Jimin ប៊ិះអស់ផ្ទះនៅ ព្រោះខកពេលបង់លុយធានារ៉ាប់រង តែរឿងគ្រប់យ៉ាងមកពី HYBE?

2022-04-25 03:10:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ុន្មានថ្ងៃចុងក្រោយនេះ អ្នកគាំទ្រពិតជាវិលវល់អស់ហើយទាក់ទងនឹងព័ត៌មានដែលបានលើកឡើងថា អគារអាផាតមិន (Apartment) របស់ Jimin (BTS) ស្ទើរតែត្រូវបានគេរឹបអូស ដោយសារតែលោកខកខានក្នុងការបង់ថ្លៃធានារ៉ាប់រងសុខភាព។ក្រោយមកក៏ស្រាប់តែមានការបញ្ជាក់ថា រឿងនេះកើតឡើងពីកំហុសរបស់ក្រុមហ៊ុនអ្នកចាត់ចែងរបស់លោក។

យោងតាម BizHanKook បានឲ្យដឹងថា Jimin បានខកខានក្នុងការបង់ថ្លៃធានារ៉ាប់រងសុខភាព ហើយអគារស្នាក់នៅ (Apartment) ស្ទើរតែត្រូវបានគេរឹបអូសកាលពីថ្ងៃទី២៥ ខែមករា ឆ្នាំ២០២២។ Nine One Hannam គឺជាអគារដ៏ថ្លៃជាងគេមួយដែរ ក្នុងចំណោមអគារស្នាក់នៅដែលស៊ីវីល័យជាងគេនៅក្នុងប្រទេសកូរ៉េខាងត្បូង ដែលមានតម្លៃ ៥,៩០ពាន់លានវ៉ុន (ខ្ទង់ ៤,៧៤លានដុល្លារ)។

ទាក់ទងនឹងបញ្ហានេះ HYBE Labels ដែលជាអ្នកគ្រប់គ្រង Jimin បានឆ្លើយតបទៅកាន់សារព័ត៌មាន Newsen នៅថ្ងៃទី២៤ ខែមេសា ឆ្នាំ២០២២ ជាមួយនឹងការបញ្ជាក់ព័ត៌មានផ្លូវការ។ ក្នុងសេចក្ដីថ្លែងការណ៍ HYBE បានឲ្យដឹងថា Jimin មិនបានដឹងពីបុព្វលាភដែលត្រូវបង់នោះទេ ដោយសារលោកមានការរវល់នៅក្រៅប្រទេសផង ម្យ៉ាងក្រុមហ៊ុនមិនបានជូនដំណឹងនេះទៅ Jimin ទៀត។

ក្រុមហ៊ុនបានរ៉ាយរ់ាប់ថា៖ «ទាក់ទងនឹងបញ្ហានេះ ក្រុមហ៊ុនបានទទួលអ៊ីម៉ែលទាំងអស់ដែលបានបញ្ជូនទៅកាន់ Dorm ស្នាក់របស់តារារបស់យើងហើយ ហើយក្នុងដំណើរការបញ្ជូនទៅនេះ អ៊ីម៉ែលខ្លះត្រូវបានពន្យារពេលដោយសារមានកំហុសមួយចំនួន។ Jiminបានបំពេញការងាររបស់លោកនៅក្រៅប្រទេស ហើយបានសម្រាករយៈពេលវែងដែរ តាំងពីចុងឆ្នាំមុន ហើយបន្តការងារមកថ្មីៗជាបន្តបន្ទាប់នៅក្រៅប្រទេស ដូច្នេះលោកមិនបានដឹងរឿងហួសកំណត់ពេលបង់អ្វីទាំងនេះទេ។ ពេលលោកដឹងភ្លាមៗ លោកក៏ប្រញាប់បង់គ្រប់យ៉ាងអស់ដែរពេលនេះ ឯករណីនេះក៏ត្រូវបានបិទបញ្ចប់ដែរ។ យើងសូមអភ័យទោស ដែលធ្វើឲ្យអ្នកគ្រប់គ្នាមានការព្រួយបារម្ភចំពោះតារាៗ និងអ្នកគាំទ្រទាំងអស់ ដោយសារតែកំហុសរបស់ក្រុមហ៊ុនយើង»៕

ប្រភព៖ Koreaboo