ខ្សែជីវិតសោកសៅរបស់ Coco Lee: ពីក្រោយស្នាមញញឹម គឺជាភាពឈឺចាប់ និងសម្ពាធជីវិត

2023-07-07 03:12:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី ០៥ ខែកក្កដា មហាជនមានការភ្ញាក់ផ្អើលជាពន់ពេក ក្រោយទទួលដំណឹងថា តារាចម្រៀង Pop ហុងកុង-អាមេរិក Coco Lee បានទទួលមរណភាព នៅអាយុ ៤៨ ឆ្នាំ ដោយការសម្លាប់ខ្លួនឯង។

កាលនៅមានជីវិត Coco Lee មានឈ្មោះជាតារាចម្រៀងអាស៊ីដែលមានភាពល្បីល្បាញខ្លាំងនៅជុំវិញពិភពលោក និងក៏ត្រូវបានគេទទួលស្គាល់និងលើកតម្កើងខ្លាំងចំពោះសំឡេង ដ៏មានថាមពល និងរូបសម្រស់ដ៏ស្រស់ស្អាត។ ប៉ុន្តែជំងឺបាក់ទឹកចិត្ត ពិតជាព្រៃផ្សៃ ដោយបានឆក់យកជីវិតរបស់ Coco ទៅឆ្ងាយគ្មានថ្ងៃត្រឡប់។

នៅពីក្រោយស្នាមញញឹមដ៏ស្រស់ស្អាត Coco Lee បានប្រឈមនឹងបញ្ហាជាច្រើន ពិសេសបញ្ហាសុខភាព។ មនុស្សជាច្រើននាក់មានការសោកស្ដាយជាខ្លាំងនឹងការបាត់បង់នៅពេលនេះ។

ជីវិតអាពាហ៍ពិពាហ៍

ក្នុងឆ្នាំ ២០១១ Coco និងពាណិជ្ជករកាណាដា Bruce Rockowitz បានប្រារព្ធ "អាពាហ៍ពិពាហ៍ដ៏ធំប្រចាំសតវត្ស" ដោយចំណាយរហូតដល់ទៅ ១០ លានដុល្លារអាមេរិកឯណោះ។ ប្តីរបស់នាងមានអាយុច្រើនជាង Coco Lee ដល់ទៅ ១៨ឆ្នាំ។ លោកគឺជាបុរសពោះម៉ាយ ដែលមានកូន ២នាក់ ហើយ។ ពិធីមង្គលការនេះ មានការចូលរួមពីសំណាក់ តារាល្បីៗដូចជា Alicia Keys, Bruno Mars, Zhang Ziyi, Jackie Chan ជាដើម។

Coco Lee បាននិយាយថា នាងមានភាពស្និទ្ធស្នាលនឹងកូនចុងខ្លាំងណាស់ ហើយកូនស្រីទាំងពីររបស់នាងក៏ស្រលាញ់ម្តាយចុងដែរ។ ប៉ុន្តែសោកនាដកម្មនៃជីវិតរបស់តារាចម្រៀងរូបនេះបានលាតត្រដាងនៅពេលដែលនាងព្យាយាមមានកូនបង្កើតជាមួយប្តីរបស់នាង។ ក្នុងអំឡុងពេល ១២ ឆ្នាំនៃអាពាហ៍ពិពាហ៍ Coco Lee បានព្យាយាមយកកូន ដោយបច្ចេកទេសពេទ្យដល់ទៅ ៩ ដងឯណោះ ប៉ុន្តែមិនបានសម្រេច។ ប៉ុន្តែ Bruce Rockowitz ដែលជាស្វាមី ក៏ចាប់ផ្ដើមបង្កើតទំនាក់ទំនងស្នេហាក្រៅផ្ទះ ហើយតែងបន្ទោសប្រពន្ធរហូត។ កូនចុងទាំង ២ នាក់ក៏ព្រងើយកន្តើយបន្តិចម្តងៗ Coco Lee កាន់តែចម្លែកចិត្ត ជាហេតុធ្វើឱ្យនាងកាន់តែវេទនាផ្លូវចិត្ត រហូតដល់ពេលមួយ នាងស្រកទម្ងន់នៅសល់ ៤២ គីឡូ។

