នៅដើមឆ្នាំនេះ មាន​សេចក្ដី​រាយការណ៍ថា​ ប្រទេស​ចិន​បាន​ដាក់បម្រាម​យ៉ាងដាច់ខាត ទៅ​លើ​ការ​មើលរឿង ឬអ្វីផ្សេង​ទៀតរបស់កូរ៉េ។

ផ្អែក​តាម​បណ្ដាញ​សារព័ត៌មាន​បាន​ឲ្យដឹងថា វិធានការនេះត្រូវបានអនុម័ត ដើម្បីទប់ស្កាត់លំហូរចូលនៃរឿងភាគកូរ៉េ និងហ្គេមនៅក្នុងខែមីនា និងខែមេសានៃឆ្នាំនេះ។ ព័ត៌មាននេះត្រូវបានបង្ហាញនៅថ្ងៃទី ០៦ ខែតុលាដោយ សារព័ត៌មាន Chosun Ilbo ដោយដកស្រង់របាយការណ៍ពី គណៈកម្មាធិការកិច្ចការបរទេស និងការបង្រួបបង្រួមរបស់ប្រទេសកូរ៉េខាងត្បូង។

កាលពីមុន ប្រទេសចិនបានអនុញ្ញាតឱ្យចាក់ផ្សាយរឿងភាគកូរ៉េ ក្នុងអំឡុងពេលពីរខែដំបូងនៃឆ្នាំ ២០២២ ដែលនាំឱ្យ  **OTT platform ** របស់ប្រទេសចិនចេញផ្សាយរឿងមួយចំនួនដូចជា **“What's Wrong with Secretary Kim”, “Hospital Playlist” ** និង **“Hometown Cha-Cha-Cha” **។

យ៉ាងណាក៏ដោយ នៅខែមិថុនា ឆ្នាំ ២០២៣ មានការប្រមូលផ្ដុំពីការចរចាបាន​កើតឡើង ពោលបើទោះបីជាប៉ុស្តិ៍ទូរទស្សន៍ធំៗរបស់កូរ៉េខាងត្បូង ព្យាយាមធានាកិច្ចសន្យាក៏ដោយ ក៏មាន​ភស្តុតាងបញ្ជាក់ថាវិធានការនេះបានជាប់គាំង។ លើសពីនេះ ក្រសួងវប្បធម៌ កីឡា និងទេសចរណ៍នៃប្រទេសកូរ៉េខាងត្បូងបានគូសបញ្ជាក់ថា ចាប់តាំងពីរឿង "Oh! My Gran" ចេញផ្សាយកាលពីឆ្នាំ ២០២១ ភាពយន្តកូរ៉េថ្មីៗមិនមានតំណាងនៅរោងកុនចិនទេ។

លើសពីនេះទៅទៀត Ahn Cheol Soo សមាជិកសភាជាតិបានទទួលស្គាល់ថាការហាមឃាត់របស់ចិនលើមាតិកាកូរ៉េ មិនបានប្រសើរឡើងគួរឱ្យកត់សម្គាល់ទេ ចាប់តាំងពីច្បាប់ «ប្រឆាំងនឹងពិភពភាពយន្តកូរ៉េ» ឬ «Anti-Hallyu» ដែលគេសន្មត់ថាបានចាប់ផ្តើមនៅក្នុងខែតុលា ឆ្នាំ ២០១៦  និងបានបន្តនៅឆ្នាំ ២០១៧ ជាផ្នែកមួយរបស់ពួកគេគឺច្បាប់ «សកម្មភាពប្រឆាំង THAAD»។

អ្នកនិយមលេងអ៊ីនធឺណិតកូរ៉េបានបញ្ចេញមតិដោយមានប្រតិកម្មចម្រុះ ដោយកត់សម្គាល់ថាការផ្សាយដោយខុសច្បាប់នៃមាតិកាកូរ៉េនៅតែកើនឡើង ដោយមិនគិតពីការហាមឃាត់នោះទេ៕

ប្រភព៖ Allkpop   ប្រែ​សម្រួល៖ យី សុធារី