ទីបំផុត កម្ពុជា ផ្ដើមមានរោងចក្រថាមពលកម្ដៅជីវម៉ាសធំទី១ហើយ

2022-09-23 04:06:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយផ្ដោតលើការអភិវឌ្ឍន៍បៃតង កម្ពុជាបានលើកទឹកចិត្តឲ្យមានការវិនិយោគលើថាមពលកកើតឡើងវិញច្រើន ហើយខណៈពេលនេះ គិតត្រឹមចុងឆ្នាំ ២០២២ កម្ពុជាទទួលបានរោចក្រប្រើប្រាស់ថាមពលកកើតឡើងវិញធំទី១ហើយ ដែលជាការវិនិយោគរបស់ក្រុមហ៊ុន ហ៊ិននីគែន ខេមបូឌា។

រោងចក្រថាមពលកំដៅជីវម៉ាសរបស់ក្រុមហ៊ុន ហ៊ិននីគែន ខេមបូឌា មានទីតាំងនៅភូមិរបោះអង្កាញ់ សង្កាត់ព្រែកឯក ខណ្ឌច្បារអំពៅ រាជធានីភ្នំពេញ។ រោងចក្រនេះ ត្រូវបានសាងសង់តាំងពីចុងឆ្នាំ ២០២១ និងទើបតែបើកដំណើរការផ្លូវការនាពេលនេះ។

រោងចក្រជីវម៉ាសនេះ ត្រូវបានរំពឹងថា នឹងចូលរួមចំណែកក្នុងការលើកកម្ពស់ ការប្រើប្រាស់ថាមពលកកើតឡើងវិញ ក៏ដូចជាកាត់បន្ថយការសាយភាយឧស្ម័នផ្ទះកញ្ចក់នៅកម្ពុជា និងចូលរួមចំណែកនៅក្នុងសកម្មភាពឆ្លើយតបទៅនឹងបញ្ហាប្រែប្រួលអាកាសធាតុ ដោយសារតែវាមិនប្រើប្រាស់ការដុតប្រេងឥន្ធនៈ100%ដើម្បីបង្កើតចំហេះផ្គត់ផ្គង់សង្វាក់ផលិតកម្មរោងចក្រនោះឡើយ។

ផ្ទុយទៅវិញ វានឹងត្រូវប្រើប្រាស់ការដុតអង្កាម ដើម្បីង្កើតជាចំហាយទឹកសម្រាប់ផ្គត់ផ្គង់ថាមពលកម្ដៅសម្រាប់ប្រើប្រាស់ផ្ដាច់មុខ នៅរោងចក្រផលិតស្រាបៀររបស់ក្រុមហ៊ុន ហ៊ិននីគែន ខេមបូឌាតែម្ដង ដែលគេមើលឃើញនូវប្រយោជន៍២ ទី១ រួមចំណែកការអភិវឌ្ឍន៍ថាមពលបៃតងនៅកម្ពុជា ទី២ ប្រយោជន៍សហគមន៍ដែលជាអ្នកផ្គត់ផ្គង់អង្កាមទៅឲ្យរោងចក្រ។

លោក Dolf van den Brink ប្រធានក្រុមប្រឹក្សាប្រតិបត្តិ និងជាអគ្គនាយកក្រុមហ៊ុន HEINEKEN Group មានប្រសាសន៍ថា៖ «សម្រាប់រយៈពេលជាង ១៥៨ឆ្នាំមកនេះ និរន្តរភាពនិងការទទួលខុសត្រូវគឺជាផ្នែកមួយនៃ DNA របស់ក្រុមហ៊ុន ហ៊ិននីគែន។ យើងជាអ្នកផលិត និងជាអ្នកធ្វើ ហើយយើងដឹងថា សកម្មភាពរបស់យើងបង្ហាញឱ្យឃើញច្បាស់ជាងពាក្យសម្ដី។ ខ្ញុំមានមោទនភាពចំពោះក្រុមការងាររបស់ក្រុមហ៊ុន ហ៊ិននីគែន ខេមបូឌា សម្រាប់ប្រតិបត្តិការរោងចក្រថាមពលកម្តៅជីវម៉ាសទ្រង់ទ្រាយធំនេះ ដើម្បីកាត់បន្ថយការបំភាយកាបូនរបស់យើង និងនាំ យើងឱ្យដើរឆ្ពោះទៅមុខមួយជំហានទៀតលើដំណើរផ្លូវរបស់យើងឆ្ពោះទៅរកការសម្រេចបាននូវការបំភាយកាបូនត្រឹមកម្រិតសូន្យ»។

