តាមការផ្សព្វផ្សាយពីក្រសួងបរិស្ថាន បានឲ្យដឹងថានៅតាមដែនជម្រកសត្វព្រៃ វត្តមានសត្វឆ្កែចចកចាប់ផ្តើមមានឃើញមកវិញ បន្ទាប់ពីបានរឹតបន្តឹងការនាំសត្វឆ្កែស្រុកចូលក្នុងព្រៃ។ ដោយហេតុថា ទឹកមាត់របស់សត្វឆ្កែស្រុកមានមេរោគច្រើនដែលធ្វើឱ្យឆ្លងជំងឺដល់សត្វឆ្កែចចក និងសត្វព្រៃផ្សេងទៀត ធ្វើឱ្យសត្វព្រៃស្លាប់ បន្ថែមពីលើការលួចប្រមាញ់សត្វដោយខុសច្បាប់ពីព្រានព្រៃ។

ឆ្កែចចកមានរូបរាងស្រដៀងនឹងឆ្កែស្រុកដែរ ប៉ុន្តែតូចជាងឆ្កែព្រៃ ហើយលក្ខណៈពណ៌មានលាយឡំជាមួយប្រផេះ និងត្នោត។ ចុងកន្ទុយមានលក្ខណៈសំពោងភ្ជាប់ជាមួយរោមពណ៌ក្រម៉ៅ។ វាមានកន្ទុយត្រង់មិនខ្វៀនដូនកន្ទុយឆ្កែស្រុកទេ។ ចំណីអាហាររបស់ឆ្កែចចកមានដូចជា៖ រុក្ខជាតិ ពពួកឈ្លូស ប្រើស រមាំង សត្វស្លាប ល្មូន ពពួកជលថនិកសត្វ ព្រមទាំងសាកសពសត្វស្អុយរលួយ និងចំណីដែលសន្សល់ទុកពីសត្វដទៃ៕

ប្រភព៖ អង្គការ WCS Cambodia