នន់ រ៉ាវីន៖ ដឹងច្បាស់ភាពខ្លាំងរបស់ដៃគូទើបឈានដល់ឈ្នះមេដាយមាសថ្នាក់ជាតិនេះ

2022-10-17 07:13:50
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនមកពីក្លឹបក្រសួងការពារជាតិ នន់ រ៉ាវីន ថាជ័យជម្នះមេដាយមាសនេះគឺបានមកពីខំប្រឹងប្រែងហ្វឹកហាត់ និងមួយវិញទៀតដោយសារបានដឹងពីសមត្ថភាពដៃគូច្បាស់ចំណុចខ្លាំង និងចំណុចខ្សោយ។

កីឡាករ នន់ រ៉ាវីន

នន់ រ៉ាវីន បានឲ្យដឹងក្រោយចប់ការប្រកួតថា ដៃគូដែលប្រកួតជាមួយគ្នាវគ្គផ្ដាច់ព្រ័ត្រនេះមានសមត្ថភាពល្អ ជាពិសេសការចូលប៊ូល ប៉ុន្តែមួយរយៈចុងក្រោយនៃការហ្វឹកហាត់រៀងធ្លាក់ដៃបន្តិច។ ដំបូងឡើយខ្លួនចាញ់ពិន្ទុដៃគូនោះទេ ប៉ុន្តែក្រោយផ្លាស់ប្ដូររបៀបលេងថ្មីគឺផ្ដោតលើការចូលប៊ូលវិញនោះទើបបានផល និងនាំមុខរហូតឈ្នះតែម្ដង។

ដៃគូប្រកួតរបស់ នន់ រ៉ាវីន

យុវជនវ័យ ១២ឆ្នាំរូបនេះបន្ថែមទៀតថា សប្បាយចិត្តដែលឈ្នះមេដាយមាសលើកដំបូងមួយនេះហើយប្ដេជ្ញាខំប្រឹងបន្តទៀតដើម្បីឈានដល់ការឈ្នះមេដាយកម្រិតអន្តរជាតិជូនប្រទេសនៅពេលខាងមុខ។

នន់ រ៉ាវីន ជាប់លេខ១ (កណ្ដាលគេ)

រំលឹកដែរថា នន់ រ៉ាវីន ឈ្នះមេដាយមាសលើវិញ្ញាសា យុវជនអាយុក្រោម ១៨ឆ្នាំ ១ទល់១ នៃការប្រកួតជើងឯកថ្នាក់ជាតិ ឆ្នាំ២០២២។ រូបគេឈ្នះវគ្គផ្ដាច់ព្រ័ត្រជាមួយខាងក្លឹបមហាផ្ទៃ ដោយលទ្ធ ១៣-៧។ សហព័ន្ធកីឡាប៊ូល និងប៉េតង់ បានបញ្ចប់ការប្រកួតជើងឯកថ្នាក់ជាតិរបស់ខ្លួនហើយម្សិលមិញនេះក្រោយរៀបចំរយៈពេល២ថ្ងៃ (១៥-១៦ តុលា) កន្លងទៅនៅពហុកីឡដ្ឋានជាតិ៕

អត្ថបទ៖ នួន ស៊ីណា