Messi ទៅដល់បាសេឡូណា ត្រៀមយកប៊ិចចុះកុងត្រាថ្មីហើយ

2021-08-05 04:15:40
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ Lionel Messi បានបញ្ចប់ពេលវេលាសម្រាកលំហែអារម្មណ៍ជាមួយគ្រួសារ មិត្តភក្ដិរបស់ខ្លួនហើយ ដោយចាប់ផ្ដើមគិតលើការងារបាល់ទាត់វិញម្ដង។

ខ្សែប្រយុទ្ធអាហ្សង់ទីនបានទៅដល់ក្រុងបាសេឡូណាហើយ ដើម្បីចុះកុងត្រាថ្មីជាមួយក្រុម FC Barcelona ។ ដោយកុងត្រាថ្មីនោះ នឹងមានរយៈពេលដល់ទៅ៥ឆ្នាំឯណោះ ជាមួយលក្ខខណ្ឌកាត់បន្ថយប្រាក់ឈ្នួល៥០%ផងដែរ។ យ៉ាងណាមិញ លក្ខខណ្ឌមួយចំនួនក៏មានក្នុងលិខិតដែរ ពោលគឺអស់២ឆ្នាំនៃកុងត្រា ប្រសិនបើ Messi ចង់ចាកចេញ គេអាចចេញបាន ប៉ុន្តែត្រូវទៅលេងនៅសហរដ្ឋអាមេរិក ហើយក៏ធ្វើជាឯកអគ្គរដ្ឋទូតឱ្យក្រុមអ្នកមានបុណ្យបន្ដផងដែរ។

រំលឹកថា Messi បានផុតកុងត្រាជាមួយក្រុម FC Barcelona ជាង១ខែមកហើយ។ តែយ៉ាងណាមិញ ក្រុមអ្នកមានបុណ្យនៅតែបន្ដទាក់ទងជាប់រហូត មិនឱ្យក្រុមណាមួយអាចឆក់ខ្សែប្រយុទ្ធរូបនេះពីពួកគេបាននោះទេ រហូតទទួលបានផលសម្រេចកុងត្រាថ្មី។

វត្តមានរបស់គេបន្ដលេងនៅ Barcelona នេះ ក៏នឹងជួយក្របខណ្ឌ La Liga ក៏ដូចជាក្លឹប Barcelona អាចទទួលបាន Sponsor ថ្មីច្រើនផងដែរ ខណៈដែល Sponsor ចាស់វិញក៏សប្បាយចិត្ត នៅពេលឃើញវត្តមានរបស់ម្ចាស់អាវលេខ១០នេះ បន្ដលេងនៅអេស្ប៉ាញទៀតដែរ៕

ប្រភព៖ Marca អត្ថបទ៖ ប្រុស យុទ្ធ