នៅដើមឆ្នាំ ២០២៣ តារាស្រីរូបនេះ បានប្រកាសចែកផ្លូវពីស្វាមី។ អាពាហ៍ពិពាហ៍បានបន្សល់ទុកនូវការប៉ះទង្គិចផ្លូវចិត្ត និងផ្លូវកាយជាច្រើនសម្រាប់ Coco Lee។ នៅថ្ងៃចុងក្រោយនៃឆ្នាំ ២០២២ Coco Lee បានសរសេរនៅលើគេហទំព័រផ្ទាល់ខ្លួនរបស់នាងថា "ឆ្នាំនេះពិតជាពិបាកសម្រាប់ខ្ញុំណាស់"។

បញ្ហាសុខភាព

សុខភាពផ្លូវចិត្ត និងផ្លូវកាយរបស់ Coco Lee បានធ្លាក់ចុះជាលំដាប់នៅប៉ុន្មានឆ្នាំមកនេះ។ នាងលែងជាតារាចម្រៀងសិចស៊ី និងលែងមានទំនុកចិត្តលើខ្លួនឯង ហើយរាងកាយក៏ប្រែជាស្គមបន្តិចម្ដងៗ។ តារាចម្រៀងរូបនេះក៏ត្រូវធ្វើការវះកាត់ខ្នង និងជើងផងដែរ។

គេដឹងថា ជើងឆ្វេងរបស់ Coco Lee កើតមកមានពិការភាពពីកំណើត បានធ្វើការវះកាត់តាំងពីអាយុ ២ឆ្នាំ ប៉ុន្តែនៅតែមិនជាសះស្បើយ ធ្វើឱ្យនាងឈឺចាប់ពេលដើរ។ ទោះជួបឧបសគ្គយ៉ាងណា Coco Lee នៅតែស្រឡាញ់ការច្រៀង និងរាំនៅលើឆាក។ ដោយសារអាយុកាន់តែចាស់ ជើងឆ្វេងរបស់នាងកាន់តែខ្សោយទៅៗ ហើយត្រូវបង្ខំចិត្តធ្វើការវះកាត់កាលពីខែកុម្ភៈកន្លងទៅនេះ។ ដោយមិនអាចលាក់ការថប់បារម្ភរបស់នាងបាន Mariah Carey អាស៊ីរូបនេះបានបង្ហោះលើវិបសាយផ្ទាល់ខ្លួនថា៖ "ខ្ញុំខ្លាចថាបន្ទាប់ពីការវះកាត់ខ្ញុំនឹងមិនអាចរាំដូចពីមុន"។ ប៉ុន្តែក្រោយមក នាងបានលើកទឹកចិត្តខ្លួនឯងដោយសុទិដ្ឋិនិយម ដើម្បីយកឈ្នះលើជំងឺនេះ ហើយក្នុងពេលជាមួយគ្នានោះ នាងបានព្យាយាមរៀនដើរដោយទប់ជាមួយនឹងឈើច្រត់។

នៅពេលនោះ អ្នកគាំទ្រជាច្រើនបានលើកទឹកចិត្ត Coco Lee ឱ្យសម្រាក និងរង់ចាំការត្រឡប់មកវិញរបស់នាង។ ឆ្នាំ ២០២៣ គឺជាខួបលើកទី ៣០ របស់ Coco Lee ដែលប្រឡូកចូលពិភពសិល្បៈ។

កាលពីថ្ងៃទី ០២ ខែកក្កដា នាងបានផ្ញើសារជាសំឡេងអរគុណអ្នកគាំទ្រ និងជូនពរឱ្យពួកគេមានសុខភាពល្អ។ ប៉ុន្តែគ្មាននរណាម្នាក់នឹកស្មានថា ក៏ជាថ្ងៃដែលតារាចម្រៀងស្រីរូបនេះ ផ្ដាច់ជីវិតខ្លួនឯង ដោយសារសម្ពាធផ្លូវចិត្ត បន្សល់ទុកនូវការបាត់បង់យ៉ាងធំធេងក្នុងដួងចិត្តសាច់ញាតិ និងអ្នកគាំទ្រជាច្រើននៅជុំវិញពិភពលោក៕