ព័ត៌មានបន្ថែម ជុំវិញការស្លាប់អ្នកចាំទី សរ សុភា

2014-11-22 22:16:32
ចំនួនមតិ 0 | ចំនួនចែករំលែក 0

ចន្លោះមិនឃើញ

សមត្ថកិច្ច និងក្រុមគ្រូពេទ្យបានសន្និដ្ឋានថា ប្រហែលជា៨០ភាគរយនៃការស្លាប់របស់កីឡាករចាំទីជម្រើសទី១ក្លិបស្វាយរៀង និងជម្រើសជាតិកម្ពុជា សរ សុភាកាលពីព្រឹកថ្ងៃសៅរនេះ បណ្តាលមកពីខ្យល់គ។ នេះបើតាមការឲ្យដឹងពីលោក សំ វ៉ាន់ដេត គ្រូបង្វឹកបង្គោលក្លិបស្វាយរៀងដែលជាអ្នកនៅផ្ទាល់ជាមួយសរ សុភា។

លោក សំ វ៉ាន់ដេត បានប្រាប់ Sabay បន្ថែមមុននេះបន្តិចថា បន្ទាប់ហ្វឹកហាត់នៅ Gym ម្តុំស្ថានទូនចិនរួច កីឡាករមួយចំនួនបានទៅផ្ទះ ហើយកីឡាករមួយចំនួនបានទៅសំអាតខ្លួនដោយនាំគ្នាអាងហែលទឹកក្នុងអាង។ បន្ទាប់ពីងើបចេញពីអាង សរ សុភា បានដួល និងតឹងទ្រូង។ នៅពេលនោះលោកបានជួយសម្រួលដង្ហើម។ សុភាក៏កាន់តែមានអាការៈធ្ងន់ លោក និងកីឡាករផ្សេងទៀតបានខលទូរសព្ទហៅឡានពេទ្យ ប៉ុន្តែពេលនោះឡានមួយទៅមួយ បានប្រាប់ទៅមួយនេះ ប្រាប់ទៅមួយនោះ ទ្រាំបានឡានពេទ្យមកដល់គឺចំណាយពេលប្រហែលជាជាង៥នាទី។

សរ សុភា កាលនៅរស់

លោកបន្តរៀបរាប់ថា បន្ទាប់ពីបានឡានពេទ្យហើយដោយសារឃើញអាការៈមិនល្អដ៏ដឹកចូលទៅមន្ទីរពេទ្យឯកជនមួយនៅខាងក្រោយស្ថានទូតចិន ប៉ុន្តែគ្លីនីកឯកជននោះមិនហ៊ានទទួល ហើយបានបន្តបញ្ជូនទៅពេទ្យព្រះកុសៈមៈ (ពេទ្យលោកសង្ឃ) នៅភ្នំពេញ។ ដោយសារស្ទះចរាចរណ៍ ក៏បញ្ជូនចំណាយពេលជាច្រើននាទីទៀត។ ពេលទៅដល់មន្ទីរពេទ្យលោកសង្ឃ គ្រូពេទ្យប្រាប់ថា សរ សុភា បានផុតដង្ងើមបាត់ហើយ។

លោកបានបញ្ជាក់ថា ក្រុមគ្រូពេទ្យ និងសមត្ថកិច្ចបានពិនិត្យសព សរ សុភា ហើយបានសន្និដ្ឋានថា ប្រហែលជា៨០ភាគរយគឺស្លាប់ដោយសារខ្យល់គរ។

លោកគ្រូបង្គោលរូបនេះបានឲ្យដឹងថា សព របស់ សរ សុភា តម្កល់ទុកធ្វើបុណ្យតាមប្រពៃណីព្រះពុទ្ធសាសនានៅវត្ត នាគវ័ន្ន រាជធានីភ្នំពេញដោយសារមានសាច់ញាតិច្រើននៅភ្នំពេញ ជាពិសេសថ្នាក់ដឹកនាំក្លិបស្វាយរៀងមានឯកឧត្តម ឌី វិជ្ជា និងថ្នាក់ដឹកនាំសហព័ន្ធកីឡាបាល់ទាត់កម្ពុជាមានឯកឧត្តម សៅ សុខា នឹងចូលរួមបុណ្យក៏ដូចជាជួយចំណាយលើពិធីបុណ្យ។ ចំពោះពិធីបុណ្យ៧ថ្ងៃទំនងជាធ្វើនៅស្រុកកំណើតរបស់សរ សុភា គឺស្រុក បារាយណ៍ ខេត្តកំពង់ធំ។ សូមគោរពអ្នកកីឡាករ កីឡាការិនី អ្នកពាក់ព័ន្ធនឹងកីឡា និងអ្នកគាំទ្របាល់ទាត់កម្ពុជាចូលរួមពិធីបុណ្យសពសរ សុភា ដើម្បីជួយរំលែកទុក្ខដល់ក្រុមគ្រួសារនៃសព។

សរ សុភា ជាកីឡាករដែលប្រឹងប្រែងតស៊ូក្នុងអាជីពបាល់ទាត់រហូតមានកេរ្តិ៍ឈ្មោះក្នុងវិស័យបាល់ទាត់កម្ពុជាដោយជាប់ជាអ្នកចាំទីជម្រើសទីមួយរបស់កលិបស្វាយរៀង និងជាប់ជម្រើសជាតិកម្ពុជាដែលមានមុខចេញទៅប្រកួតនៅក្រៅប្រទេសរហូតមួយរយៈពេលចុងក្រោយនេះ។ ការស្លាប់របស់ សរ សុភា គឺជាការបាត់បង់ធនធានកីឡាករដ៏ធំធេងបំផុតសម្រាប់វិស័យបាល់ទាត់កម្ពុជា ក៏ដូចជាប្រជាជនកម្ពុជាទាំងមូល៕

អត្ថបទ៖ ជាន ចាន់រ៉ា