មុន​ចេញ​ផ្សាយបទចម្រៀងថ្មី​អាល់ប៊ុម​ផ្លូវការ​ សមាជិក BTS បាន​បង្ហាញ​ការយល់ឃើញរៀងៗខ្លួន​ទាក់ទងនឹង​អាល់ប៊ុម «Proof»។

នៅថ្ងៃទី ១០ ខែមិថុនា ម៉ោង ១១ ព្រឹក (ម៉ោងនៅកម្ពុជា) អាល់ប៊ុម «Proof» និងបទ «Yet To Come» របស់ BTS នឹង​ចេញ​ផ្សាយជា​ផ្លូវការតបតាមការទន្ទឹងរង់ចាំមិនធម្មតារបស់អ្នកគាំទ្រទូទាំងពិភពលោក។ អាល់ប៊ុមនេះដែរត្រូវបាន​រៀបចំ​ជា​ពិសេស ដោយមាន​បទ​ថ្មី ៣បទ រួមជាមួយនឹង​បទដែល​ផ្ទុះ​ការគាំទ្រ​លើសគេកាល​ពីមុនរបស់ក្រុមផងដែរ។

ជាការប្រារព្ធខួបលើកទីប្រាំបួនរបស់ BTS នាពេលខាងមុខនេះ អាល់ប៊ុម “Proof” នឹងបង្ហាញអំពីរឿងរ៉ាវរបស់ក្រុម តាមរយៈបទដែលត្រូវបានជ្រើសរើសដោយសមាជិកទាំង ៧ផ្ទាល់ ដែលឆ្លុះបញ្ចាំងពីគំនិតរបស់ពួកគេ “លើអតីតកាល បច្ចុប្បន្នកាល និងអនាគតរបស់ BTS”។

១. RM

ជាដំបូងមេក្រុមដ៏ឆ្នើម RM បាន​លើកឡើងថា៖ «ខ្ញុំ​បុកពោះណាស់ នៅពេល​ដែលយើងចេញបទ​ថ្មីជាលើកដំបូង។ ខ្ញុំសង្ឃឹមថា​ មនុស្សជា​ច្រើន​នឹង​ចុលចិត្តវា (បទថ្មី)។ "Proof” ជា​អាល់ប៊ុមពិសេស​ដែល​បិទបញ្ចប់ជំពូកទី ១ នៃរឿងរ៉ាវរបស់ BTS ស្របពេល​យើងឈានមកដល់ខួបលើកទី ៩ ឆ្នាំនៃការបង្កើតក្រុម។ អ្វីដែល​យើងចង់ផ្ដោតអារម្មណ៍លើអាល់ប៊ុម គឺសារគ្របយ៉ាងបស់យើង សម្រាប់អ្នកគាំទ្ររបស់យើងដែលបាន​រួមដំណើរជាមួយយើងរយៈពេល​ ៩ឆ្នាំ​មកនេះ យើង​ពិតជា​យកចិត្តទុកដាក់ខ្លាំង​ចំពោះប៉ារ៉ូលបទចម្រៀង»។

២. Jin

ងាកមក Jin វិញ ក៏បាន​បង្ហាញ​ការ​យល់ឃើញដែរថា៖ «ដោយសារ “Proof” គឺជាអាល់ប៊ុម​មួយ​ដែលបង្កប់នូវប្រវត្តិរបស់ BTS វា​បាន​រក្សានូវការចងចាំខុសៗគ្នា រយៈពេល៩ឆ្នាំមកនេះ។ ខ្ញុំ​ផ្ទាល់ នឹង​ស្ដាប់វា​ឲ្យញឹកបំផុត»។

៣. Suga

ចូលដល់ Suga បាន​ទម្លាយដែរថា៖ «ដោយសារ វា​ជាអាល់ប៊ុមដែល​បង្កប់នូវរឿងរ៉ាវ​របស់ BTS យើង​បាន​យកចិត្តទយុក​ដាក់ខ្លាំង​ ថា​ធ្វើម៉េចឲ្យបទ​ចម្រៀង​រៀបចំ​ដាក់បញ្ចូល​របៀបណា​ក្នុងអាល់ប៊ុមតែមួយនេះ។ បើអ្នក​បាន​ស្ដាប់​អាល់ប៊ុមទាំងមូល តាំងពីបទដំបូង អ្នក​នឹង​មាន​ភាពរីករាយស្ដាប់វា​ តាមលំដាប់លំដោយមិនខាន»។

