ស្ដេចវីយោឡុង អ៊ុំ ដរ៉ា យក មាស ហុកសេង ជាគ្រូមុនលោកបណ្ដុះបានអ្នកសិល្បៈល្អៗជាច្រើនជំនាន់

2021-07-02 06:32:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាទូទៅអ្នកនិពន្ធ និងតន្ត្រីករខ្មែរ បើទោះបីជាមានទឹកដៃល្អកម្រិតណាក៏នៅមិនសូវល្បីខ្ទរខ្ទារដូចតារាចម្រៀង ឬតារាសម្ដែងឡើយ។ តួយ៉ាងកវីនិពន្ធ និងជាសាស្ត្រាចារ្យម្នាក់ គឺលោក អ៊ុំ ដរ៉ា ដែលគេប្រសិទ្ធិនាមថា"ស្ដេចវីយោឡុង" ធ្លាប់និពន្ធទំនុកច្រៀង និងភ្លេងឲ្យអធិរាជសំឡេងមាស ស៊ី សាមុត និងរាជិនីសំឡេងមាស រស់ សេរីសុទ្ធា ច្រៀងនោះក៏មានក្មេងជំនាន់ក្រោយៗមិនសូវស្គាល់ដែរ តែយ៉ាងហោចណាស់គេក៏ដឹងពីភាពល្បីល្បាញពីវិស័យសិល្បៈក្នុងទសវត្ស៦០ និងដើមទសវត្ស៧០ដែរ។

ដើម្បីទុកជាការចងចាំ និងរំលឹកឡើងវិញនូវអនុស្សាវរីយ៍របស់កវីនិពន្ធ អ៊ុំ ដរ៉ា ថ្ងៃនេះ Sabay សូមលើកយកជីវប្រវត្តិសង្ខេប និងស្នាដៃសិល្បៈរបស់អ្នកសិល្បៈរូបនេះមកបង្ហាញជូនប្រិយមិត្តបានជ្រាប ដោយផ្អែកលើប្រភពទស្សនាវដ្ដីSovrin និងប្រភពផ្ទាល់ពីកូន-ប្រពន្ធរបស់កវីនិពន្ធរូបនេះ។

កាលបើនិយាយដល់ឈ្មោះ អ៊ុំ ដរ៉ា ប្រហែលជាមិនសូវមានក្មេងៗជំនាន់ក្រោយនេះស្គាល់ទេ ប៉ុន្តែហោចណាស់ក៏ពួកគេបានស្គាល់ពីភាពល្បីល្បាញ នៃវិស័យចម្រៀងខ្មែរកាលពីទសវត្សរ៍ទី៦០ និងដើមទសវត្សរ៍ទី៧០ដែរ។ លោក អ៊ុំ ដរ៉ា ដែលគិតត្រឹមឆ្នាំ២០២១ នេះមានវ័យ៨១ឆ្នាំ គឺជាកវីនិពន្ធបទចម្រៀងដ៏មានកេរ្តិ៍ឈ្មោះ១រូបក្នុងជំនាន់នោះ ហើយក៏ជាសិល្បករម្នាក់ ក្នុងចំណោមសិល្បករផ្នែកតែងនិពន្ធចម្រៀងតិចតួចបំផុតដែលបានរស់រានមានជីវិតពីរបបខ្មែរក្រហម។

លោក អ៊ុំ ដរ៉ា ដែលអ្នកខ្លះសរសេរច្រឡំថា អ៊ុំ តារា ឬ អ៊ុំ ដារ៉ា កើតនៅថ្ងៃទី០៦ ខែមិថុនា ឆ្នាំ១៩៤០ នៅឃុំពាមប្រធ្នោះ ស្រុកកោះសូទិន ខេត្តកំពង់ចាម។ លោកមានឧបនិស្ស័យផ្នែកកូតវីយោឡុង ទើបលោកបានរៀនពីគ្រូភ្លេងដ៏ល្បីម្នាក់នៅជំនាន់នោះឈ្មោះ កែវ មុខក្រាត នៅសាលាឯកជនមួយក្នុងទីក្រុងភ្នំពេញ។

ក្រោយមកលោកបានចូលបម្រើការងារនៅសាលាល្ខោនជាតិក្នុងតួនាទីជាអ្នកនិពន្ធបទចម្រៀងបញ្ចូលទៅក្នុងល្ខោន និយាយរបស់ស្ថានីយវិទ្យុជាតិកម្ពុជា។ ទន្ទឹមគ្នានោះ លោកក៏ជាសាស្ត្រាចារ្យផ្នែកនិពន្ធចម្រៀងនៅទីនោះដែរ។ គ្រានោះហើយដែលលោកមានទំនាក់ទំនងការងារជាមួយរៀមច្បងសិល្បករល្បីៗផ្នែកល្ខោន និងដូរ្យតន្ត្រីដូចជា៖ លោកសាស្ត្រាចារ្យ ហង្ស ធុនហាក់ ពៅ យូឡេង មែរ ប៊ុន និងលោក មាស ហុកសេង ម្ចាស់បទ"លលកញីឈ្មោល" ហើយលោកក៏ជំនាញនិពន្ធទំនុកច្រៀង និងបទភ្លេង ពីលោក មាស ហុកសេង ចាប់តាំងពីពេលនោះមក។

មុនរបបខ្មែរក្រហមចូលមកដល់ លោកបានតែងនិពន្ធបទចម្រៀងល្បីៗជាច្រើនបទថតដាក់កាស្សែតឲ្យតារា ចម្រៀងស្រីប្រុសល្បីឈ្មោះមានជាអាទិ៍ អធិរាជសំឡេងមាស ស៊ីន ស៊ីសាមុត រាជិនីសំឡេងមាស រស់ សេរីសុទ្ធា និងលោក អ៊ឹង ណារី រួមមាន៖បទ"ថ្ងៃណាមានសង្ឃឹម ឬអស់សង្ឃឹម" បទ"រូបអូនហ្នឹងហើយ" បទ"ឈប់ស្រឡាញ់អូនទៅ" បទ" ស្រឡាញ់អូនដល់ណា" បទ"ចាស់ជូរអែម" បទ"ស្ដាយក្លិនស្ដាយក្លែប" និងបទ"ចម្រៀងស្នេហា"ជាដើម។

ក្នុងរបបខ្មែរក្រហមចន្លោះពីឆ្នាំ១៩៧៥ ដល់ឆ្នាំ១៩៧៩ លោកត្រូវបានគេជម្លៀសទៅរស់នៅឃុំព្រែកក្របៅ ស្រុកខ្សាច់កណ្ដាល ខេត្តកណ្ដាល។ ក្រោយបែករបបខ្មែរក្រហមភ្លាម លោកបានចាកចេញទៅរស់នៅជំរំសាយធូ ទឹកដីជាយដែនថៃ ហើយបានបន្ត អាជីពជាអ្នកនិពន្ធបទចម្រៀង និង តន្ត្រីករវីយោឡុងនៅទីនោះរួមជាមួយសិល្បករខ្មែរដទៃទៀតក្នុងក្រុមតន្ត្រី បន្ទាយ អំពិល រហូតដល់ឆ្នាំ ១៩៩៣។ បន្ទាប់មក លោកបានវិលត្រឡប់មកទីក្រុងភ្នំពេញវិញ ហើយនិពន្ធបទចម្រៀងរាប់សិបបទ ឲ្យក្រសួងការពារជាតិ(កងពលតូចលេខ៧០) និង ក្រសួងឃោសនាការរហូតដល់ចូលនិវត្តន៍ក្នុងឆ្នាំ២០០០។

មុនចូលនិវត្តន៍លោកក៏បានជួយបណ្ដុះបណ្ដាលអ្នកចម្រៀងមួយចំនួនរហូតមានឈ្មោះបោះសំឡេងក្នុងពិភពសិល្បៈខ្មែរដូចជា លោក ឡេង ប៊ុនណាត អ្នកនាង គីង សូរិយា អ្នកនាង ឈួន សុវណ្ណឆៃ និង អ្នកនាង ផាន់ ណាវី ជាដើម។

លោក អ៊ុំ ដរ៉ា ដែលគិតត្រឹមឆ្នាំ២០២១ នេះ មានអាយុ៨១ឆ្នាំ កំពុងតែស្ថិតនៅក្នុងវ័យជរា ហើយលោកកាន់តែទ្រុឌទ្រោមខ្លាំង បន្ទាប់ពីលោកជួបគ្រោះថ្នាក់ចរាចរណ៍ចំនួនពីរលើកកាលពីជាង១០ឆ្នាំមុន។ កាលណោះបើទោះបីជាលោកចូលនិវត្ដន៍ទៅហើយក្ដីក៏លោកនៅតែទៅបង្រៀន និងប្រឡូកក្នុងវិស័យសិល្បៈជារើយៗដែរ តែក្រោយពីលោកជួបគ្រោះថ្នាក់ទាំងពីលើកនោះ ទើបបោះបង់វាចោលទាំងស្រុងតែម្ដងដោយឆ្អឹងត្រគាក និងឆ្អឹងជើងធ្វើទុក្ខខ្លាំង។

នៅក្នុងបទសម្ភាសន៍ខ្លីមួយរវាងកូនប្រុសលោក អ៊ុំ ដរ៉ា គឺលោក អ៊ុំ ភារុណ ជាមួយSabay នៅរសៀលថ្ងៃទី២ ខែមិថុនា ឆ្នាំ២០២១ ឲ្យដឹងថា សព្វថ្ងៃឪពុករបស់លោកកំពុងរស់នៅសង្កាត់អូរបែកក្អម ខណ្ឌសែនសុខ រាជធានីភ្នំពេញ ជាមួយរូបលោក ប្អូនស្រី និងម្ដាយរបស់លោក។ រីឯស្ថានភាពសុខភាពរបស់លោក អ៊ុំ ដរ៉ា វិញ គឺលោកនៅអាចហូបបានធម្មតា តែលោកពិបាកក្រោក ឬសូម្បីតែដើរកាន់ឈើច្រត់ក្នុងចម្ងាយជិតៗក្ដីក៏ទាល់តែមានអ្នកចាំជួយទប់គាត់៕

អត្ថបទ៖ ជិន សុភ័ក្ដ្រ