ចំណូលប្ដី-ប្រពន្ធ អេ ភូថង ចិញ្ចឹមតែកីឡាករ និងផ្គត់ផ្គង់ក្លិប

2014-12-11 22:13:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី សាំង សុម៉ាលី ភរិយាអតីតកីឡាករប្រដាល់ដ៏ល្បីល្បាញលោក អេ ភូថង បានឲ្យដឹងថា ចំណូលប្រចាំខែរបស់ប្ដី-ប្រពន្ធអ្នកទាំងពីរបានច្រើនគួរសមដែរ ប៉ុន្តែចំណូលទាំងនេះត្រូវបានចំណាយទៅវិញអស់គ្មានសល់ក្នុងមួយខែៗ សម្រាប់តែការហូបចុក ហ្វឹកហាត់របស់កីឡាករនៅក្នុងក្លិប និងជួយផ្គត់ផ្គង់ដល់ក្មេងៗដែលអ្នកទាំងពីរចិញ្ចឹមនៅក្នុងអង្គការមួយ។

អាជ្ញាកណ្ដាលជាស្ត្រីដំបូងគេដែលបានប្រឡូកក្នុងវិស័យកីឡាប្រដាល់រូបនេះបានបង្ហើបប្រាប់ពីរឿងប្រាក់ចំណូលថា ក្នុងមួយខែៗអ្នកស្រីអាចរកបាន១៧០ដុល្លារ ពីការងារជាចៅក្រុម-អាជ្ញាកណ្ដាលនៅតាមសង្វៀនប៉ុស្ដិ៍ទូរទស្សន៍នានា និងទទួលបាន៥០ដុល្លារផ្សេងទៀតពីការងារជួយមើលថែទាំក្មេងៗ។ ថ្វីបើការងារចិញ្ចឹមក្មេង ដែលមានចំនួនជាង៤០នាក់ មិនទទួលបានចំណូលច្រើន ហើយក៏ត្រូវចំណាយថវិកាផ្ទាល់ខ្លួនទៀតក្ដី ក៏អ្នកស្រីនិងស្វាមី រីករាយនឹងជួយដល់ក្មេងៗទាំងនោះជានិច្ចតាមលទ្ធភាពដែលមាន។

ងាកទៅមើលចំណូលរបស់លោក អេ ភូថង វិញ ក្នុងមួយខែៗ មិនក្រោម៤០០ដុល្លារនោះទេ បើបូកបញ្ចូលទាំងចំណូលពីការងារជាអាជ្ញាកណ្ដាលកាត់សេចក្ដីការប្រកួតប្រដាល់នៅតាមប៉ុស្តិ៍ទូរទស្សន៍នានា និងប្រាក់ខែទាហានពីក្របខ័ណ្ឌក្រសួងការពារជាតិ។

ដោយឡែក សម្រាប់ការចំណាយវិញគឺអ្នកទាំងពីរត្រូវចំណាយលើការហូបចុករបស់កីឡាករដែលហ្វឹកហាត់ប្រដាល់នៅក្នុងក្លិប ដោយក្នុងមួយខែៗមិនក្រោម៤០០ដុល្លារនោះទេ ដែលនេះគិតតែលើអាហារប្រចាំថ្ងៃប៉ុណ្ណោះ មិនគិតលើសម្ភារៈផ្សេងៗនោះទេ។ បន្ថែមលើនេះ ប្ដី-ប្រពន្ធអ្នកទាំងពីរត្រូវជួយឧបត្ថម្ភបន្ថែមដល់ក្មេងៗដែលអ្នកទាំងពីរចិញ្ចឹមទៀតផង ពីព្រោះក្មេងៗទាំងនោះទទួលបានការជួយឧបត្ថម្ភពីអង្គការត្រឹមតែអាហារថ្ងៃត្រង់មួយពេល និងការចំណាយលើទឹក ភ្លើង និងថ្លៃផ្ទះដែលជួលសម្រាប់ធ្វើជាទីតាំងអង្គការនោះប៉ុណ្ណោះ។

អ្នកស្រី សាំង សុម៉ាលី បានបញ្ជាក់ថា៖ «ខ្ញុំធ្លាប់អន់ចិត្តដែរ ព្រោះមានស្វាមីជាអ្នកល្បីនឹងគេដែរ តែអត់មានឡាន អត់មានសម្ភារៈទំនើបអីប្រើដូចគេ»។ អ្នកស្រីបានបន្តថា ធ្លាប់បានពិភាក្សាជាមួយស្វាមីរឿងចង់មានបានដូចគេដូចឯងដែរ ប៉ុន្តែស្វាមីនៅស្រឡាញ់កីឡាខ្លាំង ចង់ជួយកីឡា។ អ្នកបានបន្តលើកឡើងថា៖ «ឥឡូវលែងគិតច្រើនហើយ គិតថាធ្វើម៉េចបើជាតិនេះគេឲ្យយើងមកបានតែប៉ុណ្ណឹង។ រឿងជួយកីឡាមិនដឹងថាឈប់ពេលណាទេ លែងទៅរួចពេលណាចាំឈប់ពេលហ្នឹងទៅ»។

សព្វថ្ងៃអ្នកទាំងពីរមានចំណូលច្រើន ដែលសមល្មមនឹងមានជីវភាពធូរធារនៅក្នុងសង្គម អាចនឹងមានឡានជិះ ហើយប្រើប្រាស់សម្ភារៈទំនើបៗ ប៉ុន្តែដោយសារការជួយទំនុកបម្រុងច្រើនដល់វិស័យកីឡាប្រដាល់ និងការជួយគិតគូរដល់ក្មេងៗកំព្រារ និងក្រីក្រលំបាក ធ្វើឲ្យអ្នកទាំងពីរមិនមានអ្វីនៅសេសសល់ ដើម្បីសន្សំទុក សម្រាប់ធ្វើមានបាននឹងគេនោះទេ៕

អត្ថបទ៖ អៀង សូទ្រី