៤. J-Hope

J-Hope បាន​បង្ហាញ​ការ​រំភើប​ចិត្ត​ ដោយ​និយាយ​ថា៖ «ដោយសារ​វា​ជា​លើក​ទី​មួយ​របស់​យើង​ដែល​ចេញ​អាល់​ប៊ុម​មួយ​ក្នុង​រយៈ​ពេល​ដ៏​យូរ ខ្ញុំ​រំភើប​ជា​ខ្លាំង។ ខ្ញុំចង់បង្ហាញក្ដីរីករាយជាមួយ [អាល់ប៊ុម] ជាមួយអ្នកគាំទ្ររបស់យើងឲ្យបានលឿនតាមដែលអាចធ្វើទៅបាន។ "'Proof' គឺជាអាល់ប៊ុមដែលសង្ខេបពីប្រវត្តិរបស់ BTS និង ARMY ហើយវាកាន់តែពិសេស ដោយសារតែការចងចាំ និងពេលវេលារបស់យើងជាមួយគ្នាត្រូវបានថតជាប់ក្នុងអាល់ប៊ុមមួយនេះ។ ដោយសារព្រលឹងរបស់ BTSបានបញ្ចូលក្នុងអាល់ប៊ុមនេះ ខ្ញុំសង្ឃឹមថាអ្នកនឹងផ្តល់ឲ្យវានូវក្តីស្រឡាញ់ឲ្យបានច្រើនៗ»។

៥. Jimin

ដល់វេន Jimin សារភាពវិញម្ដង៖ «ដោយសារតែវាជាអាល់ប៊ុមថ្មីដំបូងរបស់យើងក្នុងរយៈពេលយូរ ខ្ញុំមានអារម្មណ៍សប្បាយរីករាយ និងប្លែកក្នុងពេលតែមួយដូចគ្នា។ វា​ជា​អាល់ប៊ុម​ពិសេស​មួយ​ ព្រោះ​វា​មាន​បទ​ពី​មុនៗ​របស់​យើង​ ព្រម​ទាំង​បទដែល​មិន​ទាន់​ចេញ​ផ្សាយ (បទថ្មី)។ ខ្ញុំ​មាន​អារម្មណ៍​ថា​វា​កាន់​តែ​ពិសេស​ដោយ​សារ​ ការ​ធ្វើ​ការ​នៅ​ក្នុង​អាល់ប៊ុម​ បាន​អនុញ្ញាត​ឲ្យ​ខ្ញុំ​យល់​​ពី​អារម្មណ៍​របស់​សមាជិក​ផ្សេង​ទៀត​ក៏​ដូច​ជា​ខ្ញុំខ្លួនឯង​ផ្ទាល់​ ម្យ៉ាងទៀតក៏ព្រោះតែ​យើង​អាច​និយាយ​ពីរឿងគ្រប់យ៉ាងរួមគ្នាផង»។

៦. V

ទន្ទឹមគ្នានេះ V បានកត់សម្គាល់ ដោយបង្ហើបការយល់ឃើញថា៖ «ដោយសារវាជាអាល់ប៊ុមដែលចាប់យកដំណើររបស់យើងក្នុងរយៈពេលប្រាំបួនឆ្នាំកន្លងមក ខ្ញុំសង្ឃឹមយ៉ាងមុតមាំថាវានឹងក្លាយជាកាដូដ៏មានតម្លៃសម្រាប់អ្នកគាំទ្រ ដែលតែងលើកទឹកចិត្តយើង និងបានបង្កើតប្រវត្តិសាស្ត្រសម្រាប់ពួកយើង»។

៧. Jungkook

ចុងក្រោយ គឺ Maknae របស់ក្រុម Jungkook ក៏និយាយពីអារម្មណ៍ពិតដែរថា៖ «មានអារម្មណ៍ថាយើងកំពុងសរសេរសៀវភៅក្រាស់មែនទែន ហើយឥឡូវនេះកំពុងបញ្ចប់វាហើយ។ វាដូច ​យើង​តែង​ធ្វើ​បែបហ្នឹង ជាមួយ​នឹង​អាល់ប៊ុម​របស់​យើង​រហូត​មក​ដល់​ពេល​នេះ យើង​បាន​យក​ចិត្ត​ទុក​ដាក់​លើ​គ្រប់​ទិដ្ឋភាព​ទាំង​អស់​ពេល​ធ្វើបទនីមួយៗ។ វាជាអាល់ប៊ុមដែលដើរទៅយ៉ាងបានល្អ ហើយបង្ហាញពីរឿងរ៉ាវរបស់ BTS រហូតមកដល់ពេលនេះ ក៏ដូចជាអារម្មណ៍របស់យើងនាពេលបច្ចុប្បន្នដូចគ្នា»៕

ប្រភព៖ Soompi   អត្ថបទ៖ ធារី