សហរដ្ឋអាម៉េរិកយល់ព្រមលក់អាវុធថ្មី តម្លៃជាង១ពាន់លានដុល្លារ ដល់កោះតៃវ៉ាន់

2020-10-22 03:00:06
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋបាលរបស់ប្រធានាធិបតីអាម៉េរិកលោក ដូណាល់ ត្រាំ បានយល់ព្រមលក់អាវុធទំនើប តម្លៃជាង១ពាន់លានដុល្លារទៅឱ្យកោះតៃវ៉ាន់ នៅក្នុងទង្វើមួយដែលនឹងធ្វើឱ្យចិនខឹងសម្បារ និងរឹតតែធ្វើឱ្យមានភាពតានតឹងកាន់តែខ្លាំងឡើងរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងប៉េកាំង ដែលមានជម្លោះខ្លាំងរួចទៅហើយអំពីបញ្ហាមួយចំនួនដូចជា បញ្ហាពាណិជ្ជកម្ម តំបន់ទីបេតិ៍ ក្រុងហុងកុង និងសមុទ្រចិនខាងត្បូង ។

រូបតំណាង (ទាហានតៃវ៉ាន់ធ្វើសមយុទ្ធអំឡុងពេលសមយុទ្ធមួយ/PHOTO: RITCHIE B. TONGO/EPA/SHUTTERSTOCK)

ក្រសួងការបរទេសអាម៉េរិកបានប្រកាសកាលពីថ្ងៃពុធថាទី២១តុលាខ្លួនបានផ្តល់ភ្លើងខៀវសម្រាប់ការលក់មីស៊ីលវាយប្រហារចេញពីដីចំនួន១៣៥ដើម គ្រឿងឧបករណ៍ដែលពាក់ព័ន្ធនិងការបណ្តុះបណ្តាលដល់តៃវ៉ាន់ដើម្បីបង្កើនសមត្ថភាពការពាររបស់ខ្លួន។

ក្រសួងការបរទេសអាម៉េរិកបាននិយាយនៅក្នុងសេចក្តីថ្លែងការណ៍មួយថាតម្លៃអាវុធទាំងនេះគឺជាង១ពាន់លានដុល្លារ។ មីស៊ីលទាំងនេះ ត្រូវបានផលិតដោយក្រុមហ៊ុន Boeing។

សេចក្តីថ្លែងការណ៍នេះបាននិយាយថា”ការលក់ដែលត្រូវបានស្នើឡើងនេះ បម្រើផលប្រយោជន៍សេដ្ឋកិច្ច និងសន្តិសុខជាតិរបស់សហរដ្ឋអាម៉េរិកតាមរយៈគាំទ្រការខំប្រឹងប្រែងបន្តរបស់អ្នកទទួលដើម្បីធ្វើឱ្យមានភាពទំនើបដល់កងទ័ពរបស់ខ្លួននិងរក្សាសមត្ថភាពការពារខ្លួនដែលអាចទុកចិត្តបាន។ ការលក់នេះ នឹងជួយធ្វើឱ្យប្រសើរឡើងនូវសន្តិសុខរបស់អ្នកទទួលនិងជួយរក្សាស្ថិរភាព នយោបាយ និង តុល្យភាពយោធានិង ការរីកចម្រើនសេដ្ឋកិច្ចនៅក្នុងតំបន់”៕

ប្រភព៖ រស្មីកម្ពុជា ប្រែសម្រួល៖សុខា/sn