងជីវិតអ្នក , អ្នកមានគុណ ,មនុស្សដែលស្រលាញ់អ្នកជាដើម ដើម្បីស្វែងរកកម្លាំងចិត្តថ្មី ជម្នះស៊ូនឹងគ្រាការលំបាក កុំចុះចាញ់ឲ្យសោះ។

៧. គេងឲ្យគ្រប់គ្រាន់ ៖ អ្នកគួរកំណត់ម៉ោងចូលគេងឲ្យទៀងទាត់ គេងឲ្យបានយ៉ាងហោចណាស់ ៨ម៉ោងក្នុងមួយយប់។ ភ្ញាក់ពីព្រលឹម មើលថ្ងៃរះរាល់ព្រឹក អ្នកនឹងទទួលបានអារម្មណ៍ស្រស់ស្រាយជាចំពោះថ្ងៃថ្មី ។

៨. ញុំាអាហារដែលល្អចំពោះសុខភាព ៖ អាហារពាក់ព័ន្ធនឹងផ្លូវចិត្តខ្លាំងណាស់ ជាក់ស្តែងពេលអ្នកមិនសប្បាយចិត្ត បានញុំារបស់ឆ្ងាញ់ៗ ឬ ម្ហូបដែលអ្នកចូលចិត្ត នឹងជួយឲ្យអ្នកសប្បាយចិត្ត ឡើងវិញ។ តែដើម្បីសុខភាព អ្នកគួរជ្រើសរើសញុំាបន្លែ ឬ ផ្លែឈើឲ្យបានច្រើន។

អ្នកគួរគិតថា «ជីវិតជួបការលំបាកច្រើនហើយ កុំឲ្យធ្លាក់ខ្លួនឈឺទៀត» ដូច្នេះត្រូវយកចិត្តទុកដាក់ចំពោះរបបអាហារឲ្យមែនទែន៕

Manulife Cambodia គាំទ្រការស្រលាញ់សុខភាព

ប្រភព៖ Forbes សុភារម្យ

ពាក្យទាក់ទង