ថ្លែងនៅក្នុងឱកាស អញ្ជើញចូលរួមសម្ពោធដាក់ឱ្យប្រើប្រាស់ ស្ពានអាកាស និងផ្លូវក្រោមដីចោមចៅនាព្រឹកថ្ងៃទី៣១ ខែមីនា ឆ្នាំ២០២២នេះសម្តេចតេជោ ហ៊ុន សែន នាយករដ្ឋមន្រ្តីបានឲ្យដឹងថា ម្សិលមិញគឺជាពេលវេលាដែលសម្តេចសប្បាយចិត្តឥតឧបមាបំផុតនៅក្នុងឆ្នាំនេះ ពីព្រោះថាម្សិលមិញនេះជាថ្ងៃដែលកម្ពុជា​បំបែកឯកត្តកម្មសម្រាប់ចំណូលផ្ទៃក្នុង ពោល​គឺ​រក​ចំណូលពី​ពន្ធ​បាន​ច្រើន​បំផុតក្នុង​១ថ្ងៃ​មិន​ធ្លាប់មាន។

សម្តេចតេជោនាយករដ្ឋមន្ត្រីបានបញ្ជាក់ ថ្ងៃ​ទី ៣០ មីនា ម្សិលមិញ​នេះ កម្ពុជា​ប្រមូល​ពន្ធ​ផ្ទៃ​ក្នុង​បាន​ដល់​ទៅ​ជាង ២៣៦លាន​ដុល្លារ​អាមេរិកឯណោះ ដែល​តួលេខ​នេះ គឺ​ខ្ពស់​មិន​ធ្លាប់​មាន។ **ម្សិលមិញជាថ្ងៃដែលសម្តេចសប្បាយចិត្តខ្លាំងជាងគេនៅក្នុងឆ្នាំនេះមិននឹកស្មានថា ត្រឹមតែមួយថ្ងៃកម្ពុជាអាចរកចំណូលផ្ទៃក្នុងគិតជាលុយដុល្លារត្រឹមតែមួយថ្ងៃសោះបានរហូតទៅដល់២៣៦លានដុល្លារ​ឯណោះ!"។

ជាមួយ​គ្នា សម្ដេច​តេជោ ក៏​បាន​បញ្ចេញ​ពី​ការ​ប្រមូល​ពន្ធក្នុង​រយៈ​ពេល​៣០​ថ្ងៃ​នៃ​ខែមីនា គិត​ពី​ថ្ងៃ​ទី១​មក ដោយ​ក្នុង​រយៈ​ពេល​នោះ កម្ពុជា​ប្រមូល​ចំណូល​ពន្ធ​បាន​ចំនួន ៦២០លានដុល្លារ​អាមេរិក។ តែ​បើគិតពីខែមករាមកបានរហូតទៅដល់ត្រឹម​ថ្ងៃ​ទី ៣០មីនា វិញ កម្ពុជា​ប្រមូល​បាន ១ ១៣២លានដុល្លារ។ បើ​បូករួមទាំងថ្ងៃនេះទៀត មានន័យថាត្រឹមតែមួយត្រីមាសសោះកម្ពុជាអាចរកពន្ធផ្ទៃក្នុងបានជាង១២០០លានដុល្លារឯណោះ ។**

មិន​ត្រឹម​ប៉ុណ្ណឹង មាន​តួលេខ​ថ្មី​ទៀត ដែល​សម្ដេច​ទទួល​បាន​ពី​ឯកឧត្តម គង់វិបុល ថានៅថ្ងៃនេះកម្ពុជានឹងអាចមានលទ្ធភាពរកចំណូលលើសពី១០០លានដុល្លារទៀត។ ដូច្នេះ សម្រាប់​ក្នុងខែមីនានេះ ចំណូល​កម្ពុជានឹងកើនលើស៧០០ ដុល្លារសម្រាប់ពន្ធផ្ទៃក្នុង ពីព្រោះខែនេះជាខែដែលបង់ពន្ធលើប្រាក់ចំណេញនៃបណ្តាក្រុមហ៊ុន។

កាល​ពី​ឆ្នាំ​មុន ក្នុង​ខែ​មករា​ កម្ពុជា​ ទទួលបាន​ចំណូល​ពន្ធ ២១៧លានដុល្លារ ខែកុម្ភ:បាន២០០លានដុល្លារ ខែមីនា៦១៥លានដុល្លារ។ ដោយ​ឡែក​ឆ្នាំ២០២២នេះនៅក្នុងខែមករា កម្ពុជា​ប្រមូលបាន​បាន២៨៨លានដុល្លារ ខែកុម្ភ:២២៣លានដុល្លារ និងខែមីនា៦២០លានដុល្លារបើគិតជាប្រាក់ចំណូលមួយត្រីមាសនៅក្នុងឆ្នាំ២០២២នេះគឺកម្ពុជានឹងមានប្រាក់ចំណូលជាង១២០០លានដុល្លារ។ គិត​ជា​ភាគរយ សម្ដេច​មាន​ប្រសាសន៍ថា ចំណូល​ពន្ធ​របស់​កម្ពុជា​កើន​លើស​ឆ្នាំ​មុន​ប្រមាណ ១៨,១៧%៕