ញាក់សាច់! កំពុងឡើងខ្លាំងស្មាត់ ហ៊ុប ធ្លាប់តឲ្យគេ៣ទល់១០នាក់ ផ្អើលអស់ពូម៉ូតូឌុប
- 2024-04-23 06:00:00
- ចំនួនមតិ 0 | ចំនួនចែករំលែក 0
ញាក់សាច់! កំពុងឡើងខ្លាំងស្មាត់ ហ៊ុប ធ្លាប់តឲ្យគេ៣ទល់១០នាក់ ផ្អើលអស់ពូម៉ូតូឌុប
ចន្លោះមិនឃើញ
មនុស្សចោមរោមកកកុញសឹងរកកន្លែងអង្គុយនិងឈរគ្មានដែលនេះជាទិដ្ឋភាពមួយនៃការប្រកួតបាល់ទះក្រៅផ្លូវលំដាប់គីឡូធ្ងន់ស្រុកខ្មែរលោក សោម ភក្ដី ហៅស្មាត់ ហ៊ុប តឲ្យក្រុមកីឡាករបុរីកីឡា៣ទល់នឹង១០នាក់ផ្អើលស្រុកខ្មែរ សូម្បីអ្នកលក់ទឹកអំពៅនិងពូពូរត់ម៉ូតូឌុបជាដើមនោះក៏មកទស្សនាដែរ នៅតារាងបាល់ទះវត្តភ្នំក្នុងឆ្នាំ ២០១២-២០១៣។
បីរបស់ស្មាត់ ហ៊ុប អំឡុងពេលនោះមានខ្លាចាស់ចង្កូមពិស សោម ចំណាប់ ជាកីឡាករឆ្នើមកំពូលលំដាប់ស្រុកខ្មែរនិង កែម រតនា ហៅកូនឪ លីប្រូឆ្នើមរបស់ក្រសួងមហាផ្ទៃ។ ប៉ុន្តែការតឲ្យហួសហេតុពេក៣ទល់១០នាក់នេះ លោកមិនទទួលបានលទ្ធផលល្អនោះឡើយពោលគឺចាញ់ ប៉ុន្តែលោកមិនបានចាំចំនួនពិន្ទុទេ។
អតីតកីឡាករល្អមានដើមកំណើតនៅខណ្ឌឫស្សីកែវ រាជធានីភ្នំពេញបានបញ្ជាក់ត្រង់ចំណុចនេះថា ៖«កាលខ្ញុំចាប់ដៃគូលេង ខ្ញុំបីនាក់សោមចំណាប់ ខ្ញុំ និងរតនាហ្នឹង ខ្ញុំតឱ្យបុរីកីឡាបីដប់…នៅតារាងវត្តភ្នំ…បីដប់ហ្នឹងខ្ញុំចាញ់គេមួយសិត ហើយដកបីចេញសល់៧ខ្ញុំឈ្នះវិញ…»។
នេះជាការប្រកួតមួយដែលលោកចាំមិនភ្លេច។ ប៉ុន្តែស្មាត់ហ៊ុប បានឲ្យដឹងទៀតថា ការប្រកួតមួយទៀតដែលលោករិតតែចាំមិនភ្លេចនោះ គឺការតឲ្យអ្នកសៀមរាប ២នាក់ទល់នឹង៥នាក់នៅឆ្នាំ២០១៥។ កាលនោះលោកបានចាប់ដៃគូជាមួយទូចអង្គរក្ស និងឈ្នះពួកគេក្នុងលទ្ធផលពិន្ទុ ១៥ ទល់នឹង ៧។ ក្រោយឈ្នះការប្រកួតនេះហើយ កេរ្តិ៍ឈ្មោះកាន់តែល្បីល្បាញ ហើយជើងខ្លាំងដដែលក៏បានលេងតឲ្យក្រុមស្មាត់ ឆា មកពីខេត្តបន្ទាយមានជ័យ ២ទល់នឹង៥ទៀត។ ចុងក្រោយស្មាត់ហ៊ុបនៅតែទទួលបានជ័យជម្នះដដែល។ ជំនួបពីរប្រាំនេះហើយជាការប្រកួតដ៏ជក់ចិត្តដែលធ្វើឱ្យស្មាត់រូបនេះមិនអាចបំភ្លេចបាន។
បុរសកម្ពស់១,៨៦ម៉ែត្រ មានជំនាញល្អក្នុងការម៉ាត់ ធ្វើរនាំង ចាប់សេវារឹង និងវាយសេវា។ ជារួមល្អមួយចប់តែម្ដង។ ចំពោះការម៉ាត់ផ្ដាច់ ហ៊ុបមានបច្ចេកទេសវ៉ៃខុសគេ ពោលគឺវ៉ៃលិច៨ម៉ែត្រចុងលីង មិនពន្លិចនៅខាងមុខឡើយ។
ដៃគូដ៏សង់តង់របស់លោកគ្រូចំណាប់ កូនឪ និងចាន់ សារ៉ន បានពន្យល់ទៀតថា ៖«បាល់ខ្ញុំលេងដាច់ស្មាត់ល្អហ្នឹង គឺខ្ញុំវ៉ៃលិចតែ៨ៗម៉ែត្រទេ លីងក្រោយវាមាន៩ម៉ែត្រ តែខ្ញុំវ៉ៃហ្នឹងខ្ញុំយកតែលីង៨ៗម៉ែត្រទេ ខ្ញុំខុសគេ ខ្ញុំប្រើតែកដៃ ហើយភ្នែកខ្ញុំវ៉ៃខ្ញុំមើលឃើញ (ដីឬប្រឡោះស៊ី)»។
ហេតុអ្វីបានជាស្មាត់រូបនេះលេងល្អបែបនេះ? តាមពិតទៅដោយសារតែស្មាត់ដែលល្បីខ្លាំងកាលពីជាង១០ឆ្នាំមុនរូបនេះ ធ្លាប់លេងឱ្យក្លឹបក្រសួងការពារជាតិ ក្លឹបឆ័ត្រយោង៩១១ ក្លឹបក្រសួងមហាផ្ទៃ និងក្លឹបស្នងការនគរបាលខេត្តបាត់ដំបង។ លោកជួយឱ្យក្លឹបឆ័ត្រយោង៩១១ បានចំណាតថ្នាក់លេខ២ នៃពានរង្វាន់ខួបកងទ័ព (មិនចាំឆ្នាំ) ជួយក្រសួងមហាផ្ទៃបានលេខ១ នៃពានរង្វាន់ទូទាំងប្រទេស (មិនចាំឆ្នាំ) និងជួយស្នងការខេត្តបាត់ដំបងទទួលបានចំណាត់ថ្នាក់លេខ១ ពានរង្វាន់ស្រាបៀរលីអូក្នុងឆ្នាំ២០១៤ នៅពហុកីឡដ្ឋានជាតិ។
លោក សោម ភក្តី ហៅស្មាត់ ហ៊ុប ចាប់ផ្ដើមលេងបាល់ទះល្អក្នុងឆ្នាំ ២០១០ នៅអាយុ២២ឆ្នាំ ហើយលេងឡើងខ្លាំងបំផុតនៅអំឡុងឆ្នាំ ២០១៣ និង ២០១៤។
ក្នុងឆ្នាំ២០១១ លោកបានជាប់ជម្រើសជាតិបាល់ទះឆ្នេរខ្សាច់ និងជម្រើសជាតិបាល់ទះក្នុងសាល ចេញទៅលេងស៊ីហ្គេមនៅប្រទេសឥណ្ឌូណេស៊ី ក្រោមការគ្រប់គ្រងរបស់អាណាព្យាបាលសហព័ន្ធបាល់ទះកម្ពុជា។ លោកបានបញ្ចប់អាជីពបាល់ទះរបស់ខ្លួននៅត្រឹមឆ្នាំ ២០១៧ ហើយបើតាមការសាកសួរ ព្រោះលោកអស់និស្ស័យ។ បច្ចុប្បន្នសមត្ថភាពរបស់បុរសវ័យជាង៣០ឆ្នាំ នៅសល់ត្រឹមតែ២០%ប៉ុណ្ណោះបើធៀបនឹងពីមុន៕