ត្រាយអាស៊ី បួងសួងដល់វិញ្ញាណក្ខន្ធ សរ សុភា មុនហ្វឹកហាត់

2014-11-25 18:33:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបបាល់ទាត់ត្រាយអាស៊ី ដែលជាសមាជិកនៅក្នុងលីកបាល់ទាត់កម្ពុជា បានធ្វើការបួងសួងរំលឹកដល់វិញ្ញាណក្ខន្ធ អ្នកចាំទី សរ សុភា របស់ក្រុមខេត្តស្វាយរៀង និង ក្រុមជម្រើសជាតិកម្ពុជា ដែលបានទទួលមរណភាពពីថ្ងៃទី ២២ វិច្ឆកា សប្ដាហ៍មុន។

ក្រុមត្រាយអាស៊ី បួងសួងគោរពវិញ្ញាណក្ខន្ធ សរ សុភា

ការបួងសួងនេះស្របពេលដែលសពរបស់អ្នកចាំទីខាងលើបូជាដែរកាលពីល្ងាចម្សិលមិញ នៅវគ្គនាគវ័ន្ត។ ការបួងសួងរបស់គេដើម្បីឱ្យវិញ្ញាណក្ខន្ធរបស់ សរ សុភា បានទៅដល់សុគតិភព។ នេះបើតាម Facebook ផ្លូវការរបស់ក្លិប។

សូមបញ្ជាក់ថា លោក Daisuke Yoshioka ជាគ្រូបង្វឹក និង ជាអ្នកចាត់ការទូទៅក្រុម បានលាឈប់ពីក្លិបត្រាយអាស៊ី កាលពីពេលថ្មីៗ ដោយមូលហេតុបញ្ហាសុខភាព។ ក្លិបនឹងបង្ហាញមុខគ្រូបង្វឹកថ្មីក្នុងពេលឆាប់ៗ។

នៅព្រឹកថ្ងៃទី ២៥ វិច្ឆិកា នេះ ក្លិបបាល់ទាត់ខេត្តស្វាយរៀង ដែលជាអាណាព្យាបាល របស់កីឡាករ សរ សុភា បានចេញលិខិតថ្លែងអំណរគុណដល់អ្នកពាក់ព័ន្ធសំខាន់ៗ មួយចំនួន ដែលបានទៅចូលរំលែកទុក្ខគ្រួសារសពមានដូចជា ក្រសួងអប់រំយុវជននិងកីឡា, សហព័ន្ធកីឡាបាល់ទាត់កម្ពុជា, ស្នងការនគរបាលខណ្ឌទួលគោក, ក្លិបបាល់ទាត់អគ្គស្នងការដ្ឋាននគរបាលជាតិ, ក្លិបបាល់ទាត់វេស្ទើន, ក្លិបណាហ្គាខប, ក្លិបភ្នំពេញក្រោន, ក្លិបចម្ការកៅស៊ូបឹងកេត, ក្លិប Albirex Niigata Phnom Penh, ក្លិបត្រាយអាស៊ី, ក្លិបក្រសួងការពារជាតិ, ក្រុមកីឡាករជម្រើសជាតិកម្ពុជា និង លោកគ្រូបង្វឹកជនជាតិកូរ៉េខាងត្បូង Lee Tae Hoon, អ្នកសារព័ត៌មានជាតិ, មិត្តរួមអាជីពជាកីឡាករបាល់ទាត់ និង អ្នកគាំទ្របាល់ទាត់ទាំងអស់។

ចំណែកគ្រួសារសព បានថ្លែងអំណរគុនដល់ឯកឧត្តម ឌី វិជ្ជា ប្រធានក្លិបខេត្តស្វាយរៀង ដែលបានជួយទាំងកម្លាំងកាយចិត្ត ជាពិសេសបានចេញបច្ច័យរៀបចំទាំងក្នុងពិធីបុណ្យសព និង បុណ្យ ៧ ថ្ងៃ។

សរ សុភា បានទទួលមរណភាពក្រោយពេលហ្វឹកហាត់នៅ Gym ម្តុំស្ថានទូនចិនរួច ពោលគឺអំឡុងពេលសម្រួលសាច់ដុំ និង សំអាតខ្លួនដោយនាំគ្នាហែលទឹក ពេលងើបចេញពីអាង ក៏បានដួល និងតឹងទ្រូង។ តាមការសន្និដ្ឋានបឋមរបស់គ្រូពេទ្យ ការស្លាប់របស់គេដោយសារតែគាំបេះដូង ប៉ុន្ដែក្រោយមកទាំងសមត្ថកិច្ច និង គ្រូពេទ្យសិក្សាឃើញគេស្លាប់ដោយសារខ្យល់គរ៕

អត្ថបទពាក់ព័ន្ធ៖ ព័ត៌មានបន្ថែម ជុំវិញការស្លាប់អ្នកចាំទី សរ សុភា

អត្ថបទ៖ ម៉ឺន រស្មី រូបថត៖ FB TriAsia