ប្រទេសមានច្បាប់ គ្រួសារមានវិន័យ។ គ្រួសារនីមួយៗ សុទ្ធតែមានរបៀបប្រៀនប្រដៅកូនចៅ និងគ្រប់គ្រងគ្រួសារ ដើម្បីឲ្យក្លាយជាធនធានមនុស្ស ឬពលរដ្ឋល្អក្នុងសង្គម។ សម្រាប់គ្រួសារ កំពូលតារាចម្រៀង ព្រាប សុវត្ថិ ដែលល្បីឈ្មោះរង្វង់សិល្បៈជិត ៣ទស្សវត្សមកហើយនោះ មានទម្លាប់ប្រៀនប្រដៅកូនដោយពាក្យផ្អែមល្ហែម និងអហិង្សា។

“គ្រប់បញ្ហាសុទ្ធតែអាចនិយាយគ្នាបាន ហើយដោះស្រាយដោយសន្ដិវិធី ទើបទទួលបានលទ្ធផលល្អ។ ការប្រៀនប្រដៅកូនៗ ខ្ញុំក៏ធ្វើស្រដៀងគ្នាហ្នឹងដែរ”។ នេះជាការបញ្ជាក់របស់ឧកញ៉ា ព្រាប សុវត្ថិ តាមរយៈការជជីកសួរពីអ្នកសារព័ត៌មានជាច្រើនស្ថាប័នកាលពីពេលកន្លងទៅ។ ប៉ុន្ដែលោកថា គ្រួសារនីមួយៗ មានបញ្ហាខុសៗគ្នា ហើយដំណោះស្រាយក៏ទទួលបានលទ្ធផលក៏ខុសៗគ្នា តែជាភព្វសំណាងកូនៗរបស់លោកក៏ដោយគន្លងធម៌ដែរ។

ជាការកត់សម្គាល់ គេឃើញសម្ដី និងកាយវិការបស់តារាចម្រៀងជើងចាស់រូបនេះ ប្រើជាមួយភរិយា កូនៗ និងអ្នកជុំវិញខ្លួន ប្រកបដោយភាពទន់ភ្លន់ និងស្និទ្ធស្នាលបំផុត។ ជាក់ស្ដែងទាំងនៅលើឆាក និងក្រៅឆាក ឪពុក និងកូនៗទាំង ៣នាក់ ធ្លាប់ច្រៀងរាំរួមគ្នា ដោយកៀកស្មាគ្នាបញ្ចេញស្ដាយប្លែៗត្រូវចិត្ដអ្នកគាំទ្រយ៉ាងខ្លាំង។

ក្នុងនាមជាមនុស្សមហាជន ព្រាប សុវត្ថិ ដែលបច្ចុប្បន្នមានងារជាឧកញ៉ា និងមានទ្រព្យសម្បត្ដិសមល្មមអាចរស់នៅ និងប្រឡូកក្នុងវិស័យសិល្បៈបានជាមួយនឹងមុខរបរដ៏លេចធ្លោរមួយចំនួននោះ លោកនៅតែរក្សាភាពសាមញ្ញ ហើយកេរ្ដិ៍ឈ្មោះរបស់លោកក៏នៅរក្សាបានល្អ។ ទន្ទឹមគ្នានេះ កូនៗទាំង ៣នាក់ដែលអ្នកស្នងមរតកសិល្បៈដ៏លេចធ្លោរពីឪពុកក៏ទទួលបានការគាំទ្រច្រើនពីមហាជន ដែលលទ្ធផលទាំងនេះត្រូវបានគេវិនិច្ឆ័យថា មកពីឪពុកផ្ដល់គំរូល្អដល់កូនៗ ហើយកូនៗក៏ដើរដោយគន្លងធម៌ទៀត។

សូមបញ្ជាក់ថា កំពូលតារាចម្រៀង ព្រាប សុវត្ថិ គិតត្រឹមខែធ្នូ ឆ្នាំ២០២៤ នេះបានប្រឡូកក្នុងវិស័យសិល្បៈជាង ២៥ឆ្នាំ មានកូនប្រុសចំនួន ៣នាក់ ដោយកូនទី១ឈ្មោះ សុវត្ថិ មុន្នីវណ្ណ ទី២ឈ្មោះ សុវត្ថិ មុន្និនាគ និងកូនទី៣ឈ្មោះ សុវត្ថិ មុន្និសិរីវុទ្ធ។ ឧកញ៉ា ព្រាប សុវត្ថិ ធ្លាប់កុងត្រារយៈពេលច្រើនឆ្នាំជាមួយផលិតកម្មរស្មីហង្សមាស ហើយចុងក្រោយនេះឪពុក និងកូនៗបានផ្លាស់មករួមទ្រនំសិល្បៈជាមួយគ្នាក្នុងផលិតកម្មហ្គាឡាក់ស៊ី ណាវ៉ាត្រា៕