គ្រូ Man Utd ហាក់ដូចមិនចង់ឲ្យ Bruno ទៅលេងនៅជម្រើសជាតិព័រទុយហ្គាល់

2021-03-04 12:50:33
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Ole Gunnar Solskjaer បាននិយាយកាលពីពេលថ្មីៗនេះថា លោកចង់ឲ្យកីឡាករបង្គោលរបស់លោកដូចជា ខ្សែបម្រើព័រទុយហ្គាល់ Bruno Fernandes ទៅលេងឲ្យក្រុមជម្រើសជាតិ ប៉ះនឹងប្រទេសកំពុងវឹកវរខ្លាំងរឿងកូវីដ-១៩នោះទេ។

លោកបានលើកឡើងថា៖ " យើងនឹងមិនទាន់និយាយគ្នា រឿងឃាត់មិនឲ្យទៅលេងទេ គ្រាន់តែវាមមិនសមហេតុផលសោះ ដោយបាត់បង់កីឡាករ ១០ថ្ងៃលើរឿងធ្វើចត្តាឡីស័ក " ។

លោកបានបន្តថា៖ " យើងជាអ្នកឲ្យប្រាក់ខែទៅកីឡាករ ហើយតាមអ្វីដែលខ្ញុំយល់នោះគឺ ច្បាប់ FIFA មិនបញ្ជាក់ដាច់ណាត់ថា ក្លឹបតែឲ្យកីឡាករទៅលេងនៅជម្រើសជាតិនោះដែរ។ អញ្ចឹងហើយខ្ញុំគិតថា វានឹងរាងពិបាកបន្តិចហើយ ដែលបណ្ដោយឲ្យកីឡាកររបស់ក្លឹបទៅលេងនៅប្រទេសក្នុងបញ្ជីក្រហមនៃកូវីដ-១៩ " ។

លោកបានបន្ថែមថា៖ " ប្រាកដណាស់ ខ្ញុំចង់ទុក Bruno នៅលេងប៉ះនឹង Brighton ហើយយើងនឹងសង្ឃឹមថានឹងបានលេងប៉ះនឹងប្រកួតផ្សេងៗទៀត ក្រោយសម្រាកប្រកួតជម្រើសជាតិ " ។

ព័រទុយហ្គាល់នឹងលេងប៉ះ អាហ្សេបៃហ្សង់នៅថ្ងៃទី២៤ មីនា និងស៊ែបនៅថ្ងៃទី២៧។ ខណៈព័រទុយហ្គាល់ស្ថិតនៅក្នុងបញ្ជីក្រហមរបស់អង់គ្លេស ដូច្នេះហើយពេលមកវិញ Bruno នឹងត្រូវធ្វើចត្តាឡីស័ករយៈពេល ១០ថ្ងៃ មុននឹងប្រកបអាជីពធម្មតា៕

ប្រភព៖ Goal ប្រែសម្រួល៖ ហ៊ីម រស្មី