ក្រុមហ៊ុន Honda បានប្រកាសចេញរថយន្ត CR-V Hybrid ស៊េរីឆ្នាំ២០២១ របស់ខ្លួនជាផ្លូវការ សម្រាប់ទីផ្សារចក្រភពអង់គ្លេស។

រថយន្ត Honda CR-V Hybrid ឆ្នាំ២០២១ នេះ នឹងមានលក់ចាប់ពីខែធ្នូតទៅ ជាមួយនឹងតម្លៃចាប់ពី ៣០ ១៨០ផោន ឬប្រហែល ៤០ ២២០ដុល្លារ។

SUV ខ្នាតកណ្តាលនេះមានបំពាក់ម៉ាស៊ីនសាំងចំណុះ ២,០លីត្រ i-VTEC ដំណើរការជាមួយអាគុយ Atkinson Cycle និង ម៉ូទ័រអគ្គិសនី២ ដែលបង្កើតកម្លាំងបានសរុប ១៨១សេះ ហើយប្រើប្រអប់លេខអូតូ។

វាអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ចំណាយពេល ៨,៨វិនាទី សម្រាប់ប្រភេទប៉ុងមួយវិលកង់មុខ និង ៩,២វិនាទី សម្រាប់ប្រភេទប៉ុងពីរ ហើយមានល្បឿនអតិបរមា ១៨០គីឡូម៉ែត្រក្នុងមួយម៉ោង។

រថយន្តនេះមានកម្រិតស៊ីសាំងជាមធ្យមត្រឹមតែ ៥,៨លីត្រ/ក្នុងក្រុង និង ៦,៧លីត្រ/ក្រៅក្រុង សម្រាប់ការបើកបរចម្ងាយ ១០០គីឡូម៉ែត្រ៕

ប្រភព៖ carscoops   ប្រែ​សម្រួល៖ សេង ឡុង