ពេលប៉ះ Tiger យ៉ាទី មិនអាចរក្សា Clean Sheet ដូចការចង់បានឡើយ
- 2021-07-21 07:03:01
- ចំនួនមតិ 0 | ចំនួនចែករំលែក 0
ពេលប៉ះ Tiger យ៉ាទី មិនអាចរក្សា Clean Sheet ដូចការចង់បានឡើយ
ចន្លោះមិនឃើញ
ក្នុងជំនួបសប្ដាហ៍ទី៩ នៃការប្រកួតលីគកំពូលកម្ពុជាទល់នឹងម្ចាស់ផ្ទះអង្គរថាយហ្គឺរ កាលពីម្សិលមិញ អ្នកចាំទីចាស់វស្សា ស៊ូ យ៉ាទី បានរបូតមួយគ្រាប់ទៀត ជាហេតុធ្វើឱ្យគេមិនអាចរក្សា Clean Sheet ដូចការចង់បានឡើយ។
ដំបូងឡើយអតីតសមាជិកក្រុមបឹងកេតបានសង្ឃឹមអាចធ្វើបាន បើទោះបីដឹងថាក្រុមថាយហ្គឺរកំពុងឡើងជើង និងបានឈ្នះលើក្រុមខ្លាំងៗដូចជាព្រះខ័នរាជស្វាយរៀង បឹងកេតក្ដី និងកំពុងឈរកំពូលតារាងពិន្ទុក្ដី។
អតីតអ្នកចាំទីភ្នំពេញក្រោនបានបញ្ជាក់បែបនេះ ៖«គិតថាអាចដែរតែដល់ពេលទៅវាទៅជាបែបនេះវិញ វាមានធ្លាយមួយគ្រាប់ ចឹងមានអារម្មណ៍សោកស្ដាយដែរ តែសំខាន់ឱ្យតែក្រុមបានជ័យជម្នះ មានអារម្មណ៍សប្បាយចិត្ត មិនចាច់ថា Clean Sheet ក៏បាន»។
ទោះបីជាយ៉ាងណាយ៉ាទីប្រាប់ថា គេនឹងព្យាយាមធ្វើឱ្យបាន Clean Sheet នៅប្រកួតក្រោយៗ ដើម្បីឱ្យក្រុមមានស្ថិតិល្អ ព្រោះការរបូតគ្រាប់បាល់ច្រើនក៏មិនល្អសម្រាប់ក្រុមដែរ។ ឆ្លងកាត់ ៦ ប្រកួត ២០ នាទីកន្លងមក អតីតជម្រើសជាតិកម្ពុជារូបនេះ បានការពារមិនឱ្យមានគ្រាប់បាល់ចូលទីបានតែម្ដងគត់ ក្នុងជំនួបរវាងណាហ្គាវើលដ៍ឈ្នះប៉ូលិស ៤-០។
កាលពីរសៀលថ្ងៃទី២០ ខែកក្ដដា ឆ្នាំ២០២១ ក្រុមភ្ញៀវណាហ្គាវើលដ៍ បានយកឈ្នះម្ចាស់ផ្ទះអង្គរថាយហ្គឺរក្នុងលទ្ធផល ២-១ ធ្វើបានសម្រេចដោយ Marcio (P) នៅនាទី៧៣ និង ណុប តុលា នៅនាទី៩០+៥។ ចំណែកមួយគ្រាប់របស់ក្រុមខ្លាពណ៌ទឹកក្រូច ធ្វើបានដោយខ្សែបម្រើស្លាប ថន សីហា នៅនាទី៨៤។
នៅសប្ដាហ៍ទី១០ ថ្ងៃទី២៤ ខែកក្ដដា ក្រុមលោក មាស ចាន់ណា ត្រូវបន្តប្រកួតជាមួយក្រុមសូលទីឡូអង្គរនៅកីឡដ្ឋាន អេស.អ.យូ ចំណែកក្រុមលោក Oriol ត្រូវឡើងមកភ្នំពេញជួបជាមួយអាស៊ីអឺរ៉ុបយូណាយធីត ថ្ងៃទី២៥ ខែកក្ដដា ឆ្នាំ២០២១ នៅ អេ.អី.យូ.ស្ពតផាក៕