នៅចាំទេ! ហ៊ឺ ទៀងគឹមហុង កុមារអច្ឆរិយ: ក៏ប្រឡងបាក់ឌុបឆ្នាំនេះដែរ ក្នុងអាយុ ១៣ឆ្នាំប៉ុណ្ណោះ

2022-12-07 03:13:16
ចំនួនមតិ 0 | ចំនួនចែករំលែក 0

ចន្លោះមិនឃើញ

កុមារា ហ៊ឺ ទៀងគឹមហុង ដែលបានធ្វើឲ្យគេស្ងើចសរសើរគ្រប់គ្នាកាលពីឆ្នាំ ២០១៧ ដោយសារមានសមត្ថភាពពិសេសជាងកុមារនានានោះ នៅឆ្នាំសិក្សា ២០២២ ក៏បានបង្ហាញខ្លួនចូលរួមប្រឡងបាក់ឌុបផងដែរ ក្នុងអាយុត្រឹមតែ១៣ឆ្នាំប៉ុណ្ណោះ។ នេះបើតាមឯកឧត្តម ដួង តារា ជំនួយការសម្ដេចតេជោ ហ៊ុន សែន។

វត្តមានរបស់កុមារា គឹមហុង បានធ្វើឲ្យឯកឧត្តម ដួង តារា មានការភ្ញាក់ផ្អើល និងមានភាពរីករាយ។ ឯកឧត្តម បានមានប្រសាសន៍ថា "ពូពិតជាសប្បាយរីករាយនិងសូមអបអរសាទរក្មួយ ហ៊ឺ ទៀងគីមហុង ដែលបានខិតខំរៀនសូត្ររហូតឈានដល់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី០៥ ធ្នូ ២០២២ ដែលទើបបានបញ្ចប់នៅថ្ងៃទី ០៦ ធ្នូ នេះ។ ផ្អែកលើសមត្ថភាពដ៏ពិសេសនេះ ពូសង្ឃឹមថាក្មួយនឹងប្រឡងជាប់ជាក់ជាមិខាន"។

កុមារា ហ៊ឺ ទៀងគឹមហុង គឺជាកុមារអច្ឆរិយៈ និងបានធ្វើឲ្យមានការភ្ញាក់ផ្អើលកាលពីឆ្នាំ ២០១៧។ រូបគេមានសមត្ថភាពពិសេស យល់ដឹងភាសាខ្មែរ និងគណិតវិទ្យា។ គេមានសមត្ថភាពអាចអានអក្ស រៀបអក្សខ្មែរ និងអក្សរឡាតាំង តាំងពីអាយុជាង ២ឆ្នាំ។ នៅអាយុ ២ឆ្នាំកន្លះ គឹមហុង ចេះអានសារជូនពរសម្ដេច ហ៊ុន សែន បានយ៉ាងល្អថែមទៀត។

សមត្ថភាពពិសេសនេះ គឹមហុង ទទួលបានការចាប់អារម្មណ៍ និងស្ងើចសរសើរយ៉ាងច្រើនពីសាធារណជន ក្នុងនោះក៏សូម្បីសម្ដេចតេជោ ហ៊ុន សែន ហើយសម្ដេចក៏បានអនុញ្ញាតឲ្យ គឹមហុង ម្ដាយ ឪពុក និងលោកគ្រូអ្នកគ្រូរបស់ គឹមហុង ចូលជួប ដើម្បីធ្វើតេស្តសមត្ថភាពរបស់គេដោយផ្ទាល់។

សម្ដេចបានប្រគល់ Laptop ១គ្រឿងឲ្យ គឹមហុង ហើយឲ្យគេស្វែងរកផែនទីប្រទេសកម្ពុជា និងគណនារកចម្ងាយគីឡូម៉ែត្រ ព្រមទាំងឲ្យចៅស្រីសម្ដេច ធ្វើការសន្ទនាជាភាសាអង់គ្លេសជាមួយ គឹមហុង ទៀត។ ជាលទ្ធផល សម្ដេចបានរកឃើញថា កុមារាម្នាក់នេះ ដែលកាលនោះទើបតែមានអាយុ ៧ឆ្នាំប៉ុណ្ណោះ គឺពិតជាកុមារាមានសមត្ថភាពពិសេសមែន។

ដូច្នេះហើយ សម្ដេចតេជោ បានស្នើអាហារូបករណ៍ពិសេសពីសាលាប៊ែលធី ដើម្បីបន្តសិក្សាចំណេះទូទៅ ហើយសម្ដេចបានធានារ៉ាប់រងលើការចំណាយក្នុងការសិក្សារបស់ គឹមហុង ទាំងស្រុង និងថែមទាំងបានពិភាក្សាជាមួយក្រសួងអប់រំ ស្វែងរកគ្រឹះស្ថានល្អសម្រាប់គេទៀតផង។

ក្រោយសិក្សាបាន២ឆ្នាំ នៅសាលាប៊ែលធី គឹមហុង បានប្រឡងជាប់ឌីប្លូមនៅអាយុជាង ៩ឆ្នាំ។ ហើយនៅពេលនេះ អាយុ ១៣ឆ្នាំ រូបគេបានចូលប្រឡងបាក់ឌុបជាមួយបងៗរាប់ម៉ឺននាក់ទៀត។ យ៉ាងណា មិនទាន់ដឹងកុមាររូបនេះ ធ្វើបានល្អកម្រិតណានៅក្នុងការប្រឡងមធ្យមសិក្សានេះ៕

អត្ថបទ៖ ទារិកា