ងាកមកលោក Samson Wong នាយកគ្រប់គ្រងក្រុមហ៊ុន ហ៊ិននីគែន ខេមបូឌា បានថ្លែងដែរថា ២ទសវត្សរ៍មកនេះ ហ៊ិននីគែន បានចាក់ឫសគល់ដ៏រឹងមាំនៅក្នុងប្រទេសកម្ពុជា ជាមួយការបណ្តាក់ទុនរាប់រយលានដុល្លារ និងបានផ្តល់ការងារដល់បុគ្គលិករាប់រយនាក់ និងផ្តល់ការងារប្រយោលនៅទូទាំងខ្សែសង្វាក់ផលិតកម្មរាប់ចាប់ពីការងារផលិតវត្ថុធាតុដើមរហូតដល់ការងារនៅតាមហាងទំនិញ។

ជាមួយនឹងការចាប់ផ្តើមដំណើរការរោងចក្រថាមពលកម្តៅជីវម៉ាសនេះ សង្ឃឹមថានឹងបង្កើតឱ្យមានផលវិជ្ជមានបន្ថែមទៀត នៅក្នុងសហគមន៍។ លោកគូសបញ្ជាក់ា មហិច្ឆតារបស់ ហ៊ិននីគែន គឺ “ធ្វើឱ្យប្រទេសកម្ពុជាកាន់តែប្រសើរ” បានបង្កប់យ៉ាងជ្រៅនៅក្នុងអាជីវកម្មរបស់យើងអស់រយៈពេលជាច្រើនឆ្នាំមកហើយ ហើយការបើកដំណើរការរោងចក្រថាមពលថ្មីនេះបង្ហាញឱ្យឃើញថា មហិច្ឆតានេះនឹងដឹកនាំយើងឱ្យដើរឆ្ពោះទៅមុខសម្រាប់មនុស្សជាច្រើនជំនាន់ទៅមុខទៀត»។

ថ្លែងនៅពិធីបើកសម្ពោធ រោងចក្រថាមពលកំដៅជីវម៉ាសរបស់ក្រុមហ៊ុន ហ៊ិននីគែន ខេមបូឌាព្រឹកថ្ងៃម្សិលមិញ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានកោតសរសើរចំពោះការចូលរួមក្រុមហ៊ុនស្រាបៀកម្រិតពិភពលោកមួយនេះ ដែលបានបង្កើតប្រវត្តិសាស្ត្រសម្រាប់កម្ពុជានៅក្នុងផែនការគម្រោងអភិវឌ្ឍបៃតង។

ឯកឧត្តមបានគូសបញ្ជាក់ថា ស្រាបៀ ហិននីគែន បានចាប់ផ្ដើមវិនិយោគនៅកម្ពុជា ១៩៩២-៩៣ តាំងពីកម្ពុជា ស្ទើរមិនមានហេដ្ឋរចនាសម្ព័ន្ធសមស្របនៅឡើយ។ ប៉ុន្តែក្រុមហ៊ុនជឿជាក់ចំពោះកម្ពុជា ដោយការហក់ចូលមកវិនិយោគនៅកម្ពុជា និងបង្កើតឱកាសការងារដល់ប្រជាពលរដ្ឋកម្ពុជា ២ម៉ឺនកន្លែង ព្រមទាំងបានផ្ដល់ពួកគេនៅកន្លែងស្នាក់នៅ និងប្រាក់ខែសមរម្យផង។ នេះ ជាការរួមចំណែកក្នុងការរុញពួកគេបន្តិចម្ដងៗពីភាពក្រីក្រ ស្របតាមយុទ្ធសាស្ត្ររបស់រាជរដ្ឋាភិបាល។

