ក្រុមហ៊ុន One Moto បាន​បញ្ចេញ​ម៉ូតូ​អគ្គិសនី​ថ្មីរបស់ខ្លួនម៉ូដែល Electa ដែល​មាន​រូបរាង​ដូចម៉ូតូ Vespa ជំនាន់មុន ប៉ុន្តែបាន​បំពាក់​បច្ចេកវិទ្យាទំនើប និង​មាន​អាគុយធំ។

ម៉ូតូ Electa រាងបែបក្លាស៊ីកនេះ មាន​ចង្កៀងដែលត្រូវបាន​ឌីហ្សាញ​ជា​រាងមូល ហើយ​ចង្កៀង​ស្តុប​ស្ថិត​នៅ​កាបាំង​សងខាង កន្លែងដាក់ជើង​ក៏មានរាងកោង ងាយស្រួលជាន់ប្រកបដោយផាសុកភាព។ ឯខាងក្រោយវិញ ចង្កៀង​ក៏មានរាងមូល ហើយកែបវាមានដែកទ្រ​សល់បន្តិចខាងក្រោយ សម្រាប់​ដាក់​ឥវ៉ាន់ផ្សេងៗទៀតផង។

បើក្រឡេកមើលមួយភ្លេត យើងប្រហែល​ជាយល់ថា វាជាម៉ូតូស៊េរីចាស់មួយប៉ុណ្ណោះ ប៉ុន្តែការពិតវា​បាន​បំពាក់​បច្ចេកវិទ្យា​ទំនើបពិសេសគឺ​ Bluetooth ដែល​អាច​បញ្ជាតាម​ស្មាតហ្វូន និង​មានបង្ហាញ​នៅលើ​កុងទ័រ​ឌីជីថលផងដែរ។ App របស់​ស្មាតហ្វូន​ មាន​មុខងារ​ជួយដល់អ្នកបើកបរ​ដូចជា មុខងារ Geo-fencing ប្រើសម្រាប់​គោលដៅតាមដាន, មុខងារក្រើនរំលឹកឱ្យត្រួតពិនិត្យ​ម៉ូតូ និង​មុខងារវិភាគ​ថាមពល​អាគុយ និងចម្ងាយ​ដែល​ជិះជាដើម។

ចំពោះម៉ាស៊ីនវិញ ម៉ូតូ One Moto Electa ដំណើរការ​ដោយ​ម៉ូទ័រ DC កម្លាំង ៤,៣សេះ អាចមូលកប់​ដល់ល្បឿន ៩៦គីឡូម៉ែត្រ​ក្នុង១ម៉ោង។ អាគុយរបស់​វាជាប្រភេទ​ lithium-ion ទំហំ ៧២វ៉ុល និង ៤៥មីលីអំពែម៉ោង គ្រប់គ្រាន់​សម្រាប់​ចម្ងាយ ១៥០គីឡូម៉ែត្រ និង​អាចផ្លាស់ប្តូរបាន ប៉ុន្តែពេល​សាកពេញម្តង ត្រូវចំណាយពេលដល់ទៅ ៤ម៉ោងឯណោះ។

ម៉ូតូនេះ ត្រូវបានដាក់​លក់​ក្នុងប្រទេសអង់គ្លេស អារ៉ាប់រួម និង​ឥណ្ឌា ដែលមាន​តម្លៃ​ប្រហែល ៤៥០០ដុល្លារ៕

ប្រភព៖ rideapart   ប្រែ​សម្រួល៖ សំភី