ចូលរួមត្រេកអរ! កីឡាការិនី អ៊ុក ស្រីមុំ ទទួលប្រាក់ឧបត្ថម្ភលើកទឹកចិត្តសរុប២ម៉ឺនដុល្លារ

2022-01-05 03:59:59
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីប៉េតង់ អ៊ុក ស្រីមុំ បន្ទាប់ពីឈ្នះមេដាយមេដាយមាសពិភពលោក ១គ្រឿងអំឡុងខែវិច្ឆិកា ឆ្នាំ២០២១ ដែលធ្វើឡើងនៅប្រទេសអេស្ប៉ាញ ព្រឹកមិញនេះបានទទួលប្រាក់ឧបត្ថម្ភលើកទឹកចិត្តពីសម្ដេចតេជោ ចំនួន១ម៉ឺនដុល្លារពីលើប្រាក់លើកទឺកចិត្តរបស់ក្រសួងអប់រំ យុវជន និងកីឡា។

សម្ដេចតេជោ ប្រគល់ប្រាក់រង្វាន់

សម្ដេចតេជោ ព្រឹកមិញនេះបានជួបសំណេះសំណាលជាមួយកីឡាការិនី អ៊ុក ស្រីមុំ និងថ្នាក់ដឹកនាំកីឡាផ្សេងៗទៀតនៅវិមានទីស្ដីការគណៈរដ្ឋមន្ត្រី។ ក្នុងនោះដែរសម្ដេចលើកទឹកចិត្តដល់ក្រុមកីឡាករ កីឡាការិនីទាំងអស់ត្រូវបន្តខំប្រឹងប្រែងហ្វឹកហាត់ដើម្បីឲ្យមានសមត្ថភាពពេញលេញនៅពេលចេញប្រកួតកម្មវិធីផ្សេងៗ។

អ៊ុក ស្រីមុំ ពេលឈ្នះនៅអេស្ប៉ាញ់

ប្រាក់រង្វាន់ដែលកីឡាការិនី អ៊ុក ស្រីមុំ ទទួលបានព្រឹកមិញនេះពីសម្ដេចតេជោ ១ម៉ឺនដុល្លារ ដូច្នេះបើសរុបទាំងប្រាក់រង្វាន់របស់ក្រសួងអប់រំ យុវជន និងកីឡា ៤០លានរៀល(១ម៉ឺនដុល្លារ)ទៀតគឺបានរហូតដល់ ២ម៉ឺនដុល្លារឯណោះ។ ក្រៅពីថវិកាហើយនោះកីឡាការិនី អ៊ុក ស្រីមុំ ត្រូវបានដំឡើងឋានន្តរសក្ដិជាឧត្ដមសេនីយ៍ឯកថែមទៀត។ ចំណែកលោកគ្រូ សុខ ម៉ុង ក៏ទទួលបាន៥ពាន់ដុល្លារពីសម្ដេច និង ៤០លានរៀល (១ម៉ឺនដុល្លារ)ពីក្រសួងអប់រំផងដែរ

រូបភាព CAMSOC

រំលឹកដែរថា កីឡាការិនី អ៊ុក ស្រីមុំ បានឈ្នះមេដាយមាស១គ្រឿង ក្នុងកម្មវិធីជើងឯកពិភពលោក នៅប្រទេសអេស្ប៉ាញ ដែលធ្វើឡើងកាលពីថ្ងៃទី១២-១៤ ខែវិច្ឆិកា ឆ្នាំ២០២១។ ក្នុងព្រឹត្តិការណ៍ពិភពលោកនៅអេស្ប៉ាញនោះ គឺមានតែ អ៊ុក ស្រីមុំ ម្នាក់គត់ឈ្នះមេដាយលើវិញ្ញាសាវាយយកពិន្ទុ៕

អត្ថបទ៖ នួន ស៊ីណា