ពេលនេះទៀតសោត ការបោះទុនវិនិយោគបង្កើតរោងចក្រជីវម៉ាស ក៏ជាការដើរស្របគ្នានឹងយុទ្ធសាស្ត្ររបស់កម្ពុជា ដែលជំរុញការប្រើប្រាស់ថាមពលកកើតឡើងវិញដែរ ដែលជាផ្នែកមួយនៃផែនការយុទ្ធសាស្ត្រថាមពលរបស់កម្ពុជានាពេលអនាគត។

ឯកឧត្តមរដ្ឋមន្ត្រីបានបញ្ជាក់ទៀតថា នៅកម្ពុជាមានផ្ទៃដីសម្រាប់ដាំស្រូវជាង ៤លានហិកតា ដែលអាចបន្សល់អង្កាមជាច្រើន។ ដូច្នេះ ការបង្កើតឲ្យមានរោងចក្រជីវម៉ាសរបស់ ហ៊ិននីគែន មិនត្រឹមតែលើកកម្ពស់ការប្រើប្រាស់ថាមពលកកើតឡើងវិញនៅកម្ពុជានោះទេ ប៉ុន្តែក៏បានជួយមួយផ្នែកទៀតដល់ប្រជាពលរដ្ឋនៅក្រៅរោងចក្រ ក៏ដូចជាតំបន់ផ្សេងៗ ដែលជាអ្នកផ្គត់ផ្គង់អង្កាមមករោងចក្រថែមទៀតផង។

រោងចក្រជីវម៉ាស គឺជាផ្នែកមួយនៃគំនិតផ្ដួចផ្ដើមរបស់ក្រុមប្រទេសលោកខាងលិច ក្នុងកិច្ចប្រឹងប្រែងទប់ទល់នឹងបម្រែបម្រួលអាកាសធាតុដោយសារបំភាយថាមពលមិនល្អ និងការបំភាយឧស្ម័នផ្ទះកញ្ចក់ទៅក្នុងស្រទាប់បរិយាកាស។ មានមូលដ្ឋាននៅកម្ពុជា ក្រុមហ៊ុន ហ៊ិននីគែន ខេមបូឌា មានឆន្ទះជួយកម្ពុជាលើកកម្ពស់ការប្រើប្រាស់ថាមពលកកើតឡើងវិញនៅក្នុងស្រុក។

ដូច្នេះក្រុមហ៊ុន បានសហការជាមួយក្រុមហ៊ុន BECIS ជាប្រតិបត្តិករថាមពលដែលមានការិយាល័យកណ្ដាលនៅប្រទេសសិង្ហបុរី បង្កើតរោងចក្រជីវម៉ាសធំទី១ ជាមួយទុនវិនិយោគចំនួន ៥.៨លានដុល្លារអាមេរិក។ រោងចក្រនេះ បានប្រើប្រាស់ការដុតអង្កាមមានប្រភពពីខេត្តព្រៃវែងបង្កើតជាចំហាយទឹក ផ្ដល់ថាមពលផ្គត់ផ្គង់សង្វាក់ផលិតកម្មរបស់ខ្លួន។

ក្រុមហ៊ុនស្រាបៀហូឡង់ដ៍មួយនេះ ក៏មានមហិច្ឆិតាសម្រេចអោយបានការបញ្ឈប់ការបំភាយឧស្ម័នកាបូនិចនៅក្នុងផលិតកម្មរបស់ខ្លួននៅក្នុងឆ្នាំ២០៣០ និងទូទាំងខ្សែសង្វាក់ផ្គត់ផ្គង់របស់ខ្លួនទាំងមូលនៅក្នុងឆ្នាំ២០៤០ថែមទៀត៕

អត្ថបទ៖ ទារិកា