វឌ្ឍនភាពការងារត្រៀមការប្រកួតកីឡាជាតិលើកទី៤ និងកីឡាជនពិការលើកទី២ ឈានដល់ដំណាក់កាលណាហើយ...

2024-09-19 05:53:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ទទួលបន្ទុកផ្នែកកីឡា កាលពីថ្ងៃទី១៨ ខែកញ្ញា ឆ្នាំ២០២៤ នេះបានបើកកិច្ចប្រជុំពិនិត្យវឌ្ឍនភាពការងារត្រៀមការប្រកួតកីឡាជាតិ លើកទី៤ និងកីឡាជនពិការលើកទី២ នៅសាលមជ្ឈមណ្ឌលជាតិហ្វឹកហ្វឺនកីឡាក្នុងពហុកីឡដ្ឋានជាតិ។

ទិដ្ឋភាពប្រជុំម្សិលមិញ

លោក ហួត សេងទ្រី ប្រធាននាយដ្ឋានរៀបចំព្រឹត្តិការណ៍ និងស្ថិតិកីឡា បានឲ្យដឹងក្រោយកិច្ចប្រជុំពិនិត្យវឌ្ឍនភាពនៃការត្រៀមការប្រកួតកីឡាជាតិ លើកទី៤ នេះថា ថ្នាក់ដឹកនាំផ្ដោតលើការងាររៀបចំជារួម។ ផ្នែកជំនាញតែងតែប្រជុំជាមួយសហព័ន្ធកីឡាជាតិ និងភាគីពាក់ព័ន្ធនានាជុំវិញបទបញ្ជាការប្រកួតបានផ្សព្វផ្សាយដល់ប្រតិភូកីឡារាជធានី-ខេត្ត និងក្រសួងទាំង៣ រួចរាល់ហើយ។ បទបញ្ជាការប្រកួតទាំងនេះនឹងរៀបចំបោះពុម្ពជាសៀវភៅដើម្បីផ្ដល់ជូនភាគីពាក់ព័ន្ធ។

លោក ហួត សេងទ្រី

ជាមួយគ្នានេះដែរអំពីការកំណត់ទីលាន និងការធ្វើលិខិតរបស់ក្រសួងអប់រំក៏បានរៀបចំរួចរាល់ហើយជាមួយសហព័ន្ធកីឡាជាតិ។ ចំពោះការងារបច្ចេកទេស គណៈកម្មការបច្ចេកទេសសហព័ន្ធបានបញ្ជូនមកហើយរង់ចាំតែក្រសួងចេញលិខិតឧទ្ទេសនាមបន្ទាប់មកប្រជុំមួយៗជាមួយសហព័ន្ធកីឡាជាតិនានាតែប៉ុណ្ណោះ។

ប្រធាននាយដ្ឋានរៀបចំព្រឹត្តិការណ៍ និងស្ថិតិកីឡា បន្ថែមទៀតថា ការងារអំពីពិធី បើក-បិទ កីឡាជាតិនេះក៏បានប្រជុំព្រៀងរួចរាល់ហើយដែរ ពោលនៅថ្ងៃបើកពិធីចំណាយពេលខ្ទង់ ២ម៉ោងរួមមានការដើរក្បួនព្យុហយាត្រា ការសម្ដែងវប្បធម៌ ការសម្ដែងសិល្បៈកម្សាន្តជាដើម។

ទិដ្ឋភាពប្រជុំម្សិលមិញ

បញ្ជាក់ដែរថា កម្ពុជានឹងរៀបចំព្រឹត្តិការណ៍ប្រកួតកីឡាជាតិ លើកទី៤ និងកីឡាជាតិជនពិការ លើកទី២ ធ្វើឡើងចាប់ពីថ្ងៃទី២៩ ខែតុលា ដល់ ៨ ខែវិច្ឆិកា ឆ្នាំ២០២៤។ ការប្រកួតកីឡាជាតិលើកទី៤ នេះនឹងមាន ៣៦ប្រភេទកីឡា និងកីឡាជាតិជនពិការ លើកទី២ មាន ៦ប្រភេទកីឡា។ ចំពោះទីតាំងប្រកួតកីឡាជាតិមាន ៥រាជធានី-ខេត្ត រួមមាន ទី១ ភ្នំពេញ (ស្តាតអូឡាំពិក/មរតកតេជោ) ទី២ ខេត្តកំពង់ឆ្នាំង (ប្រណាំងកង់) ទី៣ ខេត្តស្វាយរៀង (ប្រណាំងទូក) ទី៤ ខេត្តកែប (ទ្រីយ៉ាធ្លុង) ទី៥ ខេត្តព្រះសីហនុ (ម៉ូតូទឹក/ទូកក្ដោង)៕

អត្ថបទ៖ នួន ស៊ីណា