អាវរបស់ សរ សុភា មានករណីពីរសម្រាប់អ្នកពាក់បន្ត

2014-12-04 16:42:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយការទទួលមរណភាពទាំងមិនគួរឲ្យជឿរបស់កីឡាករ សរ សុភា អ្នកចាំទីដៃទី១ ក្រុមស្វាយរៀង និងជាអ្នកចាំទីក្រុមជម្រើសជាតិ មកទល់នឹងពេលនេះពុំទាន់មានកីឡាករណាម្នាក់ពាក់អាវលេខ១ ដែលជាអាវអ្នកចាំទី របស់ ស សុភា នោះទេ ហើយពាក់ព័ន្ធនឹងរឿងនេះថ្នាក់ដឹកនាំក្លិបពុំទាន់បានធ្វើការប្រជុំសម្រេចយ៉ាងណានោះទេ ពីព្រោះម្នាក់ៗសុទ្ធតែជាប់រវល់រៀងៗខ្លួន។

បើតាមលោក អោក សំណាង អគ្គលេខាធិការក្លិបស្វាយរៀងបានលើកឡើងថា រឿងអាវរបស់ សរ សុភា មានរឿងពីរដែលនឹងត្រូវលើកឡើងគឺទី១ ទាក់ទងនឹងការគោរព ដែលមានន័យថាប្រសិនបើក្រុមចាត់ទុកថាកីឡាករណាម្នាក់ជាវីរៈបុរសរបស់គេ នោះគេចង់បានណាស់អាវវីរបុរសរបស់គេយកមកពាក់ ដើម្បីបង្ហាញពីការគោរពស្រឡាញ់។

បញ្ហាទី២គឺទាក់ទងនឹងអប្បិយជំនឿ ដែលបញ្ហានេះមិនមែនមានតែខ្មែរទេ តែសូម្បីតែបរទេសក៏នៅជឿលើរឿងនេះដែរ។ កីឡាករអាចនឹងមានអារម្មណ៍ភ័យខ្លាច ឬមានអារម្មណ៍មិនល្អ ពីព្រោះតែនឹកឃើញដល់រឿងដែលបានកើតឡើងលើម្ចាស់លេខអាវនោះ ហើយវានឹងធ្វើឲ្យប៉ះពាល់ខ្លាំងដល់ផ្លូវអារម្មណ៍ និងការប្រកួតរបស់កីឡាករ។ អគ្គលេខាធិការខាងលើបានបន្តថា នៅបរទេសភាគច្រើនគេបានព្យួរទុកលេខរបស់កីឡាករដែលជួបគ្រោះថ្នាក់រហូតដល់បាត់បង់ជីវិត ប៉ុន្តែក៏មានក្រុមខ្លះយកលេខអាវកីឡាករដែលជួបគ្រោះថ្នាក់នោះមកឲ្យកីឡាករផ្សេងពាក់ផងដែរ។

ជាទូទៅ គេតែងសង្កេតឃើញថា អ្នកចាំទីភាគច្រើនតែងតែពាក់អាវលេខ១ ដើម្បីសម្គាល់ខ្លួនថាជាអ្នកចាំទី ប៉ុន្តែរឿងលេខអាវប៉ុន្មាន សម្គាល់ថាតំណែងអ្វីនោះសហព័ន្ធបាល់ទាត់មិនបានធ្វើការកំណត់នោះទេគឺអាស្រ័យលើក្លិបជាអ្នករៀបចំឲ្យកីឡាករពាក់ប៉ុណ្ណោះ៕

អត្ថបទ៖ អៀង សូទ្រី

រូបថត៖ ក្លិបស្វាយរៀង