ឌីជេ ក្ដឹប ចេញបើកផលិតកម្មផ្ទាល់ខ្លួន ផលិតចម្រៀងថ្មីសុទ្ធមិនចម្លងពីគេ!

2014-12-02 21:13:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ឌីជេ ក្ដឹប ចេញបើកផលិតកម្មផ្ទាល់ខ្លួនមានឈ្មោះថា Camtrax Music ដោយផលិតបទចម្រៀងថ្មីសុទ្ធជាស្នាដៃកូនខ្មែរ មិនចម្លងពីបរទេស។

ការចេញបើកផលិតកម្មផ្ទាល់ខ្លួន ខណៈឌីជេរូបនេះ ធ្លាប់ផ្ញើខ្លួនផ្ញើប្រាណជាមួយផលិតកម្មជាច្រើននាពេលកន្លងមក។ មួយវិញទៀតការបើក ដោយផលិតតែចម្រៀងថ្មីសុទ្ធខាងលើ ក៏ជាការរៀបចំខ្លួនត្រៀមប្រឡូកចូលសមាហរណកម្មអាស៊ាន ២០១៥ ខាងមុខដែរ។

ឌីជេ ក្ដឹប ក្នុងបន្ទប់ ស្ទូឌីអូ ផលិតបទចម្រៀងថ្មី រូបថត៖ Facebook ឌីជេក្ដឹប

តារាចម្រៀង ឌីជេ ក្ដឹប និយាយថា៖ "ទើបតែបើកបានប៉ុន្មានថ្ងៃទេ។ ខ្ញុំកំពុងតែធ្វើបទចម្រៀងថ្មីជាច្រើន ហើយត្រៀមនឹងចេញនាពេលខាងមុខនេះ"។

ឌីជេរូបនេះបន្តថា បទចម្រៀងថ្មីសុទ្ធសាធចំនួន ៦បទ ដែលមានសាច់ភ្លេងខុសៗ ត្រៀមនឹងចេញនាចុងឆ្នាំ២០១៤ ឬមួយអាចចេញនៅដើមឆ្នាំ២០១៥។

មូលហេតុនាំឱ្យ ចេញបើកផលិតកម្មផ្ទាល់ខ្លួន ត្រូវឌីជេខាងលើប្រាប់ថា ដោយសារលោកចង់ធ្វើអ្វីៗខ្លួនឯង ដោយមិនចង់ឱ្យអ្នកដទៃមកបញ្ជាលើខ្លួន។ ម្យ៉ាងទៀតការសម្រេចបើកផលិតកម្មផ្ទាល់ខ្លួន ក៏ព្រោះតែកម្ពុជា ត្រៀមនឹងចូលជាសមាហរណកម្មអាស៊ាននាឆ្នាំ២០១៥ខាងមុខ។

លោកចង់បញ្ជាក់ថា ខ្មែរ ក៏មានសមត្ថភាពផលិតចម្រៀងថ្មីៗ ដោយមិនចម្លងពីនរណាម្នាក់ មិនចាញ់បរទេសឡើយ។

ឌីជេ ក្ដឹប និយាយថាផលិតកម្ម Camtrax Music លេចឡើងដោយមានដៃគូរបស់លោកម្នាក់ជួយសហការ ក៏ដូចជាផ្ដល់ធនធាន ហើយលោកជាអ្នកចេញជាគំនិត។ ទោះជាយ៉ាងណាលោកមិនទាន់បង្ហើបឈ្មោះដៃគូសហការនោះនៅឡើយទេ។

និយាយពីការរំពឹងជោគជ័យក្នុងការបើកផលិតកម្ម ក៏ដូចជាផលិតចម្រៀងថ្មីសុទ្ធសាធ មិនចម្លងពីនរណាម្នាក់ ឌីជេ ក្ដឹប អះអាងថា ការលក់ CD, VCD Original ក្នុងប្រទេសកម្ពុជាលោកមិនសូវរំពឹងខ្ពស់ឡើយ។ ក៏ប៉ុន្តែលោកបានរំពឹងខ្ពស់ពីការលក់ចម្រៀងថ្មីរបស់ខ្លួននៅ iTunes Store ថានឹងអាចមានក្ដីសង្ឃឹមខ្ពស់ទៅថ្ងៃខាងមុខ។

ឌីជេ ក្ដឹប ច្រៀងជាមួយ មាស សុខសោភា កាលពីពេលថ្មីៗ

“បងដឹងស្រាប់ហើយស្រុកយើងការលក់ CD, VCD Original គេមិនសូវចាប់អារម្មណ៍ឡើយ ព្រោះគេគិតថាថ្លៃ ហើយមិនសូវជាល្អ។ ដូច្នេះខ្ញុំមានតែសង្ឃឹមការលក់លើ iTunes Store ទេអាចឱ្យផលិតកម្មផលិតចម្រៀងថ្មីសុទ្ធរបស់ខ្ញុំអាចរស់បានទៅថ្ងៃមុខ"។ ឌីជេ ក្ដឹប បន្ថែម។

ឌីជេ ក្ដឹប ទើបផុតកុងត្រាជាមួយផលិតកម្ម LD Picture ថ្មីៗនេះ។ ដូច្នេះហើយទើបលោកសម្រេចចិត្តមកបើកផលិតកម្មថ្មីផ្ទាល់ខ្លួន។ ក្រៅពីឌីជេមួយរូបមានឈ្មោះល្បី ជាពិសេសអាកប្បកិរិយាក្រមិចក្រមើម លោកក៏ជាតារាសម្ដែងម្នាក់មានឈ្មោះល្បីផងដែរក្នុងពិភពសិល្បៈ៕

អានអត្ថបទបន្ត៖ ថន លក្ខិណា ដើរលុកលុយស្ថានីយទូរទស្សន៍ជាច្រើននៅថៃ

អានអត្ថបទបន្ត៖ មួយសន្លឹករបស់ ពេជ្រ សេរីរ័ត្ន មើលហើយ ញាក់សាច់

អានអត្ថបទបន្ត៖ ផលិតករមកពី ៦ផលិតកម្មជជែកពិភាក្សាពីបញ្ហាប្រឈមនឹងការផលិតកុន

អត្ថបទ៖ អ៊ីង សុឡា