តើប្រិយមិត្តដឹងទេថាអ្វីទៅជាចំណុចខុសប្លែកគ្នារវាង បាល់ទះឆ្នេរខ្សាច់ និងបាល់ទះលើក្ដារ? ថ្ងៃនេះ Sabay សូមបង្ហាញជូនភាពខុសគ្នាខ្លះៗនៃប្រភេទកីឡាទាំងពីរដូចខាងក្រោម៖

**១-ទំហំខ្នាត**

• បាល់ទះឆ្នេរខ្សាច់មាន ទទឹង បណ្ដោយ កម្ពស់ ៨x១៦x២,៤៣ ម៉ែត្រ (ផ្នែកបុរស) គ្មានតំបន់ខ្សែបន្ទាត់វៃ ៣ម៉ែត្រ គ្មានកន្លែងវាយសេវ៉ា ៣ម៉ែត្រ

• បាល់ទះលើក្ដារមាន ទទឹង បណ្ដោយ កម្ពស់ ៩x១៨x២,៤៣ ម៉ែត្រ (ផ្នែកបុរស) ជាមួយ​តំបន់ខ្សែបន្ទាត់វៃ ៣ម៉ែត្រ និងមានកន្លែងវាយសេវ៉ា ៣ម៉ែត្រ

ហេតុអ្វីបានទីលានបាល់ទះឆ្នេរខ្សាច់តូចជាង? ពីព្រោះការលេងលើខ្សាច់ កាត់បន្ថយល្បឿន សំទុះ របស់កីឡាករច្រើន ដូច្នេះត្រូវតែតូចជាងបាល់ទះលើក្ដារ។

២-បាល់៖ បាល់លេងលើឆ្នេរខ្សាច់ ទន់ ស្រាល និងធំជាងបាល់ទះលេងលើក្ដារ។ ហេតុអ្វីបានស្រាលជាង? ពីព្រោះបាល់នេះ លេងនៅទីវាលលំហរ ងាយស្រួលសម្របទៅតាមអាកាសធាតុ។ ចំណែកបាល់លេងលើក្ដារ មានសភាពធ្ងន់ ហើយកីឡាករត្រូវប្រើកម្លាំងវៃខ្លាំងជាង។

៣-ចំនួនកីឡាករ៖ បាល់ទះលើក្ដារលេង៦នាក់ម្ខាង ប្ដូរគ្នាវិលតាមតួនាទី ចំណែកបាល់ទះឆ្នេរខ្សាច់លេងតែ២ស្មើប៉ុណ្ណោះ ​មានតែទីតាំងពីរ​គឺឆ្វេង-ស្ដាំ ហើយកីឡាករម្នាក់ អាចឡើងបាំងបានដូចគ្នា។

៤-ពិន្ទុ៖ បាល់ទះឆ្នេរខ្សាច់ តម្រូវឱ្យលេង៣សិត ដោយក្នុង១សិតមាន ២១គ្រាប់ ក្រុមណាឈ្នះពីរសិត គឺ​ឈ្នះដាច់។ បើឈ្នះ១សិតម្នាក់ នោះក្រុមទាំងពីរ ត្រូវលេងសិតទី៣ សិត ១៥គ្រាប់។ (បើពិន្ទុឡើង ២០ស្មើ គឺសិត ២៤គ្រាប់ដេញគ្នារហូត ចំណែកសិត១៥គ្រាប់គឺដូចគ្នា)

ដោយឡែកបាល់ទះលើក្ដារ ត្រូវលេង៥សិត ក្នុង១សិត២៥គ្រាប់។ អ្នកឈ្នះ៣សិត គឺ​ឈ្នះដាច់ ប៉ុន្តែបើក្រុមទាំងពីរឈ្នះ២សិតដូចគ្នា នោះការប្រកួតតម្រូវឱ្យលេងសិតទី៥ ជាសិតកាត់សេចក្ដី ហើយសិតទី៥នេះ លេងតែ១៥ពិន្ទុប៉ុណ្ណោះ។ (បើពិន្ទុឡើង ២៤ស្មើ គឺសិត ២៦គ្រាប់ដេញគ្នារហូត ចំណែកសិត ១៥គ្រាប់គឺដូចគ្នា)

៥-ការស្លៀកពាក់៖ បាល់ទះឆ្នេរខ្សាច់ បើផ្នែកបុរសអាចដោះអាវ ពាក់អាវវាលក្លៀក អាវដៃខ្លី ខោជើងខ្លី ឬឈុតប៊ីហ្គីនី (ស្ត្រី) តម្រូវទៅតាមអាកាសធាតុ និងត្រូវលេង បើទោះមានភ្លៀង ខ្យល់ ព្យុះ ក្ដៅខ្លាំងក៏ដោយ លើកលែងលេងមិនកើត។ ចំណែកបាល់ទះលើក្ដារ ស្លៀកពាក់ឯកសណ្ឋានក្លឹប ឬឯកសណ្ឋាន Sponsor ជាដើម។

៦-ចំនួនប៉ះ៖ បាល់ទះលើខ្សាច់ និងបាល់ទះលើក្ដារ លេងបីប៉ះដូចគ្នា ប៉ុន្តែខុសត្រង់ថាបាល់ទះឆ្នេរខ្សាច់ បើគូម្ខាងទៀតវៃប៉ះបាំងហើយ នោះគេនឹងគិតមួយប៉ះ ដូច្នេះនៅតែពីរប៉ះទៀតប៉ុណ្ណោះ។ រីឯកបាល់ទះលើក្ដារ គេមិនគិតឡើយ លេងបានធម្មតា ដូចប្រិយមិត្តធ្លាប់ដឹង៕

អត្ថបទ៖ អ៊ុំ សុភក